AKP ភ្នំពេញ ថ្ងៃទី៧ ខែតុលា ឆ្នាំ២០២៦-- ឯកឧត្តមបណ្ឌិត នួន ដាញ៉ិល រដ្ឋលេខាធិការក្រសួងអភិវឌ្ឍន៍ជនបទ រួមជាមួយថ្នាក់ដឹកនាំ និងមន្ត្រីនៃអង្គភាពគ្រប់គ្រងកម្មវិធី RID4CAM ព្រមទាំងមានការចូលរួមអមដំណើរដោយក្រុមទីប្រឹក្សាបច្ចេកទេស (PIC) មន្ទីរអភិវឌ្ឍន៍ជនបទខេត្តបាត់ដំបង និងខេត្តកំពង់ធំ និងតំណាងធនាគារអភិវឌ្ឍន៍អាល្លឺម៉ង់ (KfW) ប្រចាំព្រះរាជាណាចក្រកម្ពុជា កាលពីនាថ្ងៃទី៥-៦ ខែតុលា ឆ្នាំ២០២៦ បានអញ្ជើញចុះត្រួតពិនិត្យស្ថានភាពផ្លូវជនបទ និងសំណង់សិល្បការ្យ ដែលបានបញ្ចប់ការស្ថាបនា និងកំពុងស្ថាបនា ក្នុងក្របខ័ណ្ឌកម្មវិធីអភិវឌ្ឍន៍ហេដ្ឋារចនាសម្ព័ន្ធជនបទសម្រាប់កម្ពុជា (RID4CAM) នៅខេត្តបាត់ដំបង និងខេត្តកំពង់ធំ ដែលបាន និងកំពុងទទួលរងការខូចខាតដោយជំនន់ទឹកភ្លៀង។

ខ្សែផ្លូវទាំង៨រួមមាន៖ ខ្សែផ្លូវទី១. ឈ្មោះផ្លូវដំបូកខ្ពស់-វត្តកណ្ដាល ជាផ្លូវក្រាលកៅស៊ូពីរជាន់ (DBST) មានប្រវែងសរុប ១៤,៦២គ.ម. តភ្ជាប់ពីផ្លូវជាតិលេខ៥ ត្រង់ចំណុចភូមិដំបូកខ្ពស់ ឃុំរាំងកេសី ទៅដល់វត្តកណ្ដាល ឃុំអូរដំបង២ ស្រុកសង្កែ ដែលបានបញ្ចប់ការសាងសង់កាលពីខែសីហា ឆ្នាំ២០២៥។ ខ្សែផ្លូវនេះ ត្រូវបានទឹកហូរច្រោះ បាក់តាមជើងទេរខូចខាត ប្រវែងប្រមាព ២ គ.ម. និងមានការហូរកាត់ផ្តាច់តួផ្លូវ ១កន្លែងផងដែរ ដែលបណ្ដាលឱ្យមានការផ្អាកការធ្វើចរាចរណ៍ដោយរថយន្ដជាបណ្តោះអាសន្ន។ ខ្សែផ្លូវទី២. ឈ្មោះផ្លូវ រ៉ា-ស្ពាន ជាផ្លូវក្រាលកៅស៊ូពីរជាន់ (DBST) ប្រវែង ១៤,១០គ.ម. តភ្ជាប់ពីភូមិរ៉ា ឃុំធិបតី ទៅដល់ភូមិស្ពាន ឃុំគាស់ក្រឡ ស្រុកគាស់ក្រឡ ដែលបានបញ្ចប់ការសាងសង់កាលពីខែសីហា ឆ្នាំ២០២៥។ ខ្សែផ្លូវនេះ ត្រូវបានទឹកជន់លិចអស់ប្រវែងប្រមាណ ៦គ.ម. ដោយត្រូវបានទឹកហូរច្រោះ បាក់តាមជើងទេរដោយអន្លើរ ប្រវែងប្រមាណ ២គ.ម. ព្រមទាំងមានការហូរកាត់ដាច់តួផ្លូវ ២កន្លែង ប្រវែងសរុបប្រហែល ៧ម៉ែត្រ ដែលបណ្ដាលឱ្យផ្អាកការធ្វើចរាចរណ៍រដោយថយន្ដជាបណ្តោះអាសន្ន។

ខ្សែផ្លូវទី៣. ឈ្មោះផ្លូវ ឥន្ទកុមារ-តាប៉ោង ជាផ្លូវក្រាលកៅស៊ូពីរជាន់ (DBST) ប្រវែង ៩,៥គ.ម. តភ្ជាប់ពីភូមិឥន្ទកុមារ ទៅភូមិតាប៉ោង ឃុំកំពង់ស្វាយ ស្រុកកំពង់ស្វាយ ដែលបញ្ចប់ការសាងសង់កាលពីខែកញ្ញា ឆ្នាំ២០២៦ ប៉ុន្តែនៅពុំទាន់បានប្រគល់ ទទួលនៅឡើយ (Taking Over)។ ផ្លូវនេះត្រូវបានរងការខូចខាតទឹកជំនន់ស៊ីដាច់ជើងទេរដោយអន្លើរ ប្រវែងសរុបជាង ២គ.ម.។ ខ្សែផ្លូវទី៤. ឈ្មោះផ្លូវ កំពង់ឈើទាល-គោកស្រុក ជាផ្លូវក្រាលកៅស៊ូពីរជាន់ (DBST) ប្រវែង ៦,៨គ.ម. តភ្ជាប់ពីភូមិកំពង់ឈើទាល ទៅភូមិគោកស្រុក ឃុំតាំងក្រសៅ ស្រុកប្រសាទសំបូរ ដែលបញ្ចប់ការសាងសង់កាលពីខែកញ្ញា ឆ្នាំ២០២៦ ប៉ុន្តែនៅពុំទាន់បានប្រគល់ ទទួលនៅឡើយ (Taking Over)។ ផ្លូវនេះត្រូវបានរងការខូចខាតទឹកជំនន់ស៊ីដាច់ជើងទេរដោយអន្លើរ ប្រវែងសរុបជាង ២គ.ម.។

ខ្សែផ្លូវទី៥. ឈ្មោះផ្លូវ តាំងក្រសៅ-ប្រឡាយ ជាផ្លូវក្រាលកៅស៊ូពីរជាន់ (DBST) ប្រវែង ៥,៣គ.ម. តភ្ជាប់ពីភូមិតាំងក្រសៅ ទៅភូមិប្រឡាយ ឃុំតាំងក្រសៅ ស្រុកប្រសាទសំបូរ ដែលបញ្ចប់ការសាងសង់កាលពីខែកញ្ញា ឆ្នាំ២០២៦ ប៉ុន្តែនៅពុំទាន់បានប្រគល់ ទទួលនៅឡើយ (Taking Over)។ ផ្លូវនេះត្រូវបានរងការខូចខាតទឹកជំនន់ស៊ីដាច់ជើងទេរដោយអន្លើរ ប្រវែងសរុបជាង ១គ.ម.។ ខ្សែផ្លូវទី៦. ឈ្មោះផ្លូវ ប្រឡាយ-តាប៉ោង ជាផ្លូវក្រាលកៅស៊ូពីរជាន់ (DBST) ប្រវែង ៤,៨គ.ម. តភ្ជាប់ពីភូមិប្រឡាយ ទៅភូមិតាប៉ោង ឃុំតាំងក្រសៅ ស្រុកប្រសាទសំបូរ ដែលបញ្ចប់ការសាងសង់កាលពីខែកញ្ញា ឆ្នាំ២០២៦ ប៉ុន្តែនៅពុំទាន់បានប្រគល់ ទទួលនៅឡើយ (Taking Over)។ ផ្លូវនេះត្រូវបានរងការខូចខាតទឹកជំនន់ស៊ីដាច់ជើងទេរដោយអន្លើរ ប្រវែងសរុបជាង ១គ.ម.។ ខ្សែផ្លូវទី៧. ឈ្មោះផ្លូវ កំពង់ឈើទាល-ប្រឡាយ ជាផ្លូវក្រាលកៅស៊ូពីរជាន់ (DBST) ប្រវែង ១៤,៦គ.ម. តភ្ជាប់ពីភូមិកំពង់ឈើទាល ទៅភូមិប្រឡាយ ឃុំសំបូរណ៍ ស្រុកប្រសាទសំបូរ ដែលបញ្ចប់ការសាងសង់កាលពីខែកញ្ញា ឆ្នាំ២០២៦ ប៉ុន្តែនៅពុំទាន់បានប្រគល់ ទទួលនៅឡើយ (Taking Over)។ ផ្លូវនេះត្រូវបានរងការខូចខាតដោយទឹកជំនន់ និងមានការស៊ីដាច់ជើងទេរបន្តិចបន្តួច និងខ្សែផ្លូវទី៨. ឈ្មោះផ្លូវ តាអោក-កំពីងតាគង់ ជាផ្លូវក្រាលកៅស៊ូពីរជាន់ (DBST) ប្រវែង ៤,៧គ.ម. តភ្ជាប់ពីភូមិតាអោក ទៅភូមិកំពីងតាគង់ ឃុំឈូក ស្រុកប្រសាទសំបូរ ដែលបញ្ចប់ការសាងសង់កាលពីខែកញ្ញា ឆ្នាំ២០២៦ ប៉ុន្តែនៅពុំទាន់បានប្រគល់ ទទួលនៅឡើយ (Taking Over)។ ផ្លូវនេះត្រូវបានរងការខូចខាតដោយទឹកជំនន់ និងមានការស៊ីដាច់ជើងទេរបន្តិចបន្តួច។

បន្ទាប់ពីបានចុះពិនិត្យស្ថានភាពខ្សែផ្លូវទាំងអស់ខាងលើរងការខូចខាតដោយទឹកជំនន់រួចមក ឯកឧត្តមបណ្ឌិត នួន ដាញ៉ិល បានណែនាំដល់ទីប្រឹក្សាបច្ចេកទេស (PIC) ឱ្យសហការជាមួយក្រុមហ៊ុនអ្នកទទួលការចុះពិនិត្យ និងសិក្សាលម្អិតបន្ថែម ដើម្បីវាយតម្លៃពីផលប៉ះពាល់ជាក់ស្តែង និងធ្វើរបាយការណ៍ ដើម្បីស្នើសុំការគាំទ្រពីម្ចាស់ជំនួយ (ធនាគារ KfW) ក្នុងការធ្វើការជួសជុលកែលម្អផ្លូវទាំងអស់ខាងលើឡើងវិញឱ្យបានឆាប់រហ័សបំផុត ដើម្បីអាចឱ្យប្រជាពលរដ្ឋប្រើប្រាស់បានជាធម្មតាឡើងវិញ៕

ដោយ៖ ពេជ្រ សំអឿន (ប្រភព៖ ក្រសួងអភិវឌ្ឍន៍ជនបទ)