AKP ភ្នំពេញ ថ្ងៃទី០៧ ខែតុលា ឆ្នាំ២០២៦ -- ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានអនុញ្ញាតឱ្យលោកស្រី Stefania Dina នាយិកាប្រចាំតំបន់ទទួលបន្ទុកផ្នែកកសិកម្ម ស្បៀងអាហារ ធនធានធម្មជាតិ និងអភិវឌ្ឍន៍ជនបទ នៃធនាគារអភិវឌ្ឍន៍អាស៊ី (ADB) និងគណៈប្រតិភូអមដំណើរ ចូលជួបសម្ដែងការគួរសម និងពិភាក្សាការងារ នៅទីស្ដីការក្រសួងធនធានទឹក និងឧតុនិយម នារសៀលថ្ងៃពុធ ទី៧ ខែតុលា ឆ្នាំ២០២៦ នេះ។

ឯកឧត្តមរដ្ឋមន្ត្រី បានសម្តែងនូវការស្វាគមន៍ចំពោះគណៈប្រតិភូធនាគារអភិវឌ្ឍន៍អាស៊ី (ADB) ដឹកនាំដោយលោកស្រី Stefania Dina ដែលបានឆ្លៀតពេលវេលាដ៏មានតម្លៃ និងមមាញឹក ដើម្បីមកជួបសម្តែងការគួរសម និងពិភាក្សាការងារ ស្ដីពីអាទិភាពនៃការអភិវឌ្ឍវិស័យធនធានទឹកនៅកម្ពុជាទាំងក្នុងពេលបច្ចុប្បន្ន និងទៅអនាគត ដែលដើរតួនាទីយ៉ាងសំខាន់ក្នុងការគាំទ្រដល់ការអភិវឌ្ឍសេដ្ឋកិច្ចជាតិលើគ្រប់វិស័យ និងការលើកកម្ពស់ជីវភាពរស់នៅរបស់ប្រជាជនកម្ពុជានៅតំបន់ជនបទ។

បញ្ជាក់ប្រាប់គណៈប្រតិភូ ឯកឧត្តមរដ្ឋមន្ត្រីមានប្រសាសន៏ ថាក្រសួងធនធានទឹក និងឧតុនិយម កំពុងបន្តការកសាងហេដ្ឋារចនាសម្ព័ន្ធធារាសាស្ត្រពេញលេញ និងការធ្វើទំនើបកម្មលើការគ្រប់គ្រងធនធានទឹក ដើម្បីគាំទ្រដល់ការកែទម្រង់របស់រាជរដ្ឋាភិបាល និងពង្រឹងការអភិវឌ្ឍវិស័យធនធានទឹក និងឧតុនិយមប្រកបដោយប្រសិទ្ធភាព និរន្តរភាព និងបរិយាបន្ន ព្រមទាំងការកសាងភាពធន់ទៅនឹងការប្រែប្រួលអាកាសធាតុ។

ភាគីទាំងពីរ បានពិភាក្សាអំពីអាទិភាពនៃការអភិវឌ្ឍវិស័យធនធានទឹក និងបញ្ហាប្រឈមសំខាន់ៗ និងពិនិត្យមើលវឌ្ឍនភាពនៃគម្រោងកំពុងអនុវត្តដែលមានការគាំទ្រពីធនាគារអភិវឌ្ឍន៍អាស៊ី និងជម្រើសនានាសម្រាប់ការកែលម្អប្រសិទ្ធភាពការងារ ព្រមទាំងធ្វើការផ្លាស់ប្តូរទស្សនៈ និងស្វែងរកឱកាសដើម្បីពង្រឹង និងពង្រឹកកិច្ចសហប្រតិបត្តិការបន្ថែមទៀតរវាងក្រសួងធនធានទឹក និងឧតុនិយម និងធនាគារអភិវឌ្ឍន៍អាស៊ី (ADB)។

សូមជម្រាបថា បច្ចុប្បន្ន ធនាគារអភិវឌ្ឍន៍អាស៊ី (ADB) បានផ្តល់ហិរញ្ញប្បទានសម្រាប់គម្រោងយុទ្ធសាស្ត្រចំនួន៤ ដើម្បីគាំទ្រដល់ការគ្រប់គ្រងធនធានទឹក និងការអភិវឌ្ឍហេដ្ឋារចនាសម្ព័ន្ធធារាសាស្ត្រនៅកម្ពុជា ក្នុងនោះគម្រោងចំនួន៣ កំពុងស្ថិតក្នុងដំណាក់កាលអនុវត្ត គឺគម្រោងខ្សែច្រវាក់ផលិតកម្មប្រកបដោយភាតរបរិស្ថាន (CFAVC) គម្រោងកែលម្អវិស័យធារាសាស្ត្រកសិកម្ម (IAIP) គម្រោងគ្រប់គ្រងធនធានទឹកចម្រុះ (IWRM) និងគម្រោងចំនួន១ កំពុងស្ថិតក្នុងដំណាក់កាលរៀបចំគម្រោង ការសិក្សាសមិទ្ធិលទ្ធភាព និងការរៀបចំគំនូសប្លង់វិស្វកម្មលម្អិត គឺគម្រោងគ្រប់គ្រងធនធានទឹកចម្រុះជំហានពីរ (SIWRMP)៕

ដោយ៖ ពេជ្រ សំអឿន(ប្រភព៖ក្រសួងធនធានទឹក និងឧតុនិយម)