AKP ភ្នំពេញ ថ្ងៃទី២ ខែ តុលា ឆ្នាំ ២០២៦--បន្ទាប់ពីបានជួយដល់ដំណើរការចុះបញ្ជីម៉ាកសម្គាល់ភូមិសាស្ត្រទំនិញ (GI) សម្រាប់ស្វាយឧត្តរមានជ័យ និងស្វាយចន្ទីកំពង់ធំ រួចមក គម្រោងគជ់ បានរៀបចំដំណើរទស្សនកិច្ចសិក្សាមួយសម្រាប់សមាគម GI នៃខេត្តទាំងពីរ ដើម្បីទៅសិក្សារៀនសូត្រពីអ្នកផលិត និងក្រុមហ៊ុនជួញដូរផលិតផលម៉ាកសម្គាល់ភូមិសាស្ត្រទំនិញ ដែលទទួលបានជោគជ័យនៅក្នុងរាជធានីភ្នំពេញ ខេត្តកំពង់ស្ពឺ និងខេត្តកំពត។       គួរបញ្ជាក់ថា ប្រតិភូបានទៅទស្សនា និងរៀនសូត្រពីក្រុមហ៊ុន Confirel, សមាគមលើកកម្ពស់ស្ករត្នោតកំពង់ស្ពឺ សមាគមលើកកម្ពស់ម្រេចកំពត ក្រុមហ៊ុន LaPlantix សមាគម GI អំបិលកំពត-កែប និងទីតាំងតាំងបង្ហាញផលិតផល GI នៅផ្សារទំនើបអ៊ីអនមានជ័យ។ពួកគេបានសិក្សាអំពីរបៀបនៃការគ្រប់គ្រងផលិតផល GI ចាប់តាំងពីការរក្សាគុណភាព និងការអនុលោមតាមស្តង់ដារ រហូតដល់ការវេចខ្ចប់ ការផ្សព្វផ្សាយ ការធ្វើទីផ្សារ និងការភ្ជាប់ទំនាក់ទំនងជាមួយអ្នកទិញ។           
គម្រោងគជ់ របស់ក្រសួងកសិកម្ម បានឱ្យដឹងដែរថា មេរៀនទាំងនេះនឹងជួយដល់ក្រុមអ្នកផលិតស្វាយឧត្តរមានជ័យ និងស្វាយចន្ទីកំពង់ធំ ក្នុងការកែលម្អការគ្រប់គ្រង និងការធ្វើទីផ្សារសម្រាប់ផលិតផល GI របស់កសិករព្រមទាំងជួយកសិករក្នុងការរក្សាគុណភាព និងកេរ្តិ៍ឈ្មោះផលិតផលក្នុងតំបន់របស់ពួកគេ៕

ដោយ មករា