AKP ភ្នំពេញ ថ្ងៃទី១ ខែតុលា ឆ្នាំ២០២៦-- អង្គភាប្រឆាំងអំពើពុករលួយ ឬហៅថា ACU បានកំពុងសហការជាមួយក្រសួងមហាផ្ទៃ អង្គការតម្លាភាពកម្ពុជា គណៈមេធាវី ដើម្បីសំដៅយ៉ាងណាប្រយុទ្ធប្រឆាំងនឹងអំពើពុករលួយឱ្យកាន់តែមានប្រសិទ្ធភាព។

ក្នុងកិច្ចប្រជុំក្រុមប្រឹក្សាជាតិប្រឆាំងអំពើពុករលួយ នាដើម សប្តាហ៍នេះ អង្គភាពប្រឆាំងអំពើពុករលួយបានឱ្យដឹងថា អង្គភាពនេះបាន សហការជាមួយក្រសួងមហាផ្ទៃ ដើម្បីពង្រឹងការងារលទ្ធកម្មថ្នាក់ក្រោមជាតិ ដោយស្ថាប័នទាំង២ រៀបចំ អនុស្សរណៈនៃការយោគយល់គ្នា MOU ធ្វើការផ្សព្វផ្សាយច្បាប់អំពីលទ្ធកម្ម ដល់ឃុំសង្កាត់ ស្រុកក្រុង មន្ទីរជុំវិញខេត្តនីមួយៗ និងចាប់ដៃ (Hand On) ឱ្យធ្វើលទ្ធកម្ម ២ ឬ ៣ ករណី ជាក់ស្តែង។

ក្រៅពីនេះអង្គភាពប្រឆាំងអំពើពុករលួយក៏កំពុងរៀបចំផែនការសកម្មភាព ជាមួយអង្គការក្រៅរដ្ឋាភិបាលមាន អង្គការតម្លាភាពកម្ពុជា (TIC) ជាដើម ដើម្បីរួមគ្នាពង្រឹងការងារ លទ្ធកម្ម នៅថ្នាក់ក្រោមជាតិជាមួយគ្នា។ ក្រៅពីនេះអង្គភាពប្រឆាំងអំពើពុករលួយ សហការជាមួយគណៈកម្មាធិការប្រឡងថ្នាក់ជាតិ ក្នុងវិស័យសុខាភិបាល ដើម្បីរួមគ្នាទប់ស្កាត់ការបោកបន្លំក្នុងការប្រឡងចាប់តាំងពីដំណាក់កាលដាក់ពាក្យទៅរកមើលឯកសារក្លែងក្លាយ និងទប់ស្កាត់មិនឱ្យមានជនប្រឡងជំនួសបេក្ខជន។

ជាមួយគ្នានេះ អង្គភាពប្រឆាំងអំពើពុករលួយក៏បានសហការជាមួយគណៈមេធាវី ទប់ស្កាត់ការដាក់ឯកសារក្លែងក្លាយ របស់បេក្ខជនប្រឡងចូលធ្វើមេធាវីជំនាន់ទី២១ ដែលក្នុងនោះមកដល់ពេលនេះរកឃើញ ៦នាក់ ក្នុងនោះបេក្ខជន១នាក់ រឹងរូសមិនចូលមកឱ្យ អ.ប.ព. ស្តាប់ចម្លើយ ហើយ ៥នាក់ទៀត បានសហការផ្តល់ចម្លើយដោយស្មោះត្រង់។

គួរបញ្ជាក់ថា ក្នុងកិច្ចប្រជុំក្រុមប្រឹក្សាជាតិប្រឆាំងអំពើពុករលួយនេះក៏បានបញ្ជាក់ពីការងារ ធ្វើកោសលវិច័យទូរសព្ទ ៨៤៦ គ្រឿង កុំព្យូទ័រមួយចំនួន ស៊ីមកាតទូរសព្ទអន្តរជាតិចំនួន ៤៦៧ ស៊ីម របស់ពួកអនឡាញស្គេម ដែលសាលាដំបូងរាជធានីភ្នំពេញប្រគល់ឱ្យ អង្គភាពប្រឆាំងអំពើពុករលួយស្រាវជ្រាវរក ទី ១. រចនាសម្ព័ន្ធ និងការទទួលខុសត្រូវនៃទំនាក់ទំនងការងារ ក្នុងសកម្មភាពអនឡាញស្គេមរបស់ជនត្រូវចោទ ២២ នាក់។ ទី២. ស្រាវជ្រាវរកអត្តសញ្ញាណជនត្រូវចោទ និងទ្រព្យសម្បត្តិជនត្រូវចោទនោះ។ ទី៣. ស្រាវជ្រាវរកអត្តសញ្ញាណ ជនរងគ្រោះជាជនជាតិអាល្លឺម៉ង់-អាម៉េរិក និងជនបរទេសផ្សេងទៀត ។ ទី៤. ស្រាវជ្រាវទំនាក់ទំនង និងវិធីដាក់ប្រាក់វិនិយោគ ការផ្ទេរនិងការទទួលប្រាក់រវាងជនរងគ្រោះជាមួយជនត្រូវចោទ និងទី៥. ស្រាវជ្រាវស្វែងរកភស្តុតាង ផ្សេងទៀតផងដែរ៕

ដោយ៖ មករា