AKP បន្ទាយមានជ័យ ថ្ងៃទី២៧ ខែកញ្ញា ឆ្នាំ២០២៦  --  ឯកឧត្តម ជា ឆេង អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងលោកជំទាវ ព្រមទាំងសហការី បានអញ្ជើញធ្វើបុណ្យកាន់បិណ្ឌ វេនទី១ នៅវត្តធម្មកោសលារាម (តាសល់ថ្មី) ស្ថិតក្នុងឃុំចំណោម ស្រុកមង្គលបូរី ខេត្តបន្ទាយមានជ័យ នៅថ្ងៃអាទិត្យ ១រោច ខែភទ្របទ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី២៧ ខែកញ្ញា ឆ្នាំ២០២៦ ដោយបានប្រព្រឹត្តទៅតាមប្រពៃណីព្រះពុទ្ធសាសនា និងទំនៀមទម្លាប់ដ៏ល្អផូរផង់របស់ខ្មែរ។

ក្នុងឱកាសនោះ ឯកឧត្តម ជា ឆេង និងលោកជំទាវ ព្រមទាំងសហការី បាននាំយកចង្ហាន់ ទេយ្យទាន និងបច្ច័យ ប្រគេនព្រះសង្ឃ ដើម្បីឧទ្ទិសកុសលផលបុណ្យជូនដល់បុព្វការីជន និងញាតិការទាំងឡាយដែលបានចែកឋានទៅកាន់បរលោក ព្រមទាំងសុំសេចក្តីសុខ ចម្រើន និងសិរីសួស្តីសម្រាប់ក្រុមគ្រួសារ។
    
ឯកឧត្តម ជា ឆេង បានមានប្រសាសន៍ថា ពិធីបុណ្យកាន់បិណ្ឌ និងភ្ជុំបិណ្ឌ គឺជាបុណ្យប្រពៃណីជាតិដ៏មានសារៈសំខាន់ ដែលប្រជាពលរដ្ឋខ្មែរបានប្រារព្ធជារៀងរាល់ឆ្នាំ ដើម្បីឧទ្ទិសកុសលផលបុណ្យជូនដល់បុព្វការីជន និងញាតិមិត្តដែលបានទទួលមរណភាព ព្រមទាំងជាឱកាសឱ្យកូនចៅជួបជុំគ្នា និងប្រតិបត្តិអំពើល្អតាមគន្លងព្រះពុទ្ធសាសនា។

    
ឯកឧត្តមបានបន្តថា ការចូលរួមធ្វើបុណ្យ កាន់បិណ្ឌ មិនត្រឹមតែជាការប្រតិបត្តិតាមទំនៀមទម្លាប់ដែលបានបន្សល់ទុកពីដូនតាប៉ុណ្ណោះទេ ប៉ុន្តែថែមទាំងជាការបង្ហាញពីការគោរពដឹងគុណចំពោះបុព្វការីជន ការរួមចំ ណែកថែរក្សាវប្បធម៌ ប្រពៃណី និងអត្តសញ្ញាណជាតិខ្មែរ ដែលគួរត្រូវបានបន្តពីជំនាន់មួយទៅជំនាន់មួយ។

ឯកឧត្តម ជា ឆេង ក៏បានលើកឡើងថា តាមរយៈពិធីបុណ្យនេះ កូនចៅបានជួបជុំគ្រួសារ ចូលវត្តធ្វើបុណ្យ ស្តាប់ធម៌ និងប្រគេនចង្ហាន់ព្រះសង្ឃ ដែលសកម្មភាពទាំងនេះបានរួមចំណែកលើកកម្ពស់សាមគ្គីភាពក្នុងគ្រួសារ និងសហគមន៍ ព្រមទាំងផ្សារភ្ជាប់ទំនាក់ទំនងរវាងមនុស្សជំនាន់ក្រោយជាមួយមរតកវប្បធម៌របស់បុព្វបុរស។

   
បុណ្យកាន់បិណ្ឌ-ភ្ជុំបិណ្ឌ ក៏ជាឱកាសរំលឹកឱ្យខ្មែរគ្រប់រូបចេះដឹងគុណ ចេះចែករំលែក និងធ្វើអំពើល្អ។ តាមរយៈការធ្វើទាន ការរក្សាសីល និងការប្រតិបត្តិធម៌ ប្រជាពលរដ្ឋបានបង្ហាញនូវសេចក្តីជ្រះថ្លា និងបំណងប្រាថ្នាចង់ឱ្យសង្គមមានសុខសន្តិភាព សាមគ្គីភាព និងការយោគយល់គ្នា។
     
សម្រាប់ប្រជាពលរដ្ឋខ្មែរ ពិធីកាន់បិណ្ឌចាប់ពីបិណ្ឌទី១ រហូតដល់ថ្ងៃភ្ជុំបិណ្ឌ មិនត្រឹមតែជាពេលវេលាសម្រាប់ការធ្វើបុណ្យតាមជំនឿព្រះពុទ្ធសាសនាប៉ុណ្ណោះទេ ប៉ុន្តែជាវេលាដ៏មានអត្ថន័យសម្រាប់ការជួបជុំគ្រួសារ ការរំលឹកគុណបុព្វបុរស និងការថែរក្សាអត្តសញ្ញាណវប្បធម៌ខ្មែរ។
   
រដូវបុណ្យភ្ជុំបិណ្ឌឆ្នាំ២០២៦ បានចាប់ផ្តើមពី ថ្ងៃអាទិត្យ ទី២៧ ខែកញ្ញា ឆ្នាំ២០២៦ (ត្រូវនឹងថ្ងៃ ១រោច ខែភទ្របទ ដែលជាថ្ងៃកាន់បិណ្ឌ១)។ នៅក្នុងពិធីបុណ្យប្រពៃណីជាតិដ៏ធំមួយនេះរបស់ប្រទេសកម្ពុជា ដែលមានរយៈពេលសរុប ១៥ថ្ងៃ។

ការដែលឯកឧត្តម ជា ឆេង និងលោកជំទាវ ព្រមទាំងសហការី អញ្ជើញមកធ្វើបុណ្យនៅវត្តធម្មកោសលារាម (តាសល់ថ្មី) នាឱកាសនេះ ក៏បានបង្ហាញពីការចូលរួមលើកកម្ពស់ និងថែរក្សាប្រពៃណីទំនៀមទម្លាប់ដ៏ល្អរបស់ជាតិខ្មែរ ព្រមទាំងជាការបន្តនូវស្មារតីគោរពព្រះពុទ្ធសាសនា និងមរតកវប្បធម៌ដែលបុព្វបុរសបានបន្សល់ទុកសម្រាប់កូនចៅជំនាន់ក្រោយ។
ក្នុងឱកាសបុណ្យកាន់បិណ្ឌ និងភ្ជុំបិណ្ឌនេះ ឯកឧត្តម ជា ឆេង ក៏បានជូនពរប្រជាពលរដ្ឋខ្មែរគ្រប់រូប សូមមានសុខភាពល្អ សុភមង្គលក្នុងក្រុមគ្រួសារ ប្រកបការងារទទួលបានជោគជ័យ និងមានសេចក្តីសុខ សេចក្តីចម្រើនគ្រប់ប្រការ៕

ដោយ ៖ឈុនសារ៉ាត