AKP ភ្នំពេញ ថ្ងៃទី១៧ ខែកញ្ញា ឆ្នាំ២០២៦ -- លោក វ៉ាង យី (Wang Yi)រដ្ឋមន្ត្រីការបរទេសចិន បានថ្លែងនៅពេលជួបជាមួយ លោក កៅ គីមហួន (Kao Kim Hourn) អគ្គលេខាធិការអាស៊ាន កាលពីថ្ងៃអង្គារថា ប្រទេសចិនមានឆន្ទៈធ្វើការជាមួយអាស៊ាន ដើម្បីកសាងសហគមន៍ចិន-អាស៊ាន ដែលមានអនាគតរួមគ្នា និងមានភាពជិតស្និទ្ធជាងមុន។

លោក វ៉ាង ដែលជាសមាជិកការិយាល័យនយោបាយនៃគណៈកម្មាធិការមជ្ឈិមបក្សកុម្មុយនីស្តចិន បានមានប្រសាសន៍ថា ប្រទេសចិនផ្តល់សារៈសំខាន់យ៉ាងខ្លាំងដល់អាស៊ាន និងចាត់ទុកអាស៊ានជាអាទិភាពមួយនៅក្នុងគោលនយោបាយការបរទេសជាមួយប្រទេសជិតខាង។

ដោយកត់សម្គាល់ថា ឆ្នាំនេះគឺជាខួបលើកទី៥ នៃការបង្កើតភាពជាដៃគូយុទ្ធសាស្ត្រគ្រប់ជ្រុងជ្រោយចិន-អាស៊ាន និងជាខួបលើកទី៣៥ នៃទំនាក់ទំនងកិច្ចសន្ទនាចិន-អាស៊ាន លោក វ៉ាង បានលើកឡើងថា ភាគីទាំងពីរមានឱកាសថ្មីៗសម្រាប់ការអភិវឌ្ឍទំនាក់ទំនង។

លោកបានបញ្ជាក់ថា ប្រទេសចិននឹងបន្តគាំទ្រដល់ឯកភាពរបស់អាស៊ាន និងតួនាទីស្នូលរបស់អាស៊ាននៅក្នុងរចនាសម្ព័ន្ធតំបន់។

លោក វ៉ាង បានកត់សម្គាល់ថា ការរក្សាសន្តិភាព និងស្ថិរភាពនៅក្នុងសមុទ្រចិនខាងត្បូង គឺស្របទៅនឹងផលប្រយោជន៍រួមរបស់បណ្តាប្រទេសក្នុងតំបន់។ លោកបានបន្ថែមថា ប្រទេសចិនមានឆន្ទៈធ្វើការជាមួយបណ្តាប្រទេសអាស៊ាន ដើម្បីអនុវត្តសេចក្តីថ្លែងការណ៍ស្តីពីការប្រតិបត្តិរបស់ភាគីនានានៅសមុទ្រចិនខាងត្បូង (DOC) ជំរុញការពិគ្រោះយោបល់លើក្រមប្រតិបត្តិនៅសមុទ្រចិនខាងត្បូង និងរួមគ្នាលើកកម្ពស់ទស្សនៈថ្មីមួយស្តីពីសន្តិភាព ស្ថិរភាព កិច្ចសហប្រតិបត្តិការ និងមិត្តភាព។

ចំណែកឯលោក កៅ បានមានប្រសាសន៍ថា អាស៊ានមានឆន្ទៈក្នុងការចែករំលែកឱកាស និងរួមគ្នាដោះស្រាយបញ្ហាប្រឈមជាមួយប្រទេសចិន បន្តធ្វើឱ្យស៊ីជម្រៅ និងពង្រីកកិច្ចសហប្រតិបត្តិការជាក់ស្តែងលើវិស័យនានា ព្រមទាំងជំរុញទំនាក់ទំនងអាស៊ាន-ចិន ឱ្យឈានដល់កម្រិតថ្មីជាបន្តបន្ទាប់។

លោកបានបន្ថែមថា អាស៊ានត្រៀមខ្លួនរួចរាល់ក្នុងការធ្វើការជាមួយប្រទេសចិន ដើម្បីរួមគ្នាថែរក្សាសន្តិភាព និងស្ថិរភាពនៅក្នុងសមុទ្រចិនខាងត្បូង៕

ដោយ៖ មូល មិនា (ប្រភព៖ ភីបផលដេលី)