AKP ភ្នំពេញ ថ្ងៃទី២២ ខែកញ្ញា ឆ្នាំ២០២៦--អង្គការស្បៀងអាហារ និងកសិកម្មនៃអង្គការសហប្រជាជាតិ (FAO) ដោយសហការជាមួយអគ្គនាយកដ្ឋានសុខភាពសត្វ និងផលិតកម្មសត្វ កំពុងរៀបចំកម្មវិធីបណ្តុះបណ្តាលគ្រូបង្គោល ស្តីពីការវាយតម្លៃហានិភ័យបែបគុណភាព សម្រាប់ជំងឺផ្តាសាយបក្សី និងជំងឺឆ្លងពីសត្វមកមនុស្សផ្សេងទៀត ដោយមានការចូលរួមពីមន្ត្រីជំនាញថ្នាក់ជាតិមកពីវិស័យសុខភាពមនុស្ស សុខភាពសត្វ សត្វព្រៃ និងបរិស្ថាន។

ប្រភពពីអង្គការ FAO បានឱ្យដឹងនៅថ្ងៃទី២១ ខែកញ្ញា ឆ្នាំ២០២៦ថា ការបណ្តុះបណ្តាលនេះគឺជាជំហានដំបូងដ៏សំខាន់មួយនៅក្នុងស៊េរីយុទ្ធសាស្ត្រនៃសកម្មភាពដែលគាំទ្រដោយ FAO លើការវិភាគហានិភ័យនៅក្នុងប្រទេសកម្ពុជា និងនៅទូទាំងតំបន់។ វាពង្រឹងការអនុវត្តគោលការណ៍វិភាគហានិភ័យនៅក្នុងសុខភាពសត្វ និងដាក់មូលដ្ឋានគ្រឹះបច្ចេកទេសសម្រាប់ផែនទីបង្ហាញផ្លូវដ៏ទូលំទូលាយនៃអន្តរាគមន៍ពេញមួយឆ្នាំ។

ទាំងនេះរួមមានការវាយតម្លៃហានិភ័យប្រកបដោយគុណភាពសម្រាប់ជំងឺសត្វ និងជំងឺចិញ្ចឹមសត្វ ការវាយតម្លៃហានិភ័យរួម ដែលអនុវត្តន៍វិធីសាស្រ្តសុខភាពមួយដ៏ទូលំទូលាយ និងការវាយតម្លៃហានិភ័យឯកទេសសម្រាប់ជំងឺជើង និងមាត់ ដែលជាអាទិភាពបន្ទាន់បន្ទាប់ពីការរកឃើញក្នុងតំបន់ថ្មីៗនៃមេរោគ SAT 1។

តាមរយៈ «មូលនិធិជំងឺរាតត្បាត» (Pandemic Fund) ការបណ្តុះបណ្តាលនេះក៏កំពុងជួយបំពេញចន្លោះប្រហោងផ្នែកបច្ចេកទេសនៅថ្នាក់ជាតិ និងថ្នាក់ក្រោមជាតិផងដែរ ដោយការបង្កើតក្រុមអ្នកសម្របសម្រួល និងអ្នកជំនាញថ្នាក់ជាតិ ដែលមានសមត្ថភាពក្នុងការផ្តល់ការបណ្តុះបណ្តាលស្តីពីការវាយតម្លៃហានិភ័យ ព្រមទាំងផ្តល់ការគាំទ្រ និងពង្រីកវិសាលភាពនៃការបណ្តុះបណ្តាលនេះនៅទូទាំងប្រទេសកម្ពុជាប្រកបដោយនិរន្តរភាព។

ការបណ្តុះបណ្តាលធនធានអ្នកជំនាញថ្នាក់ជាតិនៅពេលនេះ គឺជាការកសាងមូលដ្ឋានគ្រឹះដ៏រឹងមាំសម្រាប់ប្រទេសកម្ពុជា ដើម្បីត្រៀមលក្ខណៈទុកជាមុនធ្វើការវាយតម្លៃ និងឆ្លើយតបទៅនឹងហានិភ័យសុខភាពថ្មីៗដែលអាចកើតមានឡើងនាពេលអនាគត៕

ដោយ ណយ នឿន (ប្រភព៖FAO)