AKP កណ្តាល ថ្ងៃទី២២ ខែកញ្ញា ឆ្នាំ២០២៦--ឯកឧត្តមបណ្ឌិតទេសរដ្ឋមន្ត្រី ថោង ខុន ប្រធានគណៈកម្មាធិការជាតិអូឡាំពិកកម្ពុជា (NOCC) បានគូសបញ្ជាក់អំពីមានមោទនភាព ដែលប្រភេទកីឡាបាល់ទាត់លើតុកម្ពុជាដណ្តើមបានមេដាយសំរឹទ្ធិ ២គ្រឿងជូនជាតិ នៅក្នុងការប្រកួតកីឡាអាស៊ី (Asian Games) លើកទី២០ នៅទីក្រុងណាកូយ៉ា ប្រទេសជប៉ុន ដែលកំពុងដំណើរការប្រកួតពីថ្ងៃទី១៩ ខែកញ្ញា ដល់ថ្ងៃទី០៤ ខែតុលា ឆ្នាំ២០២៦។

ការគូសបញ្ជាក់របស់ឯកឧត្តមបណ្ឌិតបានធ្វើឡើងនៅក្នុងឱកាសអញ្ជើញវិលត្រឡប់មកដល់មាតុប្រទេសវិញ កាលពីយប់ថ្ងៃទី២១ ខែកញ្ញា ឆ្នាំ២០២៦ នៅអាកាសយានដ្ឋានអន្តរជាតិតេជោ ខេត្តកណ្តាល រួមដំណើរដោយគ្រូបង្វឹក កីឡាករ កីឡាការិនីបាល់ទាត់លើតុកម្ពុជា ដោយទទួលបានការទទួលស្វាគមន៍យ៉ាងកក់ក្តៅពីមន្ត្រីជាច្រើនរូបមជ្ឈមណ្ឌលជាតិហ្វឹកហ្វឺនកីឡានៃក្រសួងអប់រំ យុវជន និងកីឡា និង NOCC។

ឯកឧត្តមបណ្ឌិត ថោង ខុន មានប្រសាសន៍ថា៖ «បាល់ទាត់លើតុកម្ពុជាជាប្រភេទកីឡាថ្មីមួយសម្រាប់កម្ពុជា ហើយកីឡានេះក៏មិនតិចប៉ុន្មានដែរ នៅក្នុងអាស៊ី។ ខ្ញុំសូមកោតសរសើរចៅៗ ជាគ្រូបង្វឹក កីឡាករ កីឡាការិនីបាល់ទាត់លើតុកម្ពុជាដែលអត់ធ្មត់ ខំប្រឹងណាស់ដណ្តើមជោគជ័យជូនជាតិ។ បណ្តាប្រទេសនានាមកចូលរួមប្រកួតកីឡាអាស៊ីបានសរសើរយើងថា មានវិន័យល្អ គោរពបទបញ្ញត្តិបានល្អ ដូចទៅនឹងអ្វីដែល សម្តេចតេជោ សម្តេចធិបតីបានផ្តែផ្តាំថា ឈ្នះដោយយុត្តិធម៌ ចាញ់ដោយកិត្តិយស។ ថ្វីដ្បិតតែយើងដណ្តើមបានត្រឹមមេដាយសំរឹទ្ធិក៏ពិតមែន ប៉ុន្តែជាកិត្តិយសធំធេងណាស់ ពីព្រោះប្រទេសខ្លះមិនទទួលបានមេដាយផង ស្របពេលដែលម្ចាស់ផ្ទះជប៉ុន វៀតណាមបានមេដាយសំរឹទ្ធិដូចយើងដែរ»។

ឯកឧត្តមបណ្ឌិតទេសរដ្ឋមន្ត្រី ថោង ខុន បន្ថែមថា យើងសង្ឃឹមថា ប្រភេទកីឡាបាល់ទាត់លើតុកម្ពុជានឹងកាន់តែរីកចម្រើនទៅមុខ ហើយនឹងអាចដណ្តើមបានមេដាយខ្ពស់ជាងនេះ នៅក្នុងការប្រកួតអន្តរជាតិលើកក្រោយៗទៀត។ ជាមួយគ្នានេះ ក្រសួងអប់រំ យុវជន និងកីឡាក៏បានបង្កលក្ខណៈឱ្យមានការប្រកួតជើងឯកក្នុងប្រទេសបានច្រើន។ រីឯតុ និងបាល់ក៏មានតម្លៃថ្លៃ ដូច្នេះយើងត្រូវការគាំទ្របន្ថែមពីសហព័ន្ធអន្តរជាតិ។

ប្រធាន NOCC បានគូសបញ្ជាក់ទៀតថា គ្រូបង្វឹកក៏ក្មេង កីឡាករ កីឡាការិនីបាល់ទាត់លើតុកម្ពុជាក៏ក្មេងៗ ដែលពួកគាត់មានការគោរពស្រឡាញ់គ្នាណាស់ ដោយឯកឧត្តមបណ្ឌិតបានកោតសរសើរ និងមានមោទនភាពចំពោះពួកគាត់ណាស់។ បន្ថែមពីលើនេះ ឯកឧត្តមបណ្ឌិតក៏ដាក់ក្តីសង្ឃឹមថា កីឡាបាល់ទាត់លើកម្ពុជានឹងអាចប្រជែងជោគជ័យជាថ្មីទៀត ក្នុងការប្រកួតកីឡាស៊ីហ្គេម នៅប្រទេសម៉ាឡេស៊ី នាឆ្នាំ២០២៧ផងដែរ។

គួរបញ្ជាក់ថា គិតមកដល់ពេលនេះ កម្ពុជាដណ្តើមបានមេដាយសំរឹទ្ធិ សរុប៤គ្រឿង ដោយដណ្តើមបានដោយកីឡាការិនីទាំងអស់ ក្នុងនោះដណ្តើមបានដោយប្រភេទកីឡាបាល់ទាត់លើតុ២គ្រឿង កីឡាការ៉ាតេ១គ្រឿង ដោយកីឡាការិនី វ៉ាន់ ចរិយា លើវិញ្ញាសាប្រយុទ្ធនាទីទម្ងន់ ៦១គីឡូក្រាម និងមេដាយសំរឹទ្ធិ១គ្រឿងទៀតដណ្តើមបានលើប្រភេទកីឡាគុនចម្រុះ ដោយកីឡាការិនី ចេង ដាលីន លើវិញ្ញាសា Women's Traditional-60kg៕

ដោយ ហេង ណាលីន (រូបភាព៖ យឹម សុវឌ្ឍនា)