AKP ភ្នំពេញ ថ្ងៃទី០១ ខែកញ្ញា ឆ្នាំ២០២៦--ឯកឧត្តម ហ៊ែល តូនី អនុប្រធានក្តាប់រួមអាជ្ញាធរទន្លេសាប នៅថ្ងៃទី៣១ ខែសីហា ឆ្នាំ២០២៦ បានដឹកនាំកិច្ចប្រជុំពិភាក្សាជាមួយក្រសួងស្ថាប័នពាក់ពន្ធ័ ដើម្បីរៀបចំនីតិវិធីកែសម្រួលឈ្មោះរួមបញ្ជូលគ្នា កិច្ចដំណើរការអនុវត្ត និងរចនាសម្ព័ន្ធគ្រប់គ្រង របស់អតីតសមាគមសហគមន៍ទេសចរណ៍វប្បធម៌ធម្មជាតិបឹងពារាំង និងសហគមន៍នេសាទចុងឃ្នៀស ដែលមានទីតាំងស្ថិតនៅសង្កាត់ជ្រាវ និងសង្កាត់ចុងឃ្នៀស ក្រុងសៀមរាប ខេត្តសៀមរាប។ 

ឯកឧត្តម ហ៊ែល តូនី អនុប្រធានក្តាប់រួមអាជ្ញាធរទន្លេសាប បានលើកឡើងថា កិច្ចប្រជុំនេះ មានគោលបំណងដើម្បីពិភាក្សារៀបចំអំពីកិច្ចដំណើរការអនុវត្ត និងរចនាសម្ព័ន្ធគ្រប់គ្រងឱ្យមាននិរន្តរភាព   សុខដុមនីយកម្ម ឈានទៅកសាងផែនការយុទ្ធសាស្រ្ត និងផែនការសកម្មភាព សំដៅអភិរក្ស និងអភិវឌ្ឍន៍ធនធានធម្មជាតិតំបន់ចុងឃ្នៀស និងបឹងពារាំង ឱ្យមានប្រសិទ្ធភាព ខ្ពស់ និងរួមចំណែកលើកកម្ពស់អេកូទេសចរណ៍ធម្មជាតិប្រកបដោយចីរភាព និងភាពទាក់ទាញ ។

ក្នុងកិច្ចប្រជុំនោះក៏មានការចូលរួមពីតំណាងមកពីក្រសួងមហាផ្ទៃ អភិបាលរងខេត្តសៀមរាប ក្រសួងកសិកម្ម រុក្ខាប្រមាញ់ និងនេសាទ ក្រសួងដែនដីនគរូបនីយកម្ម និងសំណង់ ក្រសួងទេសចរណ៍ ក្រសួងបរិស្ថាន ខណ្ឌរដ្ឋបាលជលផល មន្ទីរ អង្គភាពជំនាញ តំណាងអាជ្ញាធរក្រុងសៀមរាប ចៅសង្កាត់ជ្រាវ តំណាងសហគមន៍នេសាទ ចុងឃ្នៀស និងបឹងពារាំងផងដែរ៕

ដោយ៖ ណយ នឿន (ប្រភព៖ អាជ្ញាធរទន្លេសាប)