AKP បន្ទាយមានជ័យ ថ្ងៃទី៩ ខែតុលា ឆ្នាំ២០២៦--ក្នុងស្មារតីយកចិត្តទុកដាក់ និងការដឹងគុណចំពោះវីរភាពរបស់កងកម្លាំងដែលកំពុងបំពេញភារកិច្ចការពារអធិបតេយ្យភាព និងបូរណភាពទឹកដីនៅតាមបន្ទាត់ព្រំដែន ថ្នាក់ដឹកនាំខេត្តបន្ទាយមានជ័យ បាននាំយកអំណោយជាគ្រឿងឧបភោគបរិភោគ ត្រី និងសាច់ ផ្តល់ជូនដល់វរសេនាតូចកងទ័ព និងកងកម្លាំងនគរបាលដែលកំពុងឈរជើងការពារព្រំដែនក្នុងភូមិសាស្ត្រខេត្ត ក្នុងឱកាសពិធីបុណ្យភ្ជុំបិណ្ឌ។

ក្នុងឱកាសនោះ ឯកឧត្តម អ៊ុ រាត្រី អភិបាល នៃគណៈអភិបាលខេត្តបន្ទាយមានជ័យ បានលើកឡើងនូវការកោតសរសើរ និងការដឹងគុណចំពោះវីរភាពដ៏អង់អាចក្លាហានរបស់កងទ័ព និងកងកម្លាំងនគរបាល ដែលបានខិតខំបំពេញតួនាទី និងភារកិច្ចរបស់ខ្លួនយ៉ាងសកម្មក្នុងការឈរជើងការពារសន្តិសុខ សណ្តាប់ធ្នាប់ និងសុវត្ថិភាពនៅតាមបន្ទាត់ព្រំដែន ទោះបីជាត្រូវជួបប្រទះនឹងការលំបាក និងត្រូវឃ្លាតឆ្ងាយពីក្រុមគ្រួសារក្នុងឱកាសបុណ្យទានក៏ដោយ។

ឯកឧត្តមបានបញ្ជាក់ថា ការនាំយកអំណោយមកប្រគល់ជូននាពេលនេះ គឺជាការបង្ហាញពីការយកចិត្តទុកដាក់ និងការគិតគូររបស់ថ្នាក់ដឹកនាំខេត្តចំពោះសុខទុក្ខរបស់កងកម្លាំងដែលកំពុងបំពេញភារកិច្ចនៅតាមព្រំដែន ព្រមទាំងជាការចូលរួមលើកទឹកចិត្ត និងបង្ហាញពីសាមគ្គីភាពរវាងអាជ្ញាធរមូលដ្ឋាន និងកងកម្លាំងប្រដាប់អាវុធ ដែលជាកម្លាំងស្នូលក្នុងការថែរក្សាសន្តិភាព និងស្ថិរភាពនៅតាមតំបន់ព្រំដែន។

ឯកឧត្តម អ៊ុ រាត្រី បានសង្កត់ធ្ងន់លើតួនាទីដ៏សំខាន់របស់កងទ័ព និងនគរបាល ក្នុងការបំពេញបេសកកម្មការពារជាតិ និងប្រជាពលរដ្ឋ ដោយត្រូវបន្តរក្សាស្មារតីទទួលខុសត្រូវ វិន័យ សាមគ្គីភាព និងការប្រុងប្រយ័ត្នខ្ពស់ក្នុងការបំពេញភារកិច្ច សំដៅធានាឱ្យបាននូវសន្តិសុខ សុវត្ថិភាព និងភាពសុខសាន្តជូនប្រជាពលរដ្ឋដែលរស់នៅតាមបណ្តោយព្រំដែន។
ជាមួយគ្នានេះ ការផ្តល់អំណោយក្នុងឱកាសបុណ្យភ្ជុំបិណ្ឌ ក៏មានអត្ថន័យលើសពីការចែករំលែកសម្ភារៈប្រើប្រាស់ប្រចាំថ្ងៃ ព្រោះជាការផ្ញើសារនៃការគោរព ការដឹងគុណ និងការលើកទឹកចិត្តចំពោះកងកម្លាំងដែលបានលះបង់ពេលវេលា កម្លាំងកាយចិត្ត និងនៅជាប់ជាមួយភារកិច្ចការពារព្រំដែន ខណៈប្រជាពលរដ្ឋទូទៅកំពុងជួបជុំក្រុមគ្រួសារ និងប្រារព្ធពិធីបុណ្យប្រពៃណីជាតិ។

ពិធីនាំយកអំណោយនេះបានប្រព្រឹត្តទៅនៅថ្ងៃទី៩ ខែតុលា ឆ្នាំ២០២៦ ដោយមានឯកឧត្តម ប្លែក វ៉ារី ប្រធានក្រុមប្រឹក្សាខេត្តបន្ទាយមានជ័យ ឯកឧត្តម អ៊ុ រាត្រី អភិបាលខេត្ត និងលោកជំទាវ ជ័យ ណារី អ៊ុ រាត្រី ព្រមទាំងឯកឧត្តម លោកជំទាវ សមាជិកក្រុមប្រឹក្សាខេត្ត និងក្រុមការងារ ចូលរួមនាំយកគ្រឿងឧបភោគបរិភោគ ត្រី និងសាច់ ទៅប្រគល់ជូនកងកម្លាំងដែលកំពុងឈរជើងនៅតាមបន្ទាត់ព្រំដែនក្នុងភូមិសាស្ត្រខេត្តបន្ទាយមានជ័យ។

សកម្មភាពនេះបានឆ្លុះបញ្ចាំងពីការយកចិត្តទុកដាក់របស់ថ្នាក់ដឹកនាំខេត្ត ចំពោះកងកម្លាំងជួរមុខ និងជាការរួមចំណែកពង្រឹងចំណងសាមគ្គីភាព ការគាំទ្រ និងការលើកទឹកចិត្តឱ្យកងកម្លាំងបន្តបំពេញភារកិច្ចការពារជាតិមាតុភូមិដោយភាពរឹងមាំ និងការទទួលខុសត្រូវខ្ពស់។

ក្នុងឱកាសបុណ្យភ្ជុំបិណ្ឌ ដែលជាពិធីបុណ្យប្រពៃណីដ៏សំខាន់របស់ប្រជាជនកម្ពុជា ការចែករំលែកអំណោយដល់កងកម្លាំងការពារព្រំដែន ក៏ជាការបង្ហាញពីស្មារតីខ្មែររួមគ្នា ការគោរពចំពោះអ្នកបំពេញភារកិច្ចការពារជាតិ និងការរួមចំណែករក្សាសុខសន្តិភាព ស្ថិរភាព និងសុវត្ថិភាពជូនប្រជាពលរដ្ឋនៅតាមតំបន់ព្រំដែនផងដែរ៕

ដោយ ឈុន សារ៉ាត