AKP ភ្នំពេញ ថ្ងៃទី៦ ខែតុលា ឆ្នាំ២០២៦--
ឯកឧត្តម មាន សទិ សមាជិក គ.ជ.ប បានធ្វើការអំពាវនាវដល់ប្រជាពលរដ្ឋ ឱ្យទៅពិនិត្យបញ្ជីឈ្មោះ និងចុះឈ្មោះបោះឆ្នោត ដែលមានរយៈពេល ៥៥ថ្ងៃ ដោយចាប់ផ្ដើមពីថ្ងៃទី៧ ខែតុលា រហូតដល់ថ្ងៃទី៣០ ខែវិច្ឆិកា ឆ្នាំ២០២៦។
ថ្លែងក្នុងកិច្ចប្រជុំជាមួយភាគីពាក់ព័ន្ធ នាព្រឹកថ្ងៃទី៦ ខែតុលា ឆ្នាំ២០២៦ ឯកឧត្តម មាន សទិ បានបញ្ជាក់ថា ក្រុមចុះឈ្មោះបោះឆ្នោតធ្វើការជារៀងរាល់ថ្ងៃ រួមទាំងថ្ងៃសៅរ៍ និងថ្ងៃអាទិត្យ នៅតាមសាលាឃុំ សង្កាត់ និងទីតាំងមួយចំនួនក្នុងឃុំ សង្កាត់។ ម៉ោងធ្វើការព្រឹកចាប់ពីម៉ោង ៧:០០ ដល់ម៉ោង ១១:៣០នាទីថ្ងៃត្រង់ និង ពេលរសៀលចាប់ពីម៉ោង ២:០០ ដល់ម៉ោង ៥:៣០នាទីល្ងាច។ ក្នុងករណីមានអ្នកសុំចុះឈ្មោះបោះ ឆ្នោតបន្ត ក្រុមប្រឹក្សាឃុំ សង្កាត់ (កបឃ.ស) និងក្រុមចុះឈ្មោះបោះឆ្នោត (ក.ច.ប) អាចបន្ថែមម៉ោងពេលនៃការ ចុះឈ្មោះបោះឆ្នោតតាមការជាក់ស្តែង។ ឯកឧត្តម បានមានប្រសាសន៍អំពីនីតិវិធីចុះឈ្មោះបោះឆ្នោតនៅឃុំ សង្កាត់ និងការបញ្ជូនទិន្នន័យមក គ.ជ.ប ថាប្រជាពលរដ្ឋខ្មែររស់នៅក្នុងឃុំ សង្កាត់ ដែលមានអាយុ ១៨ឆ្នាំឡើង គិតដល់ថ្ងៃបោះឆ្នោតនៅថ្ងៃទី៦ ខែមិថុនា ឆ្នាំ២០២៧ (កើតមុន ឬត្រឹមថ្ងៃទី៧ ខែមិថុនា ឆ្នាំ២០០៩) អ្នកដែលមិនទាន់បានចុះឈ្មោះបោះឆ្នោតពីមុនមក ឬបានផ្លាស់លំនៅឋាន ឬទីសំណាក់ចូលក្នុងប សង្កាត់ថ្មី ត្រូវអញ្ជើញមកសុំចុះឈ្មោះបោះឆ្នោត។ ដើម្បីចុះឈ្មោះបោះឆ្នោត ប្រជាពលរដ្ឋខ្មែរត្រូវទៅជូប ដោយផ្ទាល់ជាមួយក្រុមចុះឈ្មោះបោះឆ្នោត ដោយយកអត្តសញ្ញាណបណ្ណសញ្ជាតិខ្មែរ (អ.ខ) ទៅបង្ហាញ ដល់ប្រធានក្រុមចុះឈ្មោះបោះឆ្នោត។

ឯកឧត្តម បានបញ្ជាក់ទៀតថា ប្រសិនបើ អាស័យដ្ឋានក្នុង អ.ខ ស្ថិតនៅ ក្នុងឃុំ សង្កាត់ដែលប្រជាពលរដ្ឋកំពុងរស់នៅ និងសុំចុះឈ្មោះ នោះក្រុមចុះ ចុះឈ្មោះបោះឆ្នោតនឹងរៀបចំ ចុះឈ្មោះជូនតាមនីតិវិធីរបស់ គ.ជ.ប។ ប៉ុន្តែប្រសិនបើអាសយដ្ឋានក្នុង អ.ខ ខុសពីឃុំ សង្កាត់ដែល ប្រជាពលរដ្ឋសុំចុះឈ្មោះ នោះប្រជាពលរដ្ឋត្រូវយកបន្ថែមនូវសៀវភៅគ្រួសារ ឬសៀវភៅស្នាក់នៅ ឬ លិខិតបញ្ជាក់ទីលំនៅក្នុងឃុំ សង្កាត់ដែលស្នើសុំចុះឈ្មោះ។ ចំពោះការធ្វើលិខិតបញ្ជាក់ទីលំនៅត្រូវធ្វើ នៅឃុំ សង្កាត់ទៅតាមប្រកាសរបស់ក្រសួងមហាផ្ទៃ។ អំពីការកែតម្រូវទិន្នន័យជីវប្រវត្តិ ឬទិន្នន័យជីវមាត្រ ឯកឧត្តម បានបញ្ជាក់ជូនថា ការធ្វើបច្ចុប្បន្នភាព ទិន្នន័យជីវមាត្រ (ថតរូប និងផ្តិតម្រាមដៃ) ត្រូវបានអនុវត្ត សម្រាប់អ្នកមានឈ្មោះក្នុងបញ្ជីបោះឆ្នោត ដែលមិនធ្លាប់បានធ្វើបច្ចុប្បន្នភាពក្នុងរយៈពេលយ៉ាងតិច ១០ឆ្នាំ (ចុះឈ្មោះបោះឆ្នោតក្នុងឆ្នាំ២០១៦ និង ឆ្នាំ២០១៧) និងប្រជាពលរដ្ឋដែលរងផលប៉ះពាល់ដោយការឈ្លានពានរបស់ប្រទេសថៃ អាចចុះឈ្មោះ នៅកន្លែងស្នាក់នៅបណ្តោះអាសន្ន ឬកន្លែងចាស់។ បើនៅកន្លែងថ្មីអាជ្ញាធរនឹងជួយដោះស្រាយបញ្ហាជូន៕

ដោយ៖ ជឹម ណារី