AKP ភ្នំពេញ ថ្ងៃទី០៦ ខែតុលា ឆ្នាំ២០២៦ -- ក្រុមហ៊ូធី (Houthi) របស់ប្រទេសយេម៉ែនបាននិយាយកាលពីថ្ងៃអាទិត្យថា ប្រទេសអារ៉ាប៊ីសាអូឌីតបានបើកការវាយប្រហារតាមផ្លូវអាកាស និងការបាញ់មីស៊ីលចំនួន១០៦លើកទៅលើតំបន់ដែលគ្រប់គ្រងដោយក្រុមហ៊ូធីក្នុងរយៈពេល២៤ម៉ោងកន្លងមកនេះ ខណៈដែលរដ្ឋាភិបាលដែលទទួលស្គាល់ដោយអន្តរជាតិបានប្រកាសពីយុទ្ធនាការយោធាថ្មីមួយដើម្បីដណ្តើមយកទឹកដីមកវិញពីក្រុមនេះ នៅចំពេលដែលមានការកើនឡើងនៃជម្លោះនៅក្នុងប្រទេស។

លោក យ៉ាហ៍យ៉ា សារៀ (Yahya Sarea) អ្នកនាំពាក្យយោធារបស់ក្រុមហ៊ូធី បាននិយាយនៅលើបណ្តាញសង្គមអ៊ិចថា ការវាយប្រហាររបស់ប្រទេសអារ៉ាប៊ីសាអូឌីតបានវាយប្រហារទៅលើរដ្ឋធានីសាណាអា និងខេត្តនានា រួមទាំងខេត្តអាល់ ចាហ្វ និងខេត្តតៃហ្ស ផងដែរ។

លោក សារៀ បាននិយាយថា ការវាយប្រហារចុងក្រោយនេះបានធ្វើឱ្យចំនួននៃការវាយប្រហារតាមផ្លូវអាកាស និងការបាញ់មីស៊ីលរបស់ប្រទេសអារ៉ាប៊ីសាអូឌីត ចាប់តាំងពីការកើនឡើងនៃជម្លោះបច្ចុប្បន្នបានចាប់ផ្តើមមកមានចំនួនសរុប ១.៥១៦លើក។

តួលេខទាំងនេះមិនអាចត្រូវបានផ្ទៀងផ្ទាត់ដោយឯករាជ្យបានទេហើយប្រទេសអារ៉ាប៊ីសាអូឌីតមិនបានបញ្ជាក់ថាខ្លួនបានធ្វើការវាយប្រហារដូចដែលក្រុមហ៊ូធីបានរាយការណ៍នោះទេ។

សេចក្តីថ្លែងការណ៍របស់ក្រុមហ៊ូធីបានចេញផ្សាយប៉ុន្មានម៉ោងបន្ទាប់ពីរដ្ឋាភិបាលយេម៉ែនបានប្រកាសពីការចាប់ផ្តើមនៃអ្វីដែលខ្លួនហៅថា«សមរភូមិរំដោះ» ដែលជាការចាប់ផ្តើមដំណាក់កាលថ្មីមួយនៅក្នុងយុទ្ធនាការរបស់ខ្លួនដើម្បីដណ្តើមយកទឹកដីដែលគ្រប់គ្រងដោយក្រុមហ៊ូធីមកវិញ។

ការវិវត្តទាំងនេះបានកើតឡើងនៅពេលដែលជម្លោះនៅប្រទេសយេម៉ែនបានឈានចូលដល់ដំណាក់កាលនៃការកើនឡើងយ៉ាងខ្លាំងបំផុតមួយក្នុងរយៈពេលប៉ុន្មានឆ្នាំចុងក្រោយនេះ ដោយមានការប្រយុទ្ធគ្នាយ៉ាងខ្លាំងក្លាបានរីករាលដាលពាសពេញភាគនិរតីនៃប្រទេសយេម៉ែន ហើយការវាយប្រហារដោយមីស៊ីល យន្តហោះគ្មានមនុស្សបើក (drone) និងការវាយប្រហារតាមផ្លូវអាកាសជាថ្មី បានធ្វើឱ្យមានការប៉ះទង្គិចគ្នាដោយផ្ទាល់ឡើងវិញរវាងក្រុមហ៊ូធី និងប្រទេសអារ៉ាប៊ីសាអូឌីត៕

ដោយ៖ មូល មិនា (ប្រភព៖ ភីបផលដេលី)