AKP បន្ទាយមានជ័យ ថ្ងៃទី០៣ ខែតុលា ឆ្នាំ២០២៦ ---         
ឯកឧត្តម កែ គឹមយ៉ាន ឧត្តមប្រឹក្សាផ្ទាល់ព្រះមហាក្សត្រ និងជាតំណាងរាស្ត្រមណ្ឌលខេត្តបន្ទាយមានជ័យ និងលោកជំទាវ ឧកញ៉ា សិរីករុណាបទុមរតន៍ អគ្គមហាឧបាសិកាពុទ្ធសាសនូ បត្ថម្ភក៍ បណ្ឌិត ម៉ៅ ម៉ាល័យ ព្រមទាំងលោកជំទាវ សិរីកញ្ចនពង្សធីមុត្តរា អគ្គមហាឧបាសិកាពុទ្ធសាសនូបត្ថម្ភក៍ កែ សួនសុភី សុខា និងប្រតិភូអមដំណើរ បានអញ្ជើញចុះសួរសុខទុក្ខ និងនាំយកស្បៀងឧបភោគបរិភោគចែកជូនប្រជាពលរដ្ឋចំនួន ៥៨៧គ្រួសារ ដែលកំពុងស្នាក់នៅទីទួលសុវត្ថិភាព ដោយ សាររងផលប៉ះពាល់ធ្ងន់ធ្ងរពីគ្រោះទឹកជំនន់ នៅក្រុងសិរីសោភ័ណ ខេត្តបន្ទាយមានជ័យ។

ការសួរសុខទុក្ខ និងចែកអំណោយនេះ បានធ្វើឡើងនៅរសៀលថ្ងៃទី០២ ខែតុលា ឆ្នាំ២០២៦ ក្នុងបរិវេណមហាសាល ស្ថិតនៅភូមិក្បាលស្ពាន សង្កាត់ព្រះពន្លា ក្រុងសិរីសោភ័ណ ដោយមានការអញ្ជើញចូលរួមពីឯកឧ ត្តម ប្លែក វ៉ារី ប្រធានក្រុមប្រឹក្សាខេត្ត ឯកឧត្តម អ៊ុ រាត្រី អភិបាលខេត្តបន្ទាយមានជ័យ លោក ស្រេង សុផល អភិបាលក្រុងសិរីសោភ័ណ ព្រមទាំងមន្ត្រីរាជការ កងកម្លាំងប្រដាប់អាវុធគ្រប់ប្រភេទ និងអាជ្ញាធរមូលដ្ឋានគ្រប់លំដាប់ ថ្នាក់។

ក្នុងឱកាសនោះ ឯកឧត្តម កែ គឹមយ៉ាន និងលោកជំទាវ បានសំណេះសំណាល សួរសុខទុក្ខ និងផ្តល់កម្លាំងចិត្តដល់ប្រជាពលរដ្ឋដែលកំពុងប្រឈមនឹងការលំបាកដោយសារគ្រោះធម្មជាតិ ព្រម ទាំងនាំយកស្បៀងឧបភោគបរិភោគចែកជូនប្រជាពលរដ្ឋទាំង ៥៨៧គ្រួសារ ដើម្បីចូលរួមសម្រាលការលំបាកក្នុងជីវភាពប្រចាំថ្ងៃ ក្នុងអំឡុងពេលដែលពួកគាត់ត្រូវបន្តស្នាក់នៅទីទួលសុវត្ថិ ភាព។

ឯកឧត្តម កែ គឹមយ៉ាន បានលើកទឹកចិត្តដល់ប្រជាពលរដ្ឋឱ្យបន្តមានការប្រុង ប្រយ័ត្នខ្ពស់ និងយកចិត្តទុកដាក់ចំពោះសុវត្ថិភាពរបស់ខ្លួន និងក្រុមគ្រួសារ ជាពិសេសក្នុងអំឡុងពេលដែលស្ថានភាពទឹកជំនន់នៅតែបន្តបង្កផលប៉ះពាល់នៅតាមតំបន់មួយចំនួន។ ប្រជាពលរដ្ឋត្រូវចូលរួមសហការជាមួយអាជ្ញាធរ និងកងកម្លាំងសមត្ថកិច្ច ក្នុងការអនុវត្តវិធានការសុវត្ថិភាព និងការជម្លៀសទៅកាន់ទីតាំងដែលមានសុវត្ថិភាពនៅពេលមានការណែនាំ។

ការនាំយកស្បៀងមកចែកជូននាពេលនេះ មិនត្រឹមតែជាការរួមចំណែកដោះស្រាយតម្រូវការចាំបាច់ប្រចាំថ្ងៃរបស់ប្រជាពលរដ្ឋដែលកំពុងស្នាក់នៅទីទួលសុវត្ថិភាពប៉ុណ្ណោះទេ ប៉ុន្តែថែមទាំងជាការបង្ហាញពីការយកចិត្តទុកដាក់ចំពោះប្រជាពលរដ្ឋនៅគ្រប់កាលៈទេសៈ ជាពិសេសនៅពេលជួបប្រទះគ្រោះមហន្តរាយធម្មជាតិ ដែលទាមទារឱ្យមានការចូលរួម និងសាមគ្គី ភាពពីគ្រប់ភាគី ដើម្បីជួយសង្គ្រោះ និងសម្រាលការលំបាកជូនប្រជាពលរដ្ឋ។

ជាមួយគ្នានេះ អាជ្ញាធរខេត្តបន្ទាយមាន ជ័យ កងកម្លាំងប្រដាប់អាវុធគ្រប់ប្រភេទ និងមន្ត្រីពាក់ព័ន្ធ បានបន្តសហការគ្នាយ៉ាងសកម្មក្នុងការជម្លៀសប្រជាពលរដ្ឋចេញពីតំបន់ដែលមានហានិភ័យទៅកាន់ទីទួលសុវត្ថិភាព រៀបចំទីតាំងស្នាក់នៅ និងផ្គត់ផ្គង់តម្រូវការចាំបាច់នានា ដើម្បីធានាសុវត្ថិភាព និងសុខុមាលភាពរបស់ប្រជាពលរដ្ឋរងគ្រោះ។

តាមរបាយការណ៍ផលប៉ះពាល់ និងការខូចខាតដោយសារគ្រោះទឹកជំនន់របស់គណៈកម្មាធិការគ្រប់គ្រងគ្រោះមហន្តរាយខេត្តបន្ទាយមានជ័យ គិតត្រឹមថ្ងៃទី០២ ខែតុលា ឆ្នាំ២០២៦ ទូទាំងខេត្ត មានប្រជាពលរដ្ឋត្រូវបានជម្លៀសទៅកាន់ទីទួលសុវត្ថិភាពសរុបចំនួន ៣,២៤២គ្រួសារ ខណៈផ្លូវចំនួន ៥០២កន្លែង ស្មើនឹងប្រវែងប្រមាណ ២៩៤,២៥០ម៉ែត្រ បានទទួលរងផលប៉ះពាល់ដោយសារទឹកជំនន់។

ក្នុងចំណោមតំបន់ដែលទទួលរងផលប៉ះពាល់ ក្រុងប៉ោយប៉ែតមានប្រជាព លរដ្ឋជម្លៀសទៅទីទួលសុវត្ថិភាពចំនួន ១,៥៦៤គ្រួសារ ក្រុងសិរីសោភ័ណ ៧៧១គ្រួសារ ស្រុកមង្គលបូរី ៨៥៦គ្រួ សារ ស្រុកអូរជ្រៅ ៣៣គ្រួសារ និងស្រុកភ្នំស្រុក ១៨គ្រួសារ។

ជាមួយនឹងផលប៉ះពាល់លើលំនៅឋាន និងហេដ្ឋារចនាសម្ព័ន្ធ ទឹកជំនន់ក៏បានបង្កផលប៉ះពាល់យ៉ាងគួរឱ្យកត់សម្គាល់ដល់វិស័យកសិកម្ម ដែលជាប្រភពចំណូលដ៏សំខាន់របស់ប្រជាពលរដ្ឋនៅតាមជនបទ។ តាមរបាយការណ៍ដដែល ដំណាំស្រូវរងផលប៉ះពាល់សរុបប្រមាណ ២៧,០០០ហិកតា ដំឡូងមី ១៥៦ហិកតា និងដំណាំរួមផ្សំ ១០ហិកតា ខណៈដំណាំស្រូវដែលរងការខូចខាតមានចំនួន ៤៣៤ហិកតា។

ស្ថានភាពនេះបានបង្ហាញថា គ្រោះទឹកជំនន់មិនត្រឹមតែប៉ះពាល់ដល់ការរស់នៅប្រចាំថ្ងៃរបស់ប្រជាពលរដ្ឋប៉ុណ្ណោះទេ ប៉ុន្តែថែមទាំងជះឥទ្ធិពលដល់ហេដ្ឋារចនាសម្ព័ន្ធ ការធ្វើដំណើរ និងផលិតកម្មកសិកម្ម ដែលជីវភាពរបស់ប្រជាពលរដ្ឋមួយចំនួនពឹងផ្អែកជាចម្បង។ ក្នុងស្ថានភាពនេះ ការចុះសួរសុខទុក្ខ ការជួយសង្គ្រោះបន្ទាន់ និងការផ្គត់ផ្គង់ស្បៀងជូនប្រជាពលរដ្ឋរងគ្រោះ បានក្លាយជាផ្នែកសំខាន់មួយនៃកិច្ចខិតខំប្រឹងប្រែងរួម ដើម្បីសម្រាលការលំបាក និងរក្សាសុវត្ថិភាពជូនប្រជាពលរដ្ឋ រហូតដល់ស្ថានភាពទឹកមានភាពប្រសើរឡើង៕
ដោយ ៖ឈុនសារ៉ាត