AKP ភ្នំពេញ ថ្ងៃទី១ ខែតុលា ឆ្នាំ២០២៦--

ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ រួមជាមួយឯកឧត្តមជាថ្នាក់ដឹកនាំ បានដឹកនាំមន្ដ្រីបច្ចេកទេសក្រសួង និងមន្ទីរអភិវឌ្ឍន៍ជនបទខេត្តបាត់ដំបង ព្រមទាំងអភិបាលស្រុកសង្កែ និងស្រុកកោះក្រឡអញ្ជើញចុះពិនិត្យជាក់ស្ដែងហេដ្ឋារចនាសម្ព័ន្ធផ្លូវជនបទចំនួន៣ខ្សែ ដែលបានរងផលប៉ះពាល់ដោយសារទឹកជំនន់ទឹកភ្លៀង ស្ថិតនៅក្នុងខេត្តបាត់ដំបង នារសៀលថ្ងៃព្រហស្បតិ៍ ទី១ ខែតុលា ឆ្នាំ២០២៦។

ផ្លូវទាំង៣ខ្សែនេះរួមមាន៖ ខ្សែទី១. ឈ្មោះផ្លូវបោះពោធិ៍ - សំរោងកោងទួលល្វៀង ជាផ្លូវក្រាលកៅស៊ូពីរជាន់ (DBST) ៩,៦០គ.ម. ចាប់ផ្ដើមពីពីភូមិបោះពោធិ៍ ទៅដល់ភូមិអូរស្រឡៅ ឃុំអូរដំបង១ ស្រុកសង្កែ។ ខ្សែផ្លូវនេះត្រូវបានទឹកជន់លិចអស់ប្រវែង ៨គ.ម. ដោយត្រូវបានទឹកហូរច្រោះ បាក់តាមជើងទេរ និងកន្លែងផ្សេងទៀតត្រូវទឹកហូរកាត់តួផ្លូវ ដែលបណ្ដាលឱ្យផ្អាកការធ្វើចរាចរណ៍រថយន្ដជាបណ្តោះអាសន្ន។ ខ្សែផ្លូវទី២. ឈ្មោះផ្លូវដំបូកខ្ពស់-វត្តកណ្ដាល ជាផ្លូវក្រាលកៅស៊ូពីរជាន់ (DBST) មានប្រវែងសរុប ១៤,៦២គ.ម. ទទឹង ៦ម៉ែត្រ តភ្ជាប់ពីផ្លូវជាតិលេខ៥ ត្រង់ចំណុចភូមិដំបូកខ្ពស់ ឃុំរាំងកេសី ទៅដល់វត្តកណ្ដាល ឃុំអូរដំបង២ ស្រុកសង្កែ ដែលបានបញ្ចប់ការសាងសង់កាលពីខែសីហា ឆ្នាំ២០២៥។ ខ្សែផ្លូវនេះ ត្រូវបានទឹកជន់លិចអស់ប្រវែងប្រហែល ៣គ.ម. ដោយត្រូវបានទឹកហូរច្រោះ បាក់តាមជើងទេរជាច្រើនកន្លែង និងមានការហូរកាត់តួផ្លូវ ១កន្លែងផងដែរ ដែលបណ្ដាលឱ្យមានការផ្អាកធ្វើចរាចរណ៍រថយន្ដជាបណ្តោះអាសន្ន។ ខ្សែផ្លូវទី៣. ឈ្មោះផ្លូវ រ៉ា - ស្ពាន ជាផ្លូវក្រាលកៅស៊ូពីរជាន់ (DBST) ដែលទើបស្ថាបនាក្នុងឆ្នាំ២០២៥ ប្រវែង ១៤,១០គ.ម. ទទឹងប្រវែង ៧ម៉ែត្រ តភ្ជាប់ពីភូមិរ៉ា ឃុំធិបតី ទៅដល់ភូមិស្ពាន ឃុំគាស់ក្រឡ ស្រុកគាស់ក្រឡ ដែលបានបញ្ចប់ការសាងសង់កាលពីខែសីហា ឆ្នាំ២០២៥។ ខ្សែផ្លូវនេះត្រូវបានទឹកជន់លិចអស់ប្រវែងប្រហែល ៦,០០គ.ម. ដោយត្រូវបានទឹកហូរច្រោះ បាក់តាមជើងទេរដោយកន្លែង និងមានការហូរកាត់តួផ្លូវ ២កន្លែង មានប្រវែងសរុបប្រហែល ៧ម៉ែត្រ ដែលបណ្ដាលឱ្យផ្អាកការធ្វើចរាចរណ៍រថយន្ដជាបណ្តោះអាសន្ន។

ឯកឧត្តមរដ្ឋមន្ត្រីបានណែនាំដល់អគ្គនាយកដ្ឋានបច្ចេកទេសរបស់ក្រសួង និងមន្ទីរអភិវឌ្ឍន៍ជនបទខេត្តបាត់ដំបង សហការជាមួយអាជ្ញាធរមូលដ្ឋានស្រុក និងឃុំធ្វើការដោះស្រាយសម្រួលចរាចរណ៍ធ្វើដំណើររបស់ប្រជាពលរដ្ឋដោយរៀបចំធ្វើផ្លូវវាង ឬស្ពានឈើបណ្តោះអាសន្ន ស្រង់ទិន្នន័យវាយតម្លៃផលប៉ះពាល់ និងត្រូវពិនិត្យលទ្ធភាពបច្ចេកទេស ដើម្បីធ្វើការជួសជុល និងស្ដារលើកម្រិតគុណភាពផ្លូវនេះឡើងវិញនៅពេលទឹកស្រក ក្នុងស្មារតីបង្ការហានិភ័យនៅថ្ងៃអនាគត៕

ដោយ៖ ពេជ្រ សំអឿន (ប្រភព៖ ក្រសួងអភិវឌ្ឍន៍ជនបទ)