AKPតាកែវថ្ងៃទី២៩ ខែកញ្ញាឆ្នាំ២០២៦–  ឯកឧត្ដម បណ្ឌិត ស៊ូ ភិរិន្ទ អនុប្រធាន ក្រុម ការងារ រាជរដ្ឋាភិបាលចុះមូល ដ្ឋាន ខេត្ត តាកែវ និង ជា ប្រធាន ក្រុម ការងារ រាជរដ្ឋាភិបាលចុះមូល ដ្ឋាន ស្រុក បូរីជលសារ បានដឹកនាំក្រុមការងារ និងអាជ្ញាធរមូលដ្ឋាន ចុះពិនិត្យមើលផលប៉ះពាល់ដោយសារទឹកជំនន់ និងផ្តល់អំណោយជាថវិកាមួយចំនួន  ជូនដល់ប្រជាពលរដ្ឋ ដែលរងផលប៉ះពាល់ ដោយសារជំនន់ទឹកភ្លៀង។

បន្ទាប់ពីមានភ្លៀងធ្លាក់ខ្លាំងច្រើនថ្ងៃជាបន្តបន្ទាប់ បានបង្កជាជំនន់ទឹកភ្លៀងហូរជន់លិច ធ្វើឱ្យប៉ះពាល់ដល់ផ្ទះប្រជាពលរដ្ឋ ហេដ្ឋរចនាសម្ព័ន្ធ និងដំណាំកសិកម្ម របស់ប្រជាពលរដ្ឋ។ការចុះពិនិត្យនេះធ្វើឡើងនៅឃុំបូរីជលសារស្រុកបូរីជលសារខេត្តតាកែវ កាលពីរសៀលថ្ងៃច័ន្ទ២រោចខែភទ្របទឆ្នាំមមីអដ្ឋស័កព.ស២៥៧០ ត្រូវនឹងថ្ងៃទី២៨ ខែកញ្ញា ឆ្នាំ២០២៦។

មានប្រសាសន៍ទៅកាន់ប្រជាពលរដ្ឋរងគ្រោះដោយទឹកជំនន់ក្នុងពេលនោះ ឯកឧត្ដម បណ្ឌិត ស៊ូ ភិរិន្ទ សមាជិក គណៈ កម្មាធិការ កណ្ដាល គណបក្ស ប្រជាជន កម្ពុជា អនុប្រធាន ក្រុម ការងាររាជរដ្ឋាបាលចុះមូល ដ្ឋាន ខេត្ត តាកែវ និង ជា ប្រធាន ក្រុម ការងារ រាជរដ្ឋាភិបាលចុះមូល ដ្ឋាន ស្រុក បូរីជលសារ   បាននាំមកនូវប្រសាសន៍ផ្ដាំផ្ញើសួរសុខទុក្ខ និងក្ដីនឹករលឹកអាណិតអាសូរក្រៃលែង ពីសំណាក់សម្ដេចតេជោ ហ៊ុន សែន និង សម្តេចធិបតី ហ៊ុន ម៉ាណែត ដែលសម្ដេចតែងតែគិតគូរអំពីសុខទុក្ខប្រជាពលរដ្ឋគ្រប់ពេលវេលា។បើទោះបីជាសម្ដេច មិនបានអញ្ជើញជួបសំណេះសំណាលដោយផ្ទាល់ក្ដី ក៏ប៉ុន្តែសម្ដេចបានធ្វើការណែនាំដល់រដ្ឋបាលខេត្ត ក្នុងការចុះពិនិត្យ និងជួយដោះស្រាយជូនប្រជាពលរដ្ឋ ដែលកំពុងជួបប្រទះបញ្ហានានា ដូចជាគ្រោះទឹកជំនន់ជាដើម។ដើម្បីធ្វើការចែកជូនអំណោយ ដល់ប្រជាពលរដ្ឋដែលរងគ្រោះ ឱ្យបានទាន់ពេលវេលា ដោយមិនមានការរើសអើងវណ្ណៈ ជាតិសាសន៍ សាសនា ពណ៌សម្បុរ ឬនិន្នាការនយោបាយអ្វីឡើយ។

 ឯកឧត្ដម បណ្ឌិត ស៊ូ ភិរិន្ទ បានប្រសាសន៍លើកឡើងថា បញ្ហាគ្រោះមហន្តរាយដោយធម្មជាតិ គឺយើងមិនអាចដឹងមុនបានឡើយ កត្តាសំខាន់គឺរាជរដ្ឋាភិបាល ក៏ដូចជាអាជ្ញាធរមានសមត្ថកិច្ចគ្រប់លំដាប់ថ្នាក់ និងប្រជាពលរដ្ឋទាំងអស់ ត្រូវតែចូលរួម តាមរយៈយន្តការនិងវិធានការនានា ដើម្បីបង្ការ ទប់ស្កាត់ ដោះស្រាយ និងសង្គ្រោះ អាយុជីវិតមនុស្ស ឱ្យបានទាន់ពេលវេលា និងមានប្រសិទ្ធភាពខ្ពស់។

ឯកឧត្តមបណ្ឌិត ស៊ូ ភិរិន្ទ ក៏បានថ្លែងការកោតសរសើរ ចំពោះមន្ត្រីរាជការ កងកម្លាំងប្រដាប់អាវុធ និងអាជ្ញាធរមានសមត្ថកិច្ចទាំងអស់ ដែលបានរួមសហការគ្នា ត្រៀមបង្ការ និងជួយសង្គ្រោះប្រជាពលរដ្ឋបានទាន់ពេលវេលា។ហើយព្រមទាំងបានយកចិត្តទុកដាក់ខ្ពស់ ក្នុងការតាមដានគោលដៅប្រឈមនានា ហើយបើមានបញ្ហាគ្រោះទឹកជំនន់ប្រញាប់ជន្លៀស ប្រជាពលរដ្ឋមកកាន់ទីទួលសុវត្ថិភាព និងរាយការណ៍ជូនដល់ថ្នាក់ដឹកនាំ ឬអាជ្ញាធរមានសមត្ថកិច្ចដែលនៅជិត។

ដើម្បីជួយអន្តរាគមន៍និងសង្គ្រោះឱ្យបានទាន់ពេលវេលា ដោយមិនត្រូវទុកឱ្យប្រជាជនណាម្នាក់ រងគ្រោះដោយមិនបានជួយនោះឡើយ។

ឯកឧត្ដម បណ្ឌិត ក៏បានមានប្រសាសន៍ផ្តាំផ្ញើដល់បងប្អូនប្រជាពលរដ្ឋ ដែលរស់នៅតាមដងស្ទឹង និងផ្នែកខាងក្រោម សូមមានការប្រុងប្រយ័ត្នខ្ពស់ នៅពេលដែលមានភ្លៀងធ្លាក់ច្រើនថ្ងៃជាប់គ្នា ហើយបើមានបញ្ហាអ្វីកើតឡើង ត្រូវរាយការណ៍មកកាន់អាជ្ញាធរមូលដ្ឋានឱ្យបានឆាប់រហ័ស។ជាពិសេសត្រូវមានការប្រុងប្រយ័ត្នខ្ពស់ ចំពោះសត្វអាសិរពិសផ្សេងៗ និងត្រូវប្រុងប្រយ័ត្នកូនចៅតូចៗ ចៀសវាងលង់ទឹកជាយថហេតុ។

ព្រមទាំងត្រូវយកចិត្តទុកដាក់ទៅលើបញ្ហាសុខភាព ដោយត្រូវរក្សាអនាម័យក្នុងការរស់នៅជាប្រចាំដូចជា លាងដៃនឹងសាប៊ូ ហូបទឹកឆ្អិន និងដេកក្នុងមុងជានិច្ច។ដើម្បីជៀសវាងការកើតមានជំងឺតម្កាត់ផ្សេងៗ ហើយបើមានបញ្ហាសុខភាព សូមប្រញ៉ាប់ប្រញាល់ទៅកាន់មណ្ឌលសុខភាព ឬមន្ទីរពេទ្យដែលនៅជិតបំផុត ដើម្បីទទួលការព្យាបាលបានទាន់ពេលវេលា៕

ដោយ៖ អ៊ុច សៀង