AKPកំពង់ធំថ្ងៃទី២៩ខែកញ្ញាឆ្នាំ២០២៦--ឧត្តមសេនីយ៍ទោ សោម ស៊ុន ព្រមានចាត់វិធានការយ៉ាងម៉ឺងម៉ាត់តាមនីតិវិធីច្បាប់ស្ដីពីព្រៃឈើចំពោះជនណាដែលនៅតែលួចកាប់នឹងដឹកជញ្ជូនឈើខុសច្បាប់រំលោភបំពានច្បាប់ស្ដីពីព្រៃឈើដើម្បីចាប់ឃាត់ខ្លួនរួមជាមួយវត្ថុតាងក្នុងការប្រព្រឹត្តបទល្មើសជាក់ស្ដែងដើម្បីបញ្ជូនឱ្យសមត្ថកិច្ចជំនាញកសាងសំណុំរឿងអនុវត្តតាមនីតិវិធីច្បាប់ដោយគ្មានការលើកលែង។

នៅក្នុងកិច្ចប្រជុំជាមួយកងកម្លាំងចម្រុះស្ដីពីការពង្រឹងវិធានការការពារទប់ស្កាត់និងបង្ក្រាបបទល្មើសធនធានធម្មជាតិកាលពីថ្ងៃទី២៨ខែកញ្ញាឆ្នាំ២០២៦នៅទីបញ្ជាការតំបន់ប្រតិបត្តិការសឹករកកំពង់ធំឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង អនុប្រធានអចិន្ត្រៃយ៍នៃគណៈកម្មការ ការពារ ទប់ស្កាត់ និងបង្ក្រាបបទល្មើសធនធានធម្មជាតិខេត្តកំពង់ធំបានព្រមានចាត់វិធានការយ៉ាងមុឺងម៉ាត់ចំពោះជនណាដែលនៅតែរឹងរូស លួចកាប់ និងដឹកជញ្ជូនឈើខុសច្បាប់ រំលោភបំពានច្បាប់ស្ដីពីព្រៃឈើដើម្បីចាប់ឃាត់ខ្លួនរួមជាមួយវត្ថុតាងក្នុងការប្រព្រឹត្តបទល្មើសជាក់ស្ដែងដើម្បីបញ្ជូនឱ្យសមត្ថកិច្ចជំនាញកសាងសំណុំរឿងអនុវត្តតាមនីតិវិធីច្បាប់ដោយគ្មានការលើកលែងឡើយ។

ឧត្តមសេនីយ៍ទោ សោម ស៊ុន បានបញ្ជាក់ថា ដោយទទួលបានបទបញ្ជាពីថ្នាក់ដឹកនាំគ្រប់លំដាប់ថ្នាក់នៃកងយោធពលខេមរភូមិន្ទ ព្រមទាំងមានការឯកភាពពីឯកឧត្តម នួន ផារ័ត្ន អភិបាលខេត្តប្រធានគណៈបញ្ជាការឯកភាពរដ្ឋបាលខេត្ត និងឯកឧត្តមព្រះរាជអាជ្ញាអមសាលាដំបូងខេត្តកំពង់ធំក្នុងការចាត់វិធានការយ៉ាងម៉ឺងម៉ាត់ ដើម្បីការពារការលួចកាប់និងដឹកជញ្ជូនផលអនុផលព្រៃឈើ ដែលខុសច្បាប់ក្នុងគោលបំណងការពារធនធានធម្មជាតិនិងព្រៃឈើសម្រាប់សង្គមជាតិយើងនិងកូនចៅយើងនៅជំនាន់ក្រោយៗទៀត។

ក្នុងឱកាសនោះឧត្តមសេនីយ៍ទោ សោម ស៊ុនបានប្រគល់ជូននូវប្រេងឥន្ធនៈ ស្បៀងអាហារ គ្រឿងឧបភោគបរិភោគមួយចំនួនជូនដល់កងកម្លាំងចម្រុះ ដែលមានភារកិច្ចចល័តក្នុងការការពារទប់ស្កាត់និងចាប់ឃាត់បទល្មើសការដឹកជញ្ជូនឈើខុសច្បាប់ ដើម្បីធានាដោះស្រាយជីវភាពប្រចាំថ្ងៃ ក្នុងការបំពេញភារកិច្ចឱ្យទទួលបានជោគជ័យ។ 

ជាមួយនេះដែរ ឧត្តមសេនីយ៍ទោ សោម ស៊ុន បានដាក់បទបញ្ជាយ៉ាងម៉ឺងម៉ាត់ដល់កងកម្លាំងទាំងអស់មិនត្រូវពាក់ព័ន្ធ ឬគប់គិតទទួលផលប្រយោជន៍ពីបទល្មើសព្រៃឈើជាដាច់ខាត។ក្នុងករណីរកឃើញនិងមានភស្តុតាងជាក់ស្ដែងបុគ្គលដែលប្រព្រឹត្តបទល្មើសនឹងត្រូវកសាងសំណុំរឿងបញ្ជូនទៅកាន់តុលាការអនុវត្តតាមច្បាប់ដោយគ្មានការយោគយល់ឡើយ៕

ដោយ៖ ស៊ុម វណ្ណា