AKP បន្ទាយមានជ័យ ថ្ងៃទី២៩ ខែកញ្ញា ឆ្នាំ២០២៦– ក្នុងពេលដែលស្ថានភាពទឹកជំនន់នៅតំបន់មួយចំនួនក្នុងខេត្តបន្ទាយមានជ័យ នៅតែបន្តប៉ះពាល់ដល់ការរស់នៅរបស់ប្រជាពលរដ្ឋ ការចុះពិនិត្យស្ថានភាពជាក់ស្តែងដល់មូលដ្ឋាន និងការផ្តល់ជំនួយស្បៀងអាហារជាបន្តបន្ទាប់ បានក្លាយជាសកម្មភាពសំខាន់មួយ ដើម្បីធានាថាប្រជាពលរដ្ឋដែលកំពុងប្រឈមការលំបាក មិនត្រូវបានទុកឱ្យប្រឈមមុខនឹងស្ថានភាពលំបាកដោយខ្លួនឯងឡើយ។

ជាក់ស្តែង នារសៀលថ្ងៃទី២៨ ខែកញ្ញា ឆ្នាំ២០២៦ ឯកឧត្តម ជា ឆេង អនុរដ្ឋលេខាធិការក្រសួងកសិកម្មរុក្ខាប្រមាញ់និងនេសាទជាប្រធានក្រុមការងាររាជរដ្ឋាភិបាលចុះមូលដ្ឋានស្រុកមង្គលបូរី អមដំណើរដោយលោក កែវ តារារស្មី អភិបាលស្រុកមង្គលបូរី និងក្រុមការងារចុះមូលដ្ឋានឃុំ បានបន្តចុះពិនិត្យស្ថានភាពទឹកជំនន់នៅភូមិសាយសាម៉ន ឃុំចំណោម ស្រុកមង្គលបូរី ខេត្តបន្ទាយមានជ័យ។

ការចុះមូលដ្ឋានរបស់ឯកឧត្តម ជា ឆេង និងក្រុមការងារ មិនត្រឹមតែផ្តោតលើការពិនិត្យស្ថានភាពទឹក និងផលប៉ះពាល់ជាក់ស្តែងប៉ុណ្ណោះទេ ប៉ុន្តែថែមទាំងជាការស្វែងយល់ដោយផ្ទាល់ពីស្ថានភាពរស់នៅ តម្រូវការចាំបាច់ និងការលំបាករបស់ប្រជាពលរដ្ឋ ដែលត្រូវបានជម្លៀសចេញពីតំបន់ប្រឈមទៅកាន់ទីទួលសុវត្ថិភាព។

ក្នុងឱកាសនោះ ឯកឧត្តម ជា ឆេង និងក្រុមការងារ បាននាំយកអំណោយរបស់ឯកឧត្តមរដ្ឋមន្ត្រី ឌិត ទីណា ប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ ចែកជូនប្រជាពលរដ្ឋដែលរងផលប៉ះពាល់ដោយទឹកជំនន់ និងកំពុងស្នាក់នៅទីទួលសុវត្ថិភាព ចំនួន ២៥គ្រួសារ។

អំណោយដែលបានផ្តល់ជូនក្នុងមួយគ្រួសារ រួមមាន អង្ករ ១០គីឡូក្រាម មី ១កេស ទឹកត្រី ១យួរ និងទឹកស៊ីអ៊ីវ ១យួរ ដែលជាស្បៀងអាហារចាំបាច់សម្រាប់ជួយសម្រួលការរស់នៅរបស់ប្រជាពលរដ្ឋក្នុងអំឡុងពេលដែលពួកគេត្រូវស្នាក់នៅទីទួលសុវត្ថិភាព។

តាមរយៈសកម្មភាពនេះ ការចុះពិនិត្យស្ថានភាពជំនន់បានភ្ជាប់ជាមួយការឆ្លើយតបចំពោះតម្រូវការជាក់ស្តែងរបស់ប្រជាពលរដ្ឋ ពោលគឺ ពិនិត្យពីស្ថានភាពទឹកផង និងពិនិត្យពីសុខទុក្ខរបស់ប្រជាពលរដ្ឋផង។ សម្រាប់គ្រួសារដែលត្រូវចាកចេញពីលំនៅឋានបណ្តោះអាសន្ន ស្បៀងអាហារដែលទទួលបាននេះ អាចជួយកាត់បន្ថយបន្ទុកចំណាយប្រចាំថ្ងៃ និងជួយឱ្យពួកគេមានលទ្ធភាពផ្គត់ផ្គង់អាហារបឋមក្នុងអំឡុងពេលរងគ្រោះ។

សកម្មភាពរបស់ក្រុមការងារក៏បង្ហាញពីការសម្របសម្រួលរវាងថ្នាក់ដឹកនាំ ក្រុមការងាររាជរដ្ឋាភិបាលចុះមូលដ្ឋាន និងអាជ្ញាធរមូលដ្ឋាន ក្នុងការឆ្លើយតបចំពោះគ្រោះមហន្តរាយ ដោយផ្តោតលើសុវត្ថិភាពអាយុជីវិត និងតម្រូវការចាំបាច់របស់ប្រជាពលរដ្ឋជាអាទិភាព។

ជាមួយគ្នានេះ អាជ្ញាធរ និងក្រុមការងារពាក់ព័ន្ធ នឹងបន្តតាមដានការវិវត្តនៃស្ថានភាពទឹកជំនន់ និងសុខទុក្ខរបស់ប្រជាពលរដ្ឋដែលកំពុងស្នាក់នៅទីទួលសុវត្ថិភាព ព្រមទាំងត្រៀមកម្លាំង មធ្យោបាយ និងវិធានការចាំបាច់ ដើម្បីជួយសង្គ្រោះ និងសម្របសម្រួលការផ្គត់ផ្គង់តាមតម្រូវការជាក់ស្តែង។

សម្រាប់ប្រជាពលរដ្ឋដែលកំពុងប្រឈមផលប៉ះពាល់ពីទឹកជំនន់ ការចុះដល់មូលដ្ឋាន និងការនាំយកស្បៀងអាហារមកផ្តល់ជូនដោយផ្ទាល់ មិនត្រឹមជាការផ្គត់ផ្គង់ស្បៀងបណ្តោះអាសន្ននោះទេ ប៉ុន្តែជាការឆ្លើយតបចំពោះតម្រូវការរបស់ប្រជាពលរដ្ឋនៅក្នុងពេលដែលពួកគេកំពុងជួបការលំបាក និងជាការបន្តជំរុញឱ្យការងារជួយសង្គ្រោះក្នុងមូលដ្ឋានឆ្លើយតបបានទាន់ពេលវេលាទៅនឹងស្ថានភាពជាក់ស្តែង៕

ដោយ៖ ឈុន សារ៉ាត