AKP ភ្នំពេញ ថ្ងៃទី២៨ ខែកញ្ញា ឆ្នាំ២០២៦ --

វិទ្យាស្ថានបច្ចេកវិទ្យាកម្ពុជា (ITC) សហការជាមួយវិទ្យាស្ថានជាតិអប់រំ (NIE) ក្រោមការគាំទ្ររបស់គម្រោងមធ្យមសិក្សាសម្រាប់ការប្រកួតប្រជែងមូលធនមនុស្ស (SE4HC) បានរៀបចំវគ្គបណ្តុះបណ្តាលអភិវឌ្ឍន៍សមត្ថភាពវិជ្ជាជីវៈជាប្រចាំ ស្តីពីការសិក្សាតាមរយៈគម្រោងស្ទែម និងការអភិវឌ្ឍជំនាញទន់ រយៈពេលជិត ១សប្តាហ៍ ចាប់ពីថ្ងៃទី២៨ ខែកញ្ញា ដល់ថ្ងៃទី០៣ ខែតុលា ឆ្នាំ២០២៦។

វគ្គបណ្តុះបណ្តាលនេះធ្វើឡើងដោយផ្តោតលើម៉ូឌុលចំនួនពីរ គឺទី១. វិធីសាស្ត្របង្រៀន និងរៀនតាមបែបគម្រោងស្ទែម និងម៉ូឌុលទី២. ការអនុវត្តគម្រោងស្ទែម ដោយមានការចូលរួមពីគ្រូបង្រៀនមុខវិជ្ជាស្ទែម រួមមាន គណិតវិទ្យា រូបវិទ្យា គីមីវិទ្យា ជីវវិទ្យា ផែនដី និងបរិស្ថាន។

គួរបញ្ជាក់ថា គម្រោងមធ្យមសិក្សាសម្រាប់ការប្រកួតប្រជែងមូលធនមនុស្ស (SE4HC) នឹងផ្តល់ការបណ្តុះបណ្តាលដល់គ្រូបង្រៀនចំនួន ៣.០០០នាក់លើសាលារៀនគោលដៅចំនួន២៥៩ សម្រាប់ឆ្នាំ២០២៦ ដោយនឹងរៀបចំជា ៣វគ្គសម្រាប់សិក្ខាកាមចំនួន ២៥៩នាក់៕

ដោយ៖ ចាន់ សុភឿន (ប្រភព៖ ក្រសួងអប់រំ យុវជន និងកីឡា)