AKP ភ្នំពេញ ថ្ងៃទី២៨ ខែកញ្ញា ឆ្នាំ២០២៦-- ឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកស៊ីម៉ាក់ បានលើកឡើងថា សន្និសិទត្រួតពិនិត្យឡើងវិញលើកទី៣នៃការអនុវត្តអនុសញ្ញាអន្តរជាតិស្តីពីការហាមឃាត់ប្រើប្រាស់គ្រាប់បែកចង្កោម ដែលបានប្រព្រឹត្តិទៅនៅក្រុងវៀងចន្ទន៍ ប្រទេសឡាវកន្លងទៅថ្មីៗនេះ បានថ្កោលទោសប្រទេសដែលប្រើគ្រាប់បែកចង្កោម។

ទាក់ទិនក្នុងរឿងនេះនៅថ្ងៃទី២៨ ខែកញ្ញា ឆ្នាំ ២០២៦ ឯកឧត្តម ហេង រតនា បានបញ្ជាក់ថាក្នុងសន្និសិទបានចេញថ្លែងការណ៍ថ្កោលទោសចំពោះតួអង្គណាក៏ដោយ គ្រាប់បែកចង្កោមប្រភេទណា និងទម្រង់ប្រើប្រាស់បែបណាក៏ដោយ ហើយត្រូវតែបញ្ឈប់ប្រើប្រាស់ និងត្រូវតែគោរពតាមកាតព្វកិច្ចច្បាប់មនុស្សធម៌អន្តរជាតិ និងច្បាប់សិទ្ធិមនុស្ស។

ជាមួយគ្នានេះ អគ្គនាយកស៊ីម៉ាក់បានលើកឡើងដែរថា ដូចនេះការប្រើប្រាស់គ្រាប់បែកចង្កោមប្រភេទM42, M46 និងM85 ប្រមាណ៦-៧លានគ្រាប់បែកចង្កោមរបស់ទាហានថៃមកលើបូរណភាពទឹកដីកម្ពុជា វីរកងទ័ព និងនគរបាលកម្ពុជា ជាពិសេសប៉ះពាល់គោលដៅស៊ីវិលដោយផ្ទាល់ដោយមានភូមិចំនួន៣៤៩ភូមិ ដោយក្នុងនេះបានស្រាវជ្រាវរួចរាល់៣៣៥ភូមិ។

ឯកឧត្តម ហេង រតនា បានឱ្យដឹងបន្ថែមថា ចំពោះផ្ទៃដីរងផលប៉ះពាល់ជិត៣០ម៉ឺនហិកតា មានជាង៩ម៉ឺនគ្រួសារស្មើនឹងប្រជាពលរដ្ឋចំនួនប្រមាណជាង៣៥ម៉ឺននាក់ ក្នុងនោះក៏រងប៉ះពាល់ធ្ងន់ធ្ងរដល់សាលារៀន មន្ទីរពេទ្យ មណ្ឌលសុខភាព វត្តអារាម ដីស្រែចម្ការផ្ទះសំបែងនិងហេដ្ឋារចនាសម្ពន្ធ័រូបវន្តស៊ីវិលទូទៅ។ ហេតុនេះហើយ នេះជាទង្វើប្រឆាំង និងរំលោភបំពានច្បាប់មនុស្សធម៌និងច្បាប់សិទ្ធិមនុស្សយ៉ាងពិតប្រាកដ៕

ដោយ៖ មករា