AKP ភ្នំពេញ ថ្ងៃទី១៩ ខែកញ្ញា ឆ្នាំ២០២៦ -- មន្រ្តីជំនាញមន្ទីរបរិស្ថានខេត្តបាត់ដំបង បានចូលរួមពិនិត្យករណីរថភ្លើងក្រឡាប់ធ្លាក់ផ្លូវ ដែលបានកើតឡើងនៅវេលាម៉ោង ១២:០០នាទីថ្ងៃត្រង់ ថ្ងៃទី១៩ ខែកញ្ញា ឆ្នាំ២០២៦ នេះ នៅភូមិអណ្ដូងចេញ សង្កាត់អូរចា ក្រុងបាត់ដំបង ខេត្តបាត់ដំបង។

ក្រសួងបរិស្ថានបានឧ្យដឹងនៅយប់ថ្ងៃទី១៩ ខែកញ្ញា ឆ្នាំ២០២៦ នេះថា យោងតាមរបាយការណ៍បឋម រថភ្លើងក្រឡាប់ធ្លាក់ផ្លូវចំនួន ៥ទូ ក្នុងនោះ ៣ទូរជាប្រេងម៉ាស៊ូតបានលេចធ្លាយចេញអស់ ចំណែកទូសាំង ២ទូរទៀត មិនមានការលេចធ្លាយទេ។

ប្រភពដដែលនេះឧ្យដឹងដែរថា មន្ត្រីជំនាញនៃក្រសួងបរិស្ថាន បាននិងកំពុងបន្តពិនិត្យលើការគ្រប់គ្រងបរិស្ថានយ៉ាងយកចិត្តទុកដាក់ចំពោះករណីឧបទ្ទវហេតុដែលបានកើតឡើងនេះ ដើម្បីទប់ស្កាត់ការលេចធ្លាយប្រេងចូលទៅក្នុងប្រភពទឹកធម្មជាតិ និងកាត់បន្ថយផលប៉ះពាល់ដល់ប្រព័ន្ធអេកូឡូស៊ី ក៏ដូចជាការរស់នៅរបស់ប្រជាពលរដ្ឋ៕

ដោយ៖ មករា