AKP ភ្នំពេញ ថ្ងៃទី១២ ខែតុលា ឆ្នាំ២០២៦—

អ្នកនាំពាក្យរាជរដ្ឋាភិបាលកម្ពុជាបានច្រានចោលយ៉ាងដាច់អហង្ការចំពោះការអះអាងមិនពិតដែលផ្សាយដោយសារព័ត៌មានថៃ ពាក់ព័ន្ធនឹងសម្តីដែលអះអាងដោយលោក សម រង្ស៊ី មេដឹកនាំបក្សប្រឆាំងកម្ពុជា ទាក់ទងនឹងការបាញ់ប្រហារដំបូង នៅតាមព្រំដែនកម្ពុជា-ថៃ។

យោងតាមសេចក្តីថ្លែងការណ៍ដែលចេញផ្សាយនាយប់ទី១២ ខែតុលា ឆ្នាំ២០២៦ ដោយ ឯកឧត្តម ប៉ែន បូណា អ្នកនាំពាក្យរាជរដ្ឋាភិបាលកម្ពុជា សារព័ត៌មានថៃ Top News បានចេញផ្សាយបទសម្ភាសន៍មួយកាលពីថ្ងៃទី១០ ខែតុលា ជាមួយលោក Nantiwat Samart អតីតអនុប្រធានការិយាល័យស៊ើបការណ៍សម្ងាត់ជាតិ និងជាអតីតលេខារដ្ឋមន្ត្រីក្រសួងការបរទេសថៃ ដោយលោកបានអះអាងថា៖ «កាលពី ២-៣ថ្ងៃមុន លោក សម រង្ស៊ី មេដឹកនាំប្រឆាំងកម្ពុជាបានចេញមកអះអាងថា កងកម្លាំងកម្ពុជាជាភាគីបាញ់ប្រហារថៃមុន ហើយដែលនាំឱ្យថៃតបតវិញ»។ ព័ត៌មាននេះ ក៏ត្រូវបានអ្នកលេងបណ្តាញសង្គមលើកយកមកផ្សាយ និងធ្វើអត្ថាធិប្បាយយ៉ាងច្រើន។

អ្នកនាំពាក្យរាជរដ្ឋាភិបាល បដិសេធទាំងស្រុងចំពោះការលើកឡើងខុសការពិតនេះ ហើយបញ្ជាក់ជាថ្មីម្តងទៀតថា គឺភាគីថៃជាអ្នកបាញ់មុន។ បញ្ហានេះត្រូវបាន សម្តេចធិបតីនាយករដ្ឋមន្ត្រី ក៏ដូចជាក្រសួងការពារជាតិ និង ក្រសួងការបរទេសនិងសហប្រតិបត្តិការអន្តរជាតិកម្ពុជា បញ្ជាក់ច្បាស់លាស់រួចហើយ។

អ្នកនាំពាក្យរាជរដ្ឋាភិបាល បានអំពាវនាវឱ្យលោក សម រង្ស៊ី បកស្រាយបំភ្លឺចំពោះបញ្ហានេះ ដោយបានលើកឡើងនូវចំណុចចំនួនបី៖

ទី១. ក្នុងករណីដែលលោក សម រង្ស៊ី មិនបាននិយាយដូច្នេះទេ លោក សម រង្ស៊ី ត្រូវចេញមុខបដិសេធជាផ្លូវការចំពោះការផ្សាយព័ត៌មាននេះ។

ទី២. ប្រសិនបើពិតជាបាននិយាយមែន លោក សម រង្ស៊ី ត្រូវចេញមុខសុំទោសប្រជាពលរដ្ឋខ្មែរជាសាធារណៈជាចាំបាច់ពីព្រោះការនិយាយបែបនេះគឺជាអំពើក្បត់ជាតិដ៏ធ្ងន់ធ្ងរមួយ។

ទី៣. ក្នុងករណីដែលលោក សម រង្ស៊ី មិនចេញមុខបដិសេធជាផ្លូវការនូវអ្វីដែលសារព័ត៌មានថៃបានផ្សាយទេ មានន័យថា លោក សម រង្ស៊ី ពិតជាបាននិយាយដូច្នេះមែន។

អ្នកនាំពាក្យរាជរដ្ឋាភិបាល បានបង្ហាញក្តីសង្ឃឹមថា លោក សម រង្ស៊ី នឹងមានសេចក្តីក្លាហានក្នុងការចេញមុខមកបញ្ជាក់រឿងនេះ៕

ដោយ​ នីកា