AKP បន្ទាយមានជ័យ ថ្ងៃទី១០ ខែតុលា ឆ្នាំ២០២៦​-- ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ និងលោកជំទាវ ជ័យ ណារី បាននាំយកអំណោយចែកជូនគ្រួសារអតីតយុទ្ធជន និងគ្រួសារដែលមានជីវភាពខ្វះខាត សរុបចំនួន ១៨៨គ្រួសារ ដែលកំពុងរស់នៅក្នុងគម្រោង LASED III នៃមណ្ឌលតេជោសន្តិភាព ២២២២ ស្ថិតក្នុងឃុំប៉ោយចារ ស្រុកភ្នំស្រុក ខេត្តបន្ទាយមានជ័យ ក្នុងឱកាសបុណ្យភ្ជុំបិណ្ឌ ដើម្បីចែករំលែកក្តីស្រឡាញ់ ការយកចិត្តទុកដាក់ និងលើកទឹកចិត្តដល់គ្រួសារដែលមានជីវភាពលំបាក។

ពិធីនាំយកអំណោយចែកជូនប្រជាពលរដ្ឋនេះ បានធ្វើឡើងកាលពីរសៀលថ្ងៃទី៩ ខែតុលា ឆ្នាំ២០២៦ ក្រោមការដឹកនាំដោយផ្ទាល់របស់ឯកឧត្តម អ៊ុំ រាត្រី និងលោកជំទាវ ជ័យ ណារី ដោយមានការអញ្ជើញចូលរួមពីឯកឧត្តម ប្លែក វ៉ារី ប្រធានក្រុមប្រឹក្សាខេត្ត ព្រមទាំងសមាជិកក្រុមប្រឹក្សាខេត្ត និងក្រុមការងារពាក់ព័ន្ធ។

ក្នុងឱកាសនោះ ឯកឧត្តម អ៊ុំ រាត្រី បានបង្ហាញនូវការយកចិត្តទុកដាក់ចំពោះសុខទុក្ខ និងជីវភាពរស់នៅរបស់គ្រួសារអតីតយុទ្ធជន ព្រមទាំងប្រជាពលរដ្ឋដែលកំពុងប្រឈមនឹងការខ្វះខាតជីវភាព ដោយបាននាំយកអំណោយមកចែកជូនផ្ទាល់ ដើម្បីជួយសម្រាលការលំបាកក្នុងជីវភាពប្រចាំថ្ងៃ ជាពិសេសក្នុងឱកាសពិធីបុណ្យប្រពៃណីជាតិដ៏សំខាន់នេះ។

ឯកឧត្តមអភិបាលខេត្តបានគូសបញ្ជាក់ពីសារៈសំខាន់នៃការចែករំលែក និងការជួយគ្នាទៅវិញទៅមកក្នុងសង្គម ជាពិសេសការមិនទុកឱ្យគ្រួសារដែលមានជីវភាពខ្វះខាតប្រឈមនឹងការលំបាកតែម្នាក់ឯង។ ការនាំយកអំណោយជូនប្រជាពលរដ្ឋនាពេលនេះ មិនត្រឹមតែជាការជួយឧបត្ថម្ភផ្នែកសម្ភារៈប៉ុណ្ណោះទេ ប៉ុន្តែក៏ជាការបង្ហាញពីការយកចិត្តទុកដាក់ ការសួរសុខទុក្ខ និងការផ្តល់កម្លាំងចិត្តដល់គ្រួសារទាំងអស់ឱ្យមានស្មារតីរឹងមាំក្នុងការបន្តជីវភាពរស់នៅ។

ឯកឧត្តម អ៊ុំ រាត្រី ក៏បានលើកឡើងពីតម្លៃនៃការដឹងគុណចំពោះអតីតយុទ្ធជន ដែលបានលះបង់កម្លាំងកាយចិត្ត និងរួមចំណែកក្នុងបុព្វហេតុការពារជាតិ និងការរក្សាសុខសន្តិភាព។ ការយកចិត្តទុកដាក់ចំពោះគ្រួសារអតីតយុទ្ធជន គឺជាការចូលរួមគោរពចំពោះការលះបង់របស់ពួកគាត់ និងជាការរួមចំណែកជួយឱ្យក្រុមគ្រួសាររបស់ពួកគាត់មានជីវភាពកាន់តែប្រសើរឡើង។

ជាមួយគ្នានេះ ឯកឧត្តមអភិបាលខេត្តបានលើកទឹកចិត្តឱ្យប្រជាពលរដ្ឋបន្តសាមគ្គីភាព ជួយយកអាសាគ្នា និងខិតខំប្រកបរបរចិញ្ចឹមជីវិតតាមលទ្ធភាពរៀងៗខ្លួន ដើម្បីបង្កើនប្រាក់ចំណូល និងលើកកម្ពស់ជីវភាពគ្រួសារ។ អាជ្ញាធរមូលដ្ឋាន និងក្រុមការងារពាក់ព័ន្ធក៏ត្រូវបន្តយកចិត្តទុកដាក់ស្វែងយល់ពីតម្រូវការ និងបញ្ហាប្រឈមរបស់ប្រជាពលរដ្ឋ ដើម្បីសម្របសម្រួលដោះស្រាយឱ្យបានសមស្របតាមលទ្ធភាព និងតម្រូវការជាក់ស្តែង។

ការនាំយកអំណោយចែកជូនគ្រួសារទាំង១៨៨គ្រួសារនាពេលនេះ ក៏បានបង្ហាញពីស្មារតីចែករំលែកក្នុងឱកាសបុណ្យភ្ជុំបិណ្ឌ ដែលជាពេលវេលាដែលប្រជាពលរដ្ឋខ្មែរតែងជួបជុំក្រុមគ្រួសារ បំពេញកិច្ចបុណ្យតាមប្រពៃណី និងចែករំលែកសេចក្តីសុខដល់អ្នកនៅជុំវិញខ្លួន។ សកម្មភាពនេះមានអត្ថន័យជាក់ស្តែងក្នុងការជួយសម្រាលបន្ទុកចំណាយប្រចាំថ្ងៃ និងផ្តល់ភាពកក់ក្តៅផ្លូវចិត្តដល់គ្រួសារដែលត្រូវការជំនួយ។

គួរបញ្ជាក់ថា គ្រួសារទាំង១៨៨គ្រួសារ ដែលទទួលបានអំណោយនេះគឺជាគ្រួសារអតីតយុទ្ធជន និងគ្រួសារមានជីវភាពខ្វះខាត ដែលរស់នៅក្នុងគម្រោង LASED III នៃមណ្ឌលតេជោសន្តិភាព ២២២២ ក្នុងឃុំប៉ោយចារ ស្រុកភ្នំស្រុក ខេត្តបន្ទាយមានជ័យ។ ការចែកអំណោយក្នុងឱកាសបុណ្យភ្ជុំបិណ្ឌនេះ ជាការចូលរួមចែករំលែកសេចក្តីសុខ និងបង្ហាញពីការយកចិត្តទុកដាក់ចំពោះសុខុមាលភាពរបស់ប្រជាពលរដ្ឋក្នុងមូលដ្ឋាន៕

ដោយ ឈុន សារ៉ាត