AKP ភ្នំពេញ ថ្ងៃទី៨ ខែតុលា ឆ្នាំ៣០២៦--មជ្ឈមណ្ឌល SEAMEO TED បានរៀបចំកិច្ចប្រជុំក្រុមប្រឹក្សាភិបាលមជ្ឈមណ្ឌលស៊ីមេអូធីតលើកទី៩ (The 9th SEAMEO TED GBM) រយៈពេល២ថ្ងៃ ពីថ្ងៃទី៨-៩ ខែតុលា ឆ្នាំ២០២៦ នៅខេត្តសៀមរាប ដោយកិច្ចប្រជុំត្រូវបានរៀបចំឡើងដោយផ្ទាល់ និងតាមអនឡាញ ដែលមានការចូលរួមពីសមាជិកក្រុមប្រឹក្សាភិបាលតំណាងប្រទេសក្នុងតំបន់ស៊ីមេអូទំាង ១១ប្រទេស រួមមាន ប្រុយណាយដារ៉ូសាឡឹម កម្ពុជា ឥណ្ឌូនេស៊ី ឡាវ ម៉ាឡេស៊ី មីយ៉ាន់ម៉ា ហ្វីលីពីន សឹង្ហបុរី ថៃ  ទីម័រឡេស្ត និងវៀតណាម។

កិច្ចប្រជុំនេះត្រូវបានរៀបចំឡើងជារៀងរាល់ឆ្នាំក្នុងគោលបំណងចំនួន៤រួមមាន÷ ១.រាយការណ៍អំពីសកម្មភាព និងសមិទ្ធផលកន្លងមករបស់មជ្ឈមណ្ឌលជូនដល់សមាជិកក្រុមប្រឹក្សាភិបាល។ ២.ស្នើសុំមតិយោបល់ អនុសាសន៍ និងការអនុម័តលើផែនការសកម្មភាព/ព្រឹត្តិការណ៍នានាពីសមាជិកក្រុមប្រឹក្សាភិបាល។ ៣.សុំការគាំទ្រលើផែនការថវិកាប្រចាំឆ្នាំមុននឹងរាយការណ៍ជូនក្រុមប្រឹក្សាស៊ីមីអូ និង ៤.ពង្រឹងទំនាក់ទំនង និងកិច្ចសហប្រតិបត្តិការឱ្យកាន់តែជិតស្និទ្ធរវាង SEAMEO TED និងសមាជិកក្រុមប្រឹក្សាភិបាល។

ថ្លែងក្នុងពិធីបើកកិច្ចប្រជុំ លោកជំទាវបណ្ឌិត សឿ សុជាតា អនុរដ្ឋលេខាធិការក្រសួងអប់រំ យុវជន និងកីឡាបានស្វាគមន៍សមាជិកក្រុមប្រឹក្សាភិបាលទាំង ១១ប្រទេស ដែលបានចំណាយពេលវេលាដ៏មានតម្លៃចូលរួមកិច្ចប្រជុំដ៏មានសារៈសំខាន់នេះ។ លោកជំទាវបណ្ឌិតបានវាយតម្លៃខ្ពស់ចំពោះការបំពេញ
តួនាទីដ៏សំខាន់របស់មជ្ឈមណ្ឌលតំបន់អាស៊ីអាគ្នេយ៍ដើម្បីការអភិវឌ្ឍអប់រំបច្ចេកទេស (SEAMEO TED) ក្នុងការដោះស្រាយបញ្ហាកង្វះ និងគម្លាតជំនាញក្នុងតំបន់កន្លងមកដែលមជ្ឈមណ្ឌលបានដើរតួនាទីជាអ្នកសម្របសម្រួលភាពជាដៃគូរវាងសាលា និងសហគ្រាស ដើម្បីជំរុញការសិក្សាជំនាញកាន់តែមានប្រសិទ្ធភាព និងចំគោលដៅ។

លោកជំទាវបណ្ឌិតបានសង្កត់ធ្ងន់លើតម្រូវការក្នុងការបណ្តុះបណ្តាលឡើងវិញ ការលើកកម្ពស់ជំនាញ និងភាពជាដៃគូរវាងរដ្ឋ និងឯកជន ដើម្បីដោះស្រាយគម្លាតជំនាញក្នុងយុគសម័យបដិវត្តន៍ឧស្សាហកម្ម ៤.០ នៅក្នុងតំបន់៕

ដោយ ចាន់ សុភឿន (ប្រភព៖ ក្រសួងអប់រំ)