AKP កំពង់ធំ ថ្ងៃទី៣ ខែតុលា ឆ្នាំ២០២៦--លោក សាយ គឹមឡម អភិបាលស្រុកស្ទោងបានលើកឡើងថាវេនបិណ្ឌរដ្ឋបាលស្រុកជាមួយពលរដ្ឋក្នុងមូលដ្ឋានដើម្បីពង្រឹ​ងភាពស្និទ្ធ​ស្នារវាងគ្នានឹងគ្នាក្នុងឱកាស​ដែលលោកនិងលោក ឡាយ ស៊ីលី ប្រធានក្រុមប្រឹក្សាស្រុកស្ទោងបានដឹកនាំសមាជិក សមាជិកា សហការីនិងក្រុមការ​ងារចុះមូល​ដ្ឋាន​ឃុំចំណាលើ​ចូលរួមសូត្រមន្ត វេនបិណ្ឌទី៧ជាមួយប្រជាពលរដ្ឋពុទ្ធបរិស័ទចំណុះជើងវត្តអំពិលលើងស្ថិតក្នុងឃុំចំណាលើ ស្រុកស្ទោង ខេត្តកំពង់ធំកាលពីរសៀលថ្ងៃទី២ ខែតុលា ឆ្នាំ២០២៦។
លោកអភិបាលស្រុកបានបញ្ជាក់ថានេះជាវេនបិណ្ឌ២របស់រដ្ឋបាលស្រុកស្ទោង ដែលលើសពីការស្និទ្ធស្នាជាមួយពលរដ្ឋគឺជាការសន្សំនូវបុញ្ញនិធិសម្រាប់ជាតិនេះនឹងអនាគតជាតិក្នុងនាមពុទ្ធសាសនិកដើម្បីឧទ្ទិសថ្វាយកុសលដល់អតីតព្រះមហាក្សត្រវីរៈជនគ្រប់លំដាប់ថ្នាក់ មាតា បិតា ញាតិកា៧សណ្តាននិងវីរៈកងទ័ពជួបមុខឱ្យបានរួចផុតពីអបាយភូមិនិងឈានទៅកាន់សោយសុខនៅទីបុរមសុខគ្រប់ៗគ្នា។

ទន្ទឹមនឹងនេះក្នុងនាមមន្ត្រីរាជការ អាជ្ញាធរមូលដ្ឋាននិងក្រុមការងារចុះមូលដ្ឋានឃុំចំណាលើត្រូវរួបរួមសហការគ្នា ធ្វើតែអំពើល្អជាមួយប្រជាពលរដ្ឋក្នុងមូលដ្ឋានជាពិសេសយល់អធ្យាស្រ័យ និងនៅរួមរស់ជាមួយគ្នាគ្រប់កាលៈទេសៈក្នុងស្ថានភាពណាក៏ដោយ។
លោកអភិបាលស្រុកស្ទោង បានគោរពថ្លែងអំណរគុណយ៉ាងជ្រាលជ្រៅបំផុត ដល់ឯកឧត្តម ចាន់ ស៊ីណាត ប្រធានក្រុមការងារចុះមូលដ្ឋានឃុំចំណាលើ និងក្រុមការងារដែលបានគិតគូរយកចិត្តទុកដាក់ខ្ពស់ក្នុងការចូលរួមអភិវឌ្ឍមូលដ្ឋានឃុំចំណាលើនិងលើកកម្ពស់ជីវភាពប្រជាពលរដ្ឋនៅក្នុងមូលដ្ឋានឱ្យកាន់តែប្រសើរឡើង ដូចដែលប្រជាពលរដ្ឋនៅក្នុងឃុំបានឃើញជាក់ស្ដែងជាតឹកតាងស្រាប់ នូវសំណង់ហេដ្ឋារចនាសម្ព័ន្ធជាច្រើន។

សូមបញ្ជាក់ថាឯកឧត្តម ចាន់ ស៊ីណាត ប្រធានក្រុមការងារចុះមូលដ្ឋានឃុំចំណាលើ ចាត់ក្រុងការងារនាំយកបច្ច័យចំនួន២លានរៀល របស់ឯកឧត្តមផ្ទាល់ និងបច្ច័យក្រុមការងារយុវជនឃុំចំណាលើចំនួន៣០ម៉ឺនរៀល ចូលរួមជាមួយរដ្ឋបាលស្រុកស្ទោងកាន់បិណ្ឌវេនទី៧ ហើយលោក សាយ គឹមឡម អភិបាលស្រុកស្ទោងបានប្រគេននូវទេយ្យទាន បច្ច័យមួយចំនួនដល់ព្រះសង្ឃនិងបច្ច័យសម្រាប់កសាងវត្តចំនួន៤០ម៉ឺនរៀល បច្ច័យសម្រាប់ចូលរួមទ្រទ្រង់ចង្ហាន់ចំនួន២០ម៉ឺនរៀលព្រមទាំងចែកទានជូនលោកយាយ លោកតា ដែលចូលរួមក្នុងកម្មវិធីចំនួន១៧០នាក់ក្នុងម្នាក់ៗទទួលបានថវិកាចំនួន១ម៉ឺនរៀលនិងភួយ១៕

ដោយ៖ ស៊ុម វណ្ណា