AKP ភ្នំពេញ ថ្ងៃទី៣ ខែតុលា ឆ្នាំ២០២៦--មន្រ្តីឧទ្យានុរក្សបានសហការជាមួយ អាជ្ញាធរមូលដ្ឋានគ្រប់ថ្នាក់ សមត្ថកិច្ចគ្រប់ប្រភេទ និងប្រជាពលរដ្ឋនៅតាមសហគមន៍មូលដ្ឋាន នៅក្នុងខែកញ្ញា ឆ្នាំ២០២៦ បានចុះល្បាតចំនួន ១៥៨០ លើក កើនឡើង ៣២៤លើកនិងបង្ក្រាបបទល្មើសធនធានធម្មជាតិចំនួន ២៣៨ករណី កើនឡើង ៨១ករណីធៀបនឹងខែសីហា ឆ្នាំ២០២៦។
ក្រសួងបរិស្ថានបានឱ្យដឹងថាក្នុងចំណោមបទល្មើសបង្រ្កាបបានក្នុង ខែកញ្ញា ឆ្នាំ២០២៦ កន្លងមកនេះ ក្រុមការងារបានបង្រ្កាប បទល្មើសព្រៃឈើ ចំនួន ៧៥ករណី បទល្មើសសត្វព្រៃ ចំនួន ៧១ករណី បទល្មើសដីធ្លី ចំនួន ៣៩ករណី បទល្មើសនេសាទ ចំនួន ៤៧ករណី បទល្មើសធនធានរ៉ែ ចំនួន ៦ករណី។

ក្នុងអំឡុងខែកញ្ញា ឆ្នាំនេះដែរ ក្រុមការងារបានពង្រឹងការអនុវត្តច្បាប់យ៉ាងម៉ឺងម៉ាត់ និងបានបង្រ្កាប ផ្ទៃដីកាប់រាន ទន្រ្ទាន ក្នុងតំបន់ការពារធម្មជាតិ សរុបទំហំ ៤១ ហិកតា។ រាល់បទល្មើសដែលបានរកឃើញត្រូវបានក្រុមការងារ បានអនុវត្តវិធានការច្បាប់តឹងរ៉ឹង ដោយបានកសាងកំណត់ហេតុបទល្មើស បាន ១២៩កំណត់ហេតុ និងកសាងសំណុំរឿងទាក់ទងបទល្មើសធនធានធម្មជាតិ ដើម្បីបញ្ជូនទៅតុលាការមានចំនួន១៤ សំណុំរឿង និងបានបញ្ជូនជនសង្ស័យដាក់ពន្ធនាគារចំនួន១១នាក់។

ក្នុងពេលជាមួយគ្នានេះ ក្រុមការងារ បានដលហូតបានវត្ថុតាង ជាច្រើន រួមមានគ្រឿងចក្រ ត្រាក់ទ័រ រថយន្ត គោយន្តចំនួន ម៉ូតូ ទូក រណាយន្ត ជាច្រើនគ្រឿង។ មន្រ្តីឧទ្យានុរក្ស បានដោះអន្ទាក់ឆក់ចំនួន ១ ៩៥០ គ្រឿង អន្ទាក់ខ្សែ ចំនួន ២ ២១០ ខ្សែ គ្រាប់កាំភ្លើងចំនួន៨គ្រាប់ អាវុធកែច្នៃចំនួន ២៥ដើម គ្រាប់១៧ គ្រាប់។
សូមបញ្ជាក់ថា ក្រុមមន្រ្តីឧទ្យានុរក្ស បន្តពង្រឹងកិច្ចសហប្រតិបត្តិការជាមួយអ្នកពាក់ព័ន្ធបន្ថែមទៀត ដើម្បីអនុវត្តយុទ្ធសាស្ត្រចក្រាវិស័យបរិស្ថាន ការពារធនធានធម្មជាតិ ជីវៈចម្រុះ នៅតាមតំបន់ការពារធម្មជាតិ៕

ដោយ៖មករា