AKP កំពង់ធំ ថ្ងៃទី២ ខែតុលា ឆ្នាំ២០២៦-- លោកជំទាវ សៀង លី សមាជិកក្រុមប្រឹក្សាខេត្ត និងជាអនុប្រធាន គ.ក.ស.កខេត្តកំពង់ធំបានកោតសរសើរចំពោះ អង្គការដៃគូរទាំងអស់ដែលបានសហការគ្នារៀបចំវេទិកាសាធារណៈស្តីពី កិច្ចសន្ទនាសង្គមនៅថ្នាក់ខេត្ត ការបែងចែក និងប្រើប្រាស់ថវិកា ឃុំ/សង្កាត់ឆ្លើយតបនឹងយេនឌ័រសេវាសង្គមអនាម័យនិងបរិស្ថាននេះឡើង។លោកជំទាវបានលើកឡើងដូចនេះនៅក្នុងពិធីបើកវេទិកាសាធារណៈស្តីពី កិច្ចសន្ទនាសង្គមនៅថ្នាក់ខេត្ត ការបែងចែកនិងប្រើប្រាស់ថវិកាឃុំ សង្កាត់ ឆ្លើយតបនឹងយេនឌ័រ សេវាសង្គម អនាម័យ និងបរិស្ថាន នាព្រឹកថ្ងៃទី០២ ខែតុលា ឆ្នាំ២០២៦ នៅសាលប្រជុំមន្ទីរសុខាភិបាលខេត្តកំពង់ធំ។

លោក យឹម ប៊ុនថេង នាយកប្រត្តិបត្តិ អង្គការសហប្រត្តិការដើម្បីកាត់បន្ថយភាពក្រីក្រអង្គការសហប្រតិបត្តិការដើម្បីកាត់បន្ថយភពក្រីក្រមានប្រសាសន៍ថា វេទិកាសាធារណៈនាថ្ងៃនេះមានសារៈសំខាន់ណាស់ពីព្រោះយើងមិនត្រឹមតែជួបជុំគ្នាដើម្បីពិភាក្សាអំពីថវិកាឃុំ/សង្កាត់ ប៉ុណ្ណោះទេ ប៉ុន្តែយើងកំពុងពិភាក្សាអំពីរបៀបដែលធនធានសាធារណៈអាចត្រូវបានរៀបចំ និងប្រើប្រាស់ដើម្បីឆ្លើយតបនឹងតម្រូវការជាក់ស្តែងរបស់ប្រជាពលរដ្ឋ។ ហើយគោលបំណងនៃវេទិកានេះគឺផ្តោតទៅលើ៖១.បង្កើនការយល់ដឹងរបស់ប្រជាពលរដ្ឋ ពីតួនាទី និងការសម្របសម្រួលអាជ្ញារធរថ្នាក់ក្រោមជាតិអំពីមូលនិធិ ឃុំ/សង្កាត់ ឆ្លើយតបនឹងយេនឌ័រ សេវាសង្គម អនាម័យ និងបរិស្ថាន។២. ចែករំលែកពីបទពិសោធន៍នៃ កាវិភាជថវិកា ការប្រើប្រាស់ថវិកាឃុំ/សង្កាត់ ដែលមានតម្លាភាព និងគណនេយ្យភាពនិងឆ្លើយតបតាមតម្រូវការដល់ប្រជាពលរដ្ឋជាពិសេសជនងាយរងគ្រោះស្រ្តី ស្រ្តីមានផ្ទៃពោះ កុមារ មនុស្សចាស់ ជនមានពិការភាព និងគ្រួសារក្រីក្រ និងអ្នកនៅតាមតំបន់ដាច់ស្រយាល។ ៣. ផ្សព្វផ្សាយចែករំលែកពីយន្តការរបស់ឃុំ/សង្កាត់ក្នុងការជម្រុញឱ្យមានការផ្តល់សេវាសាធារណៈឆ្លើយតបនឹងយេនឌ័រ។

លោកជំទាវ សៀង លី លើកឡើងថាអនុលោមតាមគោលនយោបាយស្តីពីការលើកកម្ពស់សមភាពយេនឌ័រសម្រាប់ការអភិវឌ្ឍ តាមបែបប្រជាធិបតេយ្យនៅថ្នាក់ក្រោមជាតិឆ្នាំ២០១៩ចេញដោយគ.ជ.អ.បនៅក្នុងយុទ្ធសាស្រ្តទី៨៖ការរៀបចំកម្មវិធីគម្រោងផែន ការសកម្មភាព និងថវិកាត្រូវគិតគូថវិកាឆ្លើយតបនឹងយេនឌ័រជម្រុញការយកចិត្តទុកដាក់ពីភាគីពាក់ព័ន្ធ និងការលើកកម្ពស់សមភាពយេនឌ័របានកំណត់ក្នុងក្របខណ្ឌកម្មវិធីជាតិ និងការបញ្ច្រាបយេនឌ័រ និងបង្កើតភាពអង់អាចដល់ស្រ្តី និងក្មេងស្រ្តីនៅគ្រប់ស្ថាប័នក្រសួង និងមានផែនការសកម្មភាពជាតិ និងថវិកាប្រចាំឆ្នាំនីមួយៗនិងស្របតាមគោលដៅផែនការយុទ្ធសាស្រ្តនារីរតនៈទី៦(២០២៤-២០២៨) និងយុទ្ធសាស្រ្តបញ្ចកោណដំណាក់ កាលទី១។

លោកជំទាវបន្ថែមថា ការចូលរួមរបស់ប្រជាពលរដ្ឋក្នុងដំណើការរៀបចំថវិកាឃុំ/សង្កាត់មានសារៈសំខាន់ណាស់ពីព្រោះបានផ្តល់ឱកាសឱ្យប្រជាពលរដ្ឋចូលរួមក្នុងការរៀបចំផែនការ និងកំណត់អាទិភាពអភិវឌ្ឍន៍មូលដ្ឋាន ប្រកបដោយគណនេយ្យភាព តម្លាភាព ការឆ្លើយតប ទៅនឹងតម្រូវការរបស់ប្រជាពលរដ្ឋ ការចូលរួមរបស់ស្ត្រី និងក្រុមងាយរងគ្រោះ។ ការជួយសម្រប សម្រួលរបស់រដ្ឋបាលខេត្ត ស្រុក ឃុំ/សង្កាត់ជាមួយប្រជាពលរដ្ឋ លើការអភិវឌ្ឍឃុំ/សង្កាត់ សេវាសាធារណៈមានសារៈសំខាន់ណាស់ក្នុងការជួយរៀបចំផែនការសម្របសម្រួលគម្រោង ការបែងចែកធនធាន ត្រួតពិនិត្យនិងតាមដានលទ្ធផលនានា។ ការចូលរួមរបស់ភាគីពាក់ព័ន្ធទាំងអស់ ដើម្បីរួមចំណែកក្នុងការលើកកម្ពស់សមភាពយេនឌ័រ ដើម្បីស្ថេរភាពសេដ្ឋកិច្ច និងយុត្តិធម៌សង្គម ពិតជាមានសារៈសំខាន់ណាស់។

លោកជំទាវសង្ឃឹម និងជឿជាក់ថា អ្នកចូលរួម និងអាជ្ញាធរ បានពិភាក្សា និងចូលរួមឱ្យបានពេញលេញក្នុងការរៀបចំថវិកា ការប្រើប្រាស់ថវិកាឃុំ/សង្កាត់ ដែលមានតម្លាភាព និងគណនាយ្យភាព និងឆ្លើយតបតាមតម្រូវការដល់ប្រជាពលរដ្ឋ បានយល់ដឹងកាន់តែច្បាស់ពីសេវាសាធារណៈឆ្លើយតបនឹងយេនឌ័រ អាចជួយបង្កើនគុណភាពនិងប្រសិទ្ធភាពនៃសេវាសាធារណៈក្នុងសហគមន៍របស់ខ្លួនតាមរយៈការប្រើប្រាស់ថវិកាឃុំ/សង្កាត់ប្រកបដោយបរិយាប័ន្ន៕

ដោយ ស៊ុម វណ្ណា