AKPកំពង់ធំ ថ្ងៃទី៣០ ខែកញ្ញា ឆ្នាំ២០២៦---

ប្រធានគណកម្មាធិការពិគ្រោះយោបល់កិច្ចការស្ត្រីនិងកុមារខេត្តបើកកិច្ចប្រជុំសាមញ្ញលើកទី២៦ ប្រចាំខែកញ្ញា ឆ្នាំ២០២៦ របស់ គ.ក.ស.ក ខេត្ត ដោយលើកយករបៀបវារៈចំនួន៤ មកពិភាក្សា÷១.ពិនិត្យនឹងអនុម័តលើសេចក្តីព្រាងកំណត់ហេតុនៃកិច្ចប្រជុំប្រចាំខែសីហា។២. ពិនិត្យនឹងអនុម័តរបាយការណ៍ប្រចាំខែកញ្ញា។
៣. ពិនិត្យនឹងអនុម័តរបាយការណ៍៩ខែឆ្នាំ២០២៦ថ្ងៃទី៣០ ខែកញ្ញា ឆ្នាំ២០២៦ នៅសាលប្រជុំសាលាខេត្តកំពង់ធំ។

លោកជំទាវ ស៊ឹម សុវណ្ណារិទ្ធិ ប្រធាន គ.ក.ស.ក ខេត្ត មានប្រសាសន៍ថាកិច្ចប្រជុំថ្ងៃនេះពិតជាមានសារសំខាន់ណាស់សំរាប់លោក លោកស្រី ជាអនុប្រធាន សមាជិក គ.ក.ស.ក ខេត្ត ព្រមទាំងតំណាងអង្គការដៃគូនានាទទួលបន្ទុកកិច្ចការនារីនិងកុមារ សង្គ្រោះទុរគតជន និងមនុស្សចាស់ ដែលមានវត្តមានកិច្ចប្រជុំដែលបានចូលរួមបញ្ចេញមតិ ចែករំលែកបទពិសោធន៍ បញ្ហាប្រឈមដែលបានជួបប្រទះកន្លងមក និងវិធីសាស្ត្រក្នុងការដោះស្រាយប្រកបដោយភាពច្បាស់ លាស់ និងផុសផុលប្រកបដោយការទទួលខុសត្រូវខ្ពស់។

លោកជំទាវបានបង្ហាញថាកិច្ចប្រជុំសាមញ្ញលើកទី២៦នេះបានឆ្លុះបញ្ចាំងពីការទទួលខុសត្រូវរបស់អង្គភាពសាម៉ី និងដៃគូពាក់ព័ន្ធទាំងអស់ក្នុងការរៀបចំរបាយការណ៍ ការផ្ទៀងផ្ទាត់របាយការ ណ៍ ការកែតម្រូវខ្លឹមសាររបាយការណ៍ ការរៀបចំផែនការអនុវត្តបន្ត កិច្ចសហ ការរវាងដៃគូពាក់ព័ន្ធនានាក្នុងការចូល រួមគាំទ្រការចុះជួយអន្តរាគមន៍ក្នុងតំបន់មូលដ្ឋានបានទាន់ពេលវេលាក្នុងករណីមានការរំលោភបំពានលើកុមារ និងការជួយសម្របសម្រួលសេវាសង្គមផ្សេងៗ នឹងបង្ហាញពីអត្ថប្រយោជន៍នៃការប្រើប្រាស់បណ្ណសមធម៌ ប្រកបដោយក្រមសិលធម៏វិជ្ជាជីវៈ។

លោកជំទាវ ស៊ឹម សុវណ្ណរិទ្ធិ បានបង្ហាញនូវលទ្ធផលនៃកិច្ចប្រជុំសាមញ្ញលើកទី២៦នេះដូចខាងក្រោម÷
១. ជំរុញបន្តអនុវត្តសកម្មភាពនឹងផ្សព្វផ្សាយ ចែករំលែកនូវការទប់ស្កាត់ជំងឺគ្រុនឈាមតាមប្រព័ន្ធផ្សព្វផ្សាយ តាមក្រុម និងប្រាប់ដោយផ្ទាល់។
២. ជំរុញការអនុវត្តសេវាសង្គមផ្នែកគាំពារសង្គមឲ្យបានគ្រប់ឃុំក្រុងស្រុកទាំងអស់។

៣. សូមអនុវត្តសកម្មភាពតាមមន្ទីរវិស័យតាមផែនការរៀងៗខ្លួន។
លោកជំទាវសង្ឃឹមថាលោកលោកស្រីទាំងអស់និងខិតខំយកចិត្តទុកដាក់បន្តអនុវត្តកិច្ចការរបស់ខ្លួននឹងសម្រេចបានលទ្ធផលល្អតាមផែនការដែលបានគ្រោងទុក៕

ដោយ៖ ស៊ុម វណ្ណា