AKP ភ្នំពេញ ថ្ងៃទី២៩ ខែកញ្ញា ឆ្នាំ២០២៦ -- យោងតាមក្រុមហ៊ុន ​​Moody’s Analytics បានឱ្យដឹងថា ប្រទេសម៉ាឡេស៊ីស្ថិតក្នុងចំណោមប្រទេសសេដ្ឋកិច្ចធំៗចំនួនប្រាំមួយនៅក្នុងតំបន់អាស៊ីប៉ាស៊ីហ្វិក ដែលត្រូវបានគេរំពឹងថានឹងមានកំណើនផលិតផលក្នុងស្រុកសរុប (GDP) ពិតប្រាកដលឿនជាងប្រទេសចិននៅក្នុងឆ្នាំ២០២៦ នេះ ដោយសារតែការចូលរួមយ៉ាងស៊ីជម្រៅរបស់ខ្លួននៅក្នុងខ្សែសង្វាក់ផ្គត់ផ្គង់បច្ចេកវិទ្យាបញ្ញាសិប្បនិម្មិត (AI)។

នៅក្នុងរបាយការណ៍ដែលមានចំណងជើងថា «ទស្សនវិស័យសម្រាប់តំបន់អាស៊ី-ប៉ាស៊ីហ្វិក៖ RAMpocalypse Now» របស់ក្រុមហ៊ុន Moody’s Analytics បានលើកឡើងថា ប្រទេសម៉ាឡេស៊ី សិង្ហបុរី ឥណ្ឌា វៀតណាមឥណ្ឌូណេស៊ី និងកោះតៃវ៉ាន់ (ចិន) ត្រូវបានព្យាករណ៍ថានឹងមានកំណើនសេដ្ឋកិច្ចលឿនជាងប្រទេសចិនដីគោកនៅក្នុងឆ្នាំនេះ។

ទីភ្នាក់ងារសារព័ត៌មានជាតិម៉ាឡេស៊ី (Bernama) បានដកស្រង់សម្តីរបស់ក្រុមហ៊ុន Moody’s Analytics ដែលបានបញ្ជាក់ថា កំណើន GDP នៅក្នុងតំបន់អាស៊ីប៉ាស៊ីហ្វិកនឹងថយចុះនៅក្នុងឆ្នាំ២០២៦ ប៉ុន្តែសេដ្ឋកិច្ចដែលបានចូលរួមយ៉ាងស៊ីជម្រៅនៅក្នុងខ្សែសង្វាក់ផ្គត់ផ្គង់ AI នឹងមាននិន្នាការផ្ទុយពីនេះ។ កោះតៃវ៉ាន់ កូរ៉េខាងត្បូង សិង្ហបុរី និងម៉ាឡេស៊ី នឹងមានកំណើនលឿនជាងកាលពីឆ្នាំ២០២៥។

របាយការណ៍នេះបានបង្ហាញថា តម្រូវការដ៏ខ្លាំងក្លាសម្រាប់បន្ទះឈីបនិងផលិតផលបច្ចេកវិទ្យាផ្សេងទៀត បានជំរុញឱ្យមានការកើនឡើងនៃការនាំចេញពីកោះតៃវ៉ាន់ កូរ៉េខាងត្បូង ចិនដីគោក និងតំបន់មួយចំនួននៅតំបន់អាស៊ីអាគ្នេយ៍ ដែលជួយទូទាត់សងទៅនឹងភាពយឺតយ៉ាវនៅក្នុងវិស័យផ្សេងទៀត។

ទោះជាយ៉ាងណាក៏ដោយ ក្រុមហ៊ុន Moody’s Analytics បានរំពឹងថាកំណើនសេដ្ឋកិច្ចរួមរបស់តំបន់អាស៊ីប៉ាស៊ីហ្វិកនឹងថយចុះមកនៅកម្រិត៤,៣% នៅក្នុងឆ្នាំ២០២៦ (ធៀបនឹង ៤,៤% នៅឆ្នាំ២០២៥) មុននឹងបន្តថយចុះមកនៅកម្រិត ៣,៧% នៅក្នុងឆ្នាំ២០២៧។

តម្លៃទំនិញខ្ពស់ និងគោលនយោបាយរូបិយវត្ថុតឹងរ៉ឹង ដែលផ្នែកខ្លះបណ្តាលមកពីជម្លោះនៅតំបន់អាស៊ីខាងលិច ត្រូវបានគេរំពឹងថានឹងជះឥទ្ធិពលអវិជ្ជមានដល់តម្រូវការរបស់គ្រួសារ និងការវិនិយោគនៅក្នុងវិស័យផលិតកម្ម និងសេវាកម្មបែបប្រពៃណី៕

ដោយ៖ យា ចិន្ដាខន្ដី (ប្រភព៖ VNA)