AKP ភ្នំពេញ ថ្ងៃទី២៩ ខែកញ្ញា ឆ្នាំ២០២៦ -- យោងតាមគេហទំព័ររបស់អង្គការអន្តរជាតិ Skytrax បានឱ្យដឹងថា ក្រុមហ៊ុនអាកាសចរណ៍ប៊ុលហ្គារីអ៊ែរ ត្រូវបានចាត់ថ្នាក់ជាក្រុមហ៊ុនអាកាសចរណ៍មួយក្នុងចំណោមក្រុមហ៊ុនល្អបំផុតទាំង៥ នៅអឺរ៉ុបខាងកើត នៅក្នុងព្រឹត្តិការណ៍ពានរង្វាន់អាកាសចរណ៍ពិភពលោកឆ្នាំ២០២៦។ ក្រុមហ៊ុនអាកាសចរណ៍ជាតិមួយនេះស្ថិតនៅចំណាត់ថ្នាក់ទី៤ ក្នុងតំបន់ ដែលបង្ហាញពីការរីកចម្រើនគួរឱ្យកត់សម្គាល់បើធៀបនឹងចំណាត់ថ្នាក់របស់ខ្លួនកាលពីឆ្នាំ២០២៥។

ការផ្តល់ចំណាត់ថ្នាក់ពានរង្វាន់អាកាសចរណ៍ពិភពលោក គឺផ្អែកលើការវាយតម្លៃរបស់អ្នកដំណើរមកពីបណ្តាប្រទេស និងទីផ្សារផ្សេងៗគ្នាដោយគ្របដណ្តប់លើធាតុសំខាន់ៗនៃបទពិសោធន៍ធ្វើដំណើរទាំងមូលដែលរួមមាន សេវាកម្មនៅព្រលានយន្តហោះ និងនៅលើជើងហោះហើរផាសុកភាពក្នុងកាប៊ីនយន្តហោះ គុណភាពនៃសេវាកម្ម និងអាកប្បកិរិយារបស់បុគ្គលិកបម្រើការងារលើយន្តហោះ។

ក្រុមហ៊ុនអាកាសចរណ៍ល្អបំផុតទាំង៥ នៅអឺរ៉ុបខាងកើត រួមមានក្រុមហ៊ុនអ៊ែរបាល់ទីក របស់ប្រទេសឡាតវី ឈរនៅលំដាប់ទីមួយ បន្ទាប់មកគឺក្រុមហ៊ុនអ៊ែរ ស៊ែរប៊ី ក្រុមហ៊ុនចចជៀ អ៊ែរវេស៍ និងក្រុមហ៊ុនអាកាសចរណ៍ជាតិ TAROM របស់ប្រទេសរូម៉ានី។

នៅលើឆាកអន្តរជាតិ ក្រុមហ៊ុនអាកាសចរណ៍សិង្ហបុរីអ៊ែរឡាញស៍ ត្រូវបានជ្រើសរើសជាក្រុមហ៊ុនអាកាសចរណ៍ល្អបំផុតរបស់ពិភពលោកសម្រាប់ឆ្នាំ២០២៦ បន្ទាប់មក គឺក្រុមហ៊ុនអាកាសចរណ៍កាតាអ៊ែរវេស៍ និងក្រុមហ៊ុនអាកាសចរណ៍កាថេ ប៉ាស៊ីហ្វិក។

សម្រាប់តំបន់អឺរ៉ុបទាំងមូល ក្រុមហ៊ុនអាកាសចរណ៍តួកគីអ៊ែរឡាញស៍ឈរនៅចំណាត់ថ្នាក់ទីមួយ។ ក្រុមហ៊ុនអាកាសចរណ៍ផ្សេងទៀតដែលមានឈ្មោះក្នុងបញ្ជីចំណាត់ថ្នាក់នេះ រួមមាន ក្រុមហ៊ុនអ៊ែរហ្វ្រង់ (ដែលត្រូវបានជ្រើសរើសជាក្រុមហ៊ុនអាកាសចរណ៍ល្អបំផុតនៅអឺរ៉ុបខាងលិចផងដែរ) ក្រុមហ៊ុនអាកាសចរណ៍លូហ្វថាន់សា និងក្រុមហ៊ុនអាកាសចរន៍អ៊ីបឺរីយ៉ា។

ក្រុមហ៊ុនកាតាអ៊ែរវេស៍ ឈរនៅកំពូលតារាងសម្រាប់តំបន់មជ្ឈិមបូព៌ាខណៈដែលក្រុមហ៊ុនអាកាសចរណ៍អ៊ែរកាណាដា ឈរនៅកំពូលសម្រាប់តំបន់អាម៉េរិកខាងជើង និងក្រុមហ៊ុនអាកាសចរណ៍ LATAM សម្រាប់តំបន់អាម៉េរិកខាងត្បូង និងក្រុមហ៊ុនអាកាសចរណ៍កូប៉ា អ៊ែរឡាញស៍ សម្រាប់តំបន់អាម៉េរិកកណ្តាល និងតំបន់ការ៉ាបៀន។

ក្រុមហ៊ុនអាកាសចរណ៍ប៊ុលហ្គារីអ៊ែរ គឺជាក្រុមហ៊ុនអាកាសចរណ៍ជាតិរបស់ប្រទេសប៊ុលហ្គារី ដែលបានចាប់ផ្តើមប្រតិបត្តិការនៅថ្ងៃទី០៤ ខែធ្នូឆ្នាំ២០០២ ក្នុងនាមជាក្រុមហ៊ុនដែលបន្តវេនពីក្រុមហ៊ុនអាកាសចរណ៍បាល់កាន់ប៊ុលហ្គារីអ៊ែរឡាញស៍៕

ដោយ៖ យា ចិន្ដាខន្ដី (ប្រភព៖ BTA)