AKP ភ្នំពេញ ថ្ងៃទី២៨ ខែកញ្ញា ឆ្នាំ២០២៦-- អង្គភាពប្រឆាំងអំពើពុករលួយ ឬហៅថាACUបានបញ្ជាក់ពីការ ចូលរួមតាមដាន និងត្រួតពិនិត្យឯកសារដាក់ពាក្យរបស់បេក្ខជនផ្ទាល់នៅគ្រប់ទីតាំង ដើម្បីទប់ស្កាត់ការប្រើប្រាស់ឯកសារក្លែងក្លាយក្នុងការប្រឡងចូលរៀនក្នុងវិស័យសុខាភិបាល ឆ្នាំ២០២៦-២០២៧។ ការចូលរួមដើម្បីប្រឆាំងទៅនឹងការប្រព្រឹត្តិអំពើពុករលួយនេះដែរគឺ ក្រោមពាក្យថាពង្រឹងតម្លាភាព យុត្ដិធម៌ ប្រសិទ្ធភាព និងភាពស្អាតស្អំ។

អង្គភាពប្រឆាំងអំពើពុករលួយបានឱ្យដឹងដែរថា ការប្រឡងចូលរៀនក្នុងវិស័យសុខាភិបាល ឆ្នាំ២០២៦-២០២៧ ដែលនៅថ្ងៃទី២៨ ខែកញ្ញា ឆ្នាំ២០២៦ គឺជាថ្ងៃទី១ នៃការបើកទទួលពាក្យមានបេក្ខជនយ៉ាងច្រើនកុះករ បានមកដាក់ពាក្យប្រឡង។គណៈកម្មាធិការប្រឡងថា្នក់ជាតិសម្រាប់ការបណ្ដុះបណ្ដាលក្នុងវិស័យសុខាភិបាល (គ.ប.ជ.) និងអង្គភាពប្រឆាំងអំពើពុករលួយ (អ.ប.ព.) បានសហការរៀបចំការទទួលពាក្យប្រឡងចូលរៀនថ្នាក់ឆ្នាំសិក្សាមូលដ្ឋានសម្រាប់កម្រិតបរិញ្ញាបត្រ នៅតាមគ្រឹះស្ថានបណ្ដុះបណ្ដាលក្នុងវិស័យសុខាភិបាលឆ្នាំសិក្សា២០២៦-២០២៧ ដោយរៀបចំកន្លែងទទួលពាក្យផ្ទាល់ពីបេក្ខជន ថតរូប ថតខ្ចៅដៃរបស់បេក្ខជនដោយម៉ាស៊ីនកាមេរ៉ាទំនើបបំផុត។

ជាមួយគ្នានេះ គណៈកម្មាធិការប្រឡងថា្នក់ជាតិសម្រាប់ការបណ្ដុះបណ្ដាលក្នុងវិស័យសុខាភិបាល និងអង្គភាពប្រឆាំងអំពើពុករលួយ នឹងអនុវត្ដវិធានការតឹងរ៉ឹងចំពោះបេក្ខជនដែលក្លែងឯកសារដាក់ពាក្យ និងអ្នកមកប្រឡងជំនួសដោយមានចំណាត់ការផ្លូវច្បាប់ភ្លាមៗ និងកសាងសំណុំរឿងបញ្ជូនទៅតុលាការ។

សូមបញ្ជាក់ថា ការទទួលពាក្យប្រឡងនេះ រហូតដល់ថ្ងៃទី៩ ខែតុលា ឆ្នាំ២០២៦ ហើយ បេក្ខជនអាចដាក់ពាក្យនៅទីតាំងណាមួយក៏បាន ក្នុងចំណោមទីតាំងទាំង ៥ កន្លែង ដូចខាងក្រោមដូចជា៖ ១- អង្គភាពប្រឆាំងអំពើពុករលួយ ២- សាលាមធ្យមសិក្សាសុខាភិបាលភូមិភាគកំពត ៣- សាលាមធ្យមសិក្សាសុខាភិបាលភូមិភាគបាត់ដំបង ៤- សាលាមធ្យមសិក្សាសុខាភិបាលភូមិភាគកំពង់ចាម ៥- សាលាមធ្យមសិក្សាសុខាភិបាលភូមិភាគស្ទឹងត្រែង៕

ដោយ៖ មករា