AKP បន្ទាយមានជ័យ ថ្ងៃទី២៤ ខែកញ្ញា ឆ្នាំ២០២៦-- បណ្ណកម្មសិទ្ធិដីធ្លីចំនួន ៩.៨២៦បណ្ណ ត្រូវបានរៀបចំចែកជូនប្រជាពលរដ្ឋនៅក្នុងភូមិចំនួន ១១ នៃស្រុកម៉ាឡៃ ខេត្តបន្ទាយមានជ័យ ដែលជាសក្ខីភាពមួយបង្ហាញពីការបន្តពង្រឹងសុវត្ថិភាពនៃសិទ្ធិកាន់កាប់ និងកម្មសិទ្ធិអចលនវត្ថុរបស់ប្រជាពលរដ្ឋ ក៏ដូចជាការបង្កើនទំនុកចិត្តរបស់ប្រជាពលរដ្ឋលើការគ្រប់ គ្រង និងការចុះបញ្ជីដីធ្លីតាមផ្លូវច្បាប់។

ពិធីចែកវិញ្ញាបនបត្រសម្គាល់ម្ចាស់អចលនវត្ថុនេះ ត្រូវបានរៀបចំឡើងដោយមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តបន្ទាយមាន ជ័យ និងរដ្ឋបាលស្រុកម៉ាឡៃ នៅសាលា បឋមសិក្សាហ៊ុន សែន ទួលពង្រ កាលពីថ្ងៃទី២៣ ខែកញ្ញា ឆ្នាំ២០២៦ ក្រោមអធិបតីភាពលោក ឈឿន ក្រៃយ៉ុង អភិបាលរង នៃគណៈអភិបាលខេត្តបន្ទាយមានជ័យ។
 
បណ្ណទាំង ៩.៨២៦បណ្ណនេះ ត្រូវបានចែកជូនប្រជាពលរដ្ឋមកពីភូមិទួលពង្រ ភូមិបន្ទាយទី១ ភូមិរស្មីមានជ័យ ភូមិអភិវឌ្ឍន៍ ភូមិបឹងឈូក ភូមិអូរកេស ភូមិបឹង៧៥តេជោឈ្នះឈ្នះ ក្នុងឃុំទួលពង្រ និងភូមិសង្កែ ភូមិភ្នំរូង ភូមិជ្រៃ និងភូមិចំបក់ ក្នុងឃុំបឹងបេង ស្រុកម៉ាឡៃ។

ក្នុងឱកាសសំណេះសំណាល លោក ឈឿន ក្រៃយ៉ុង បានគូសបញ្ជាក់ថា ការផ្តល់វិញ្ញាបនបត្រសម្គាល់ម្ចាស់អចល នវត្ថុនាពេលនេះ មានសារៈសំខាន់យ៉ាងខ្លាំងចំពោះជីវភាព និងអនាគតរបស់ប្រជាពលរដ្ឋ ព្រោះបណ្ណកម្មសិទ្ធិជាឯកសារផ្លូវច្បាប់ដែលបញ្ជាក់ និងធានាសិទ្ធិកម្មសិទ្ធិរបស់ម្ចាស់អចលនវត្ថុ។

លោកបានមានប្រសាសន៍ថា បណ្ណទាំងនេះមិនត្រឹមតែជួយបញ្ចប់ក្តីព្រួយ បារម្ភពាក់ព័ន្ធនឹងសិទ្ធិកាន់កាប់ដីធ្លី ឬដោះស្រាយបញ្ហាវិវាទនានាដែលអាចកើតមានប៉ុណ្ណោះទេ ប៉ុន្តែថែមទាំងជាការទទួលស្គាល់ និងធានានូវសិទ្ធិកម្ម សិទ្ធិស្របច្បាប់ ដែលត្រូវបានការពារដោយច្បាប់នៃព្រះរាជាណាចក្រកម្ពុជាផងដែរ។   

 តាមការលើកឡើងរបស់លោកអភិបាល រងខេត្ត ការទទួលបានបណ្ណកម្មសិទ្ធិដីធ្លី គឺជាការផ្តល់ភាពកក់ក្តៅផ្នែកផ្លូវច្បាប់ដល់គ្រួសារប្រជាពលរដ្ឋ ដោយធ្វើឱ្យម្ចាស់ដីមានឯកសារបញ្ជាក់កម្មសិទ្ធិយ៉ាងច្បាស់លាស់ និងអាចប្រើប្រាស់សិទ្ធិរបស់ខ្លួនតាមច្បាប់។ ជាពិសេស វាអាចរួមចំណែកកាត់បន្ថយហានិភ័យនៃវិវាទ និងបង្កើនភាពច្បាស់លាស់ក្នុងការប្រើប្រាស់ និងផ្ទេរសិទ្ធិលើអចល នវត្ថុ។

លោក ឈឿន ក្រៃយ៉ុង បានលើកឡើងបន្ថែមថា បណ្ណកម្មសិទ្ធិដែលប្រជាពលរ ដ្ឋទទួលបាន គឺជាផលប្រយោជន៍ដែលពួកគាត់អាចយកទៅប្រើប្រាស់ជាមូលដ្ឋានសម្រាប់ការអភិវឌ្ឍជីវភាព និងសេដ្ឋកិច្ចគ្រួសារ ដោយអាចប្រើប្រាស់ឯកសារស្របច្បាប់នេះក្នុងការស្នើសុំកម្ចីពីស្ថាប័នហិរញ្ញវត្ថុ តាមលក្ខខណ្ឌ និងនីតិវិធីច្បាប់ ដើម្បីពង្រីកមុខរបរ បង្កើនប្រាក់ចំណូល និងលើកកម្ពស់ជីវភាពគ្រួសារ។
 
ជាមួយគ្នានេះ លោកបានចាត់ទុកការផ្តល់បណ្ណកម្មសិទ្ធិដល់ប្រជាពលរដ្ឋថា ជាផ្នែកមួយនៃការអនុវត្តគោលនយោ បាយដែលផ្តោតលើសុខទុក្ខ និងផលប្រយោជន៍របស់ប្រជាពលរដ្ឋ ដោយធានាឱ្យការកាន់កាប់ និងប្រើប្រាស់ដីធ្លីប្រព្រឹត្តទៅប្រកបដោយភាពច្បាស់លាស់ និងស្របតាមច្បាប់។

សម្រាប់ប្រជាពលរដ្ឋដែលបានទទួលបណ្ណកម្មសិទ្ធិ ការទទួលបានឯកសារផ្លូវច្បាប់នេះ ក៏ជាការបញ្ចប់នូវការរង់ចាំ និងភាពមិនច្បាស់លាស់មួយផ្នែកទាក់ទងនឹងសិទ្ធិលើដីធ្លីរបស់ពួកគាត់ផងដែរ។ ពួកគាត់អាចមានទំនុកចិត្តកាន់តែខ្លាំងក្នុងការកាន់កាប់ ប្រើប្រាស់ និងអភិវឌ្ឍអចលនវត្ថុរបស់ខ្លួនសម្រាប់ជីវភាពគ្រួសារ។

ប្រជាពលរដ្ឋម្នាក់ក្នុងចំណោមអ្នកទទួលបណ្ណបានបង្ហាញក្តីសប្បាយរីករាយថា ការទទួលបានបណ្ណកម្មសិទ្ធិធ្វើឱ្យគ្រួសារមានភាពកក់ក្តៅ និងទំនុកចិត្តកាន់តែខ្លាំង ព្រោះមានឯកសារផ្លូវការបញ្ជាក់ថា ដីដែលខ្លួនកាន់កាប់មានការទទួលស្គាល់តាមច្បាប់។ ប្រជាពលរដ្ឋរូបនេះបានចាត់ទុកបណ្ណកម្មសិទ្ធិជាទ្រព្យសម្បត្តិមានតម្លៃសម្រាប់គ្រួសារ និងជាមូលដ្ឋានសម្រាប់បន្តអភិវឌ្ឍជីវភាពនៅថ្ងៃអនាគត។

គួរបញ្ជាក់ថា ការចែកវិញ្ញាបនបត្រសម្គាល់ម្ចាស់អចលនវត្ថុនេះ មានរយៈពេល ៧ថ្ងៃ ចាប់ពីថ្ងៃទី២៣ ដល់ថ្ងៃទី២៩ ខែកញ្ញា ឆ្នាំ២០២៦។ បន្ទាប់ពីផុតរយៈពេលកំណត់នេះ មន្ត្រីជំនាញរបស់មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តបន្ទាយមាន ជ័យ នឹងបន្តចែកបណ្ណជូនប្រជាពលរដ្ឋដែលមិនទាន់មកទទួល នៅទីតាំងមន្ទីរ ក្នុងរៀងរាល់ម៉ោងធ្វើការ ដោយមិនកំណត់រយៈពេល៕

ដោយ ៖ឈុនសារ៉ាត