AKP កំពង់ធំ ថ្ងៃទី២១ខែកញ្ញា ឆ្នាំ២០២៦ -- ឧត្តមសេនីយ៍ទោ សោម ស៊ុន មេបញ្ជា ការតំបន់ប្រតិបត្តិការសឹករងកំពង់ធំកាលពីរសៀលថ្ងៃទី២០ខែកញ្ញាឆ្នាំ ២០២៦បានដឹកនាំសហការី នាំយកប្រេងឥន្ធនៈ ស្បៀងអាហារ គ្រឿងឧប ភោគបរិភោគ អំណោយរបស់សម្ដេចមហាបវរធិបតី ហ៊ុន ម៉ាណែតនិងលោកជំទាវបណ្ឌិត ពេជ ចន្ទមុន្នី តាមរយៈឯកឧត្តមនាយឧត្តមសេនីយ៍ ម៉ៅ សុផាន់ អគ្គមេបញ្ជាការរងនៃកងយោធពលខេមរភូមិន្ទមេបញ្ជាការកងទ័ពជើងគោកនិងជាប្រធានក្រុម ការងាររាជរដ្ឋាភិបាលចុះមូលដ្ឋានស្រុកសណ្ដាន់ខេត្តកំពង់ធំ ទៅប្រគល់ជូនអាជ្ញាធរឃុំនិងអ្នកបើកបរសាឡាងចំនួន២ គ្រឿងដើម្បីដឹកជញ្ជូនប្រជាព លរដ្ឋនិងសិស្សានុសិស្សឆ្លងកាត់ដងស្ទឹងសែននៅឃុំមានជ័យនិងឃុំខ្លែងស្រុកសណ្ដាន់ ខេត្តកំពង់ធំ។

ឧត្តមសេនីយ៍ទោ សោម ស៊ុន បានបញ្ជាក់ថា កន្លងទៅនេះ ដើម្បីសម្រួលដល់ការធ្វើដំណើររបស់ប្រជាពលរដ្ឋនិងសិស្សានុសិស្សក្នុងការឆ្លងកាត់ដងស្ទឹងសែននារដូវវស្សានៅឃុំមានជ័យនិងឃុំខ្លែង ស្រុកណ្ដាន់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរា ជាណាចក្រកម្ពុជា បានឧបត្ថម្ភសាឡាង ចំនួន២គ្រឿង តាមរយៈឯកឧត្តម នួន ផារ័ត្ន អភិបាលខេត្តកំពង់ធំ ហើយជាមួយនេះដែរ សម្ដេចមហាបវរធិបតី ហ៊ុន ម៉ាណែត និងលោកជំទាវ ក៏បានឧបត្ថម្ភស្បៀងអាហារនឹងប្រេងឥន្ធនៈ នៅរៀងរាល់រដូវវស្សា តាមរយៈ ឯកឧត្ត មនាយឧត្តមសេនីយ៍ ម៉ៅ សុផាន់ដើម្បីបម្រើឱ្យការដឹកជញ្ជូនប្រជាពលរដ្ឋនិងសិស្សានុសិស្សធានាបានសុវត្ថិភាពនិងទាន់ពេលវេលា។

នៅ​ក្នុង​ឱកាសនោះឧត្តម​សេនីយ៍​ទោ​ សោម​ ស៊ុន​ បាន​ណែនាំ​ដល់​ក្រុម​អ្នក​បេីក​បរសាឡាង​ទាំង​ពីរ​គ្រឿង​ ត្រូវ​បន្ត​យក​ចិត្ត​ទុក​ដាក់​ក្នុង​ការ​ថែរក្សា​សម្ភារៈ​ បច្ចេកទេសឱ្យបាន​ល្អដេីម្បី​ធានា​បាន​នូវ​ការ​ប្រើប្រាស់​បាន​យូរ​អង្វែង​ សម្រាប់​បម្រើ​ប្រជាពលរដ្ឋ​យើង​ ។ 

ចំណែកលោក កែវ ភា ជំទប់ទី១ និងជាតំណាងឱ្យលោក សុទ្ធ ធឿន ប្រធានក្រុមប្រឹក្សាឃុំមានជ័យ ស្រុកសណ្តាន់ បានសូមគោរពថ្លែងអំណរគុណដ៏ជ្រាលជ្រៅជាទីបំផុតចំពោះសម្ដេចមហាបវរធិបតី ហ៊ុន ម៉ាណែត និងលោកជំទាវ តាមរយៈឯកឧត្តម នួន ផារ័ត្ន អភិបាល  ខេត្តកំពង់ធំ ដែលបានឧបត្ថម្ភសាឡាងចំនួន ២ គ្រឿង និងសូមគោរពថ្លែងអំណរគុណចំពោះឯកឧត្តមនាយឧត្តមសេនីយ៍ ម៉ៅ សុផាន់ ប្រធានក្រុមការងាររាជរដ្ឋាភិបាលចុះមូលដ្ឋានស្រុកសណ្ដាន់ ដែលបានឧបត្ថម្ភប្រេងឥន្ធនៈ និងស្បៀងអាហារជាបន្តបន្ទាប់សម្រាប់ធានាដល់ការដឹកជញ្ជូនប្រជាពលរដ្ឋឆ្លងកាត់ដងស្ទឹងសែននៅឃុំមានជ័យនិងឃុំខ្លែង នាពេលកន្លងទៅក៏ដូចជាបច្ចុប្បន្ននេះសូមគោរពជូនពរសម្ដេចនិងលោកជំទាវព្រមទាំងឯកឧត្តមអភិបាលខេត្ត និងឯកឧត្តមនាយឧត្តមសេនីយ៍ សូមទទួលបាននូវពុទ្ធពរទាំង៤ប្រការកុំបីឃ្លៀងឃ្លាតឡើយ៕

ដោយ៖ ស៊ុម វណ្ណា