AKP ភ្នំពេញ ថ្ងៃទី១៧ ខែកញ្ញា ឆ្នាំ២០២៦ -- លោក ស៊ី តៃហ្វេង (Shi Taifeng) មន្ត្រីជាន់ខ្ពស់នៃបក្សកុម្មុយនីស្តចិន (CPC) បានជួបពិភាក្សាការងារជាមួយលោក ចាន់ ជុនស៊ីង (Chan Chun Sing) រដ្ឋមន្ត្រីសម្របសម្រួលកិច្ចការសេវាសាធារណៈ និងជារដ្ឋមន្ត្រីក្រសួងការពារជាតិរបស់ប្រទេសសិង្ហបុរី នៅទីក្រុងប៉េកាំង កាលពីថ្ងៃអង្គារ។

លោក ស៊ី ដែលជាសមាជិកការិយាល័យនយោបាយនៃគណៈកម្មាធិការមជ្ឈិមបក្ស CPC និងជាប្រធាននាយកដ្ឋានរៀបចំនៃគណៈកម្មាធិការមជ្ឈិមបក្ស CPC បានមានប្រសាសន៍ថា ប្រទេសចិនមានឆន្ទៈសហការជាមួយប្រទេសសិង្ហបុរី ដើម្បីអនុវត្តន៍យ៉ាងម៉ត់ចត់នូវការឯកភាពគ្នាដ៏សំខាន់ដែលសម្រេចបានដោយថ្នាក់ដឹកនាំនៃប្រទេសទាំងពីរពង្រឹងការទំនាក់ទំនងជាយុទ្ធសាស្ត្រ ពង្រីកកិច្ចសហប្រតិបត្តិការជាក់ស្តែងនិងជំរុញការអភិវឌ្ឍទំនាក់ទំនងទ្វេភាគីឱ្យកាន់តែប្រសើរឡើង។

លោក ស៊ី ក៏បានជម្រាបជូនរដ្ឋមន្ត្រីរូបនេះអំពីកិច្ចខិតខំប្រឹងប្រែងរបស់បក្ស CPC ក្នុងការសិក្សាអំពី «គំនិតរបស់លោក ស៊ី ជីនពីង (Xi Jinping)ស្តីពីការកសាងបក្ស» ក៏ដូចជាការបង្កើត និងការអនុវត្តការយល់ដឹងត្រឹមត្រូវអំពីអត្ថន័យនៃការបំពេញការងារឱ្យបានល្អក្នុងចំណោមមន្ត្រីផងដែរ។

លោក ចាន់ បានមានប្រសាសន៍ថា ភាគីសិង្ហបុរីមានឆន្ទៈពង្រឹងការផ្លាស់ប្តូរ និងការរៀនសូត្រពីគ្នាទៅវិញទៅមកជាមួយប្រទេសចិន ព្រមទាំងពង្រីកកិច្ចសហប្រតិបត្តិការលើវិស័យនានា ដូចជាការបណ្តុះបណ្តាលធនធានមនុស្សដែលមានសមត្ថភាពខ្ពស់ ដើម្បីនាំមកនូវផលប្រយោជន៍កាន់តែច្រើនដល់ប្រជាជននៃប្រទេសទាំងពីរ៕

ដោយ៖ មូល មិនា (ប្រភព៖ ភីបផលដេលី)