AKP ភ្នំពេញ ថ្ងៃទី១៥ ខែកញ្ញា ឆ្នាំ២០២៦ -- ប្រធានាធិបតីកូរ៉េខាងត្បូងលោក លី ជេម្យុង (Lee Jae-myung) បានជួបពិភាក្សាកំពូលជាមួយសមភាគីអ៊ូសបេគីស្ថាន លោក សាវកាត់ មៀហ្សីយ៉ូយ៉េវ (Shavkat Mirziyoyev) កាលពីថ្ងៃចន្ទ ដោយបានបង្ហាញក្តីសង្ឃឹមថា ប្រទេសទាំងពីរនឹងពង្រឹងភាពជាដៃគូយុទ្ធសាស្ត្រទ្វេភាគីរបស់ខ្លួនបន្ថែមទៀត ដើម្បីវិបុលភាពទៅវិញទៅមក។

កិច្ចប្រជុំកំពូលនេះត្រូវបានធ្វើឡើងមុនពេលទីក្រុងសេអ៊ូលធ្វើជាម្ចាស់ផ្ទះរៀបចំកិច្ចប្រជុំកំពូលកូរ៉េខាងត្បូង-អាស៊ីកណ្តាល ជាលើកដំបូងនៅថ្ងៃពុធ ដែលនឹងប្រមូលផ្តុំប្រមុខរដ្ឋនៃប្រទេសកាហ្សាក់ស្ថាន អ៊ូសបេគីស្ថានតួកមេនីស្ថាន តាជីគីស្ថាន និងកៀហ្ស៊ីស៊ីស្ថាន ដើម្បីពិភាក្សាអំពីកិច្ចសហប្រតិបត្តិការ។

លោក មៀហ្សីយ៉ូយ៉េវ គឺជាប្រធានាធិបតីដំបូងគេដែលមកបំពេញទស្សនកិច្ចពីតំបន់នេះ ដើម្បីជួបពិភាក្សាទ្វេភាគីជាមួយលោក លី មុនពេលកិច្ចប្រជុំកំពូលពហុភាគីចាប់ផ្តើម។

លោក លី បានមានប្រសាសន៍ថា «ចាប់តាំងពីការបង្កើតទំនាក់ទំនងការទូតនៅឆ្នាំ១៩៩២ មក ប្រទេសកូរ៉េខាងត្បូង និងអ៊ូសបេគីស្ថាន បានកសាងទំនាក់ទំនងសហប្រតិបត្តិការដ៏រឹងមាំលើវិស័យជាច្រើន ចាប់ពីនយោបាយ និងសេដ្ឋកិច្ច រហូតដល់វិស័យសង្គម និងវប្បធម៌»។ លោកក៏បានគូសបញ្ជាក់ផងដែរថា ប្រទេសអ៊ូសបេគីស្ថានគឺជាប្រទេសតែមួយគត់នៅអាស៊ីកណ្តាល ដែលទីក្រុងសេអ៊ូលមានភាពជាដៃគូយុទ្ធសាស្ត្រពិសេសជាមួយ។

ប្រធានាធិបតីកូរ៉េខាងត្បូងរូបនេះបានមានប្រសាសន៍ថា៖ «ខ្ញុំសង្ឃឹមថាប្រទេសទាំងពីរ ដោយផ្អែកលើមិត្តភាព និងទំនុកចិត្តដ៏ជ្រាលជ្រៅដែលមានមកជាយូរមកហើយនោះ នឹងអភិវឌ្ឍភាពជាដៃគូយុទ្ធសាស្ត្រពិសេសរបស់ខ្លួនឱ្យកាន់តែពេញលេញ និងបោះជំហានទៅមុខជាមួយគ្នាឆ្ពោះទៅរកវិបុលភាព និងសន្តិភាពទៅវិញទៅមក»។

ប្រធានាធិបតីរូបនេះបានលើកឡើងពីវិស័យនានាដូចជា ការដឹកជញ្ជូនហេដ្ឋារចនាសម្ព័ន្ធ សុខាភិបាល ខ្សែសង្វាក់ផ្គត់ផ្គង់រ៉ែសំខាន់ៗ បញ្ញាសិប្បនិម្មិត (AI) និងឧស្សាហកម្មការពារជាតិ ជាដើម ដែលប្រទេសទាំងពីរអាចសហការគ្នាដើម្បីពង្រីកកិច្ចសហប្រតិបត្តិការក្នុងលក្ខណៈផ្តល់ផលប្រយោជន៍ទៅវិញទៅមក និងបង្កើតកំណើននាពេលអនាគត៕

ដោយ៖ មូល មិនា (ប្រភព៖ យ៉ុនហាប់)