AKP ភ្នំពេញ ថ្ងៃទី១៥ ខែកញ្ញា ឆ្នាំ២០២៦ -- យោងតាមការបង្ហោះលើបណ្តាញសង្គមដោយរដ្ឋមន្ត្រីការបរទេសអូម៉ង់ លោក សាយយីដ បាដឺ ប៊ីន ហាម៉ាដ អាល់ ប៊ូសៃឌី (Sayyid Badr bin Hamad Al Busaidi) កាលពីថ្ងៃអាទិត្យ កិច្ចប្រជុំរវាងអ៊ីរ៉ង់ និងបណ្តាប្រទេសនៅតំបន់ឈូងសមុទ្រ ដែលគ្រោងនឹងធ្វើឡើងនៅទីក្រុងសាឡាឡាហ៍ របស់ប្រទេសអូម៉ង់ កាលពីថ្ងៃចន្ទ ត្រូវបានពន្យារពេល។

លោក អាល់ ប៊ូសៃឌី បានសរសេរនៅលើបណ្តាញសង្គមអ៊ិចថា«ដើម្បីផលប្រយោជន៍នៃការឯកភាពគ្នា កិច្ចប្រជុំថ្នាក់តំបន់ដែលគ្រោងធ្វើឡើងនៅថ្ងៃស្អែកក្នុងទីក្រុងសាឡាឡាហ៍ ត្រូវបានពន្យារពេល»។

លោកបានបន្ថែមថា៖ «យើងនៅតែប្តេជ្ញាចិត្តក្នុងការជំរុញកិច្ចសន្ទនាដែលគាំទ្រដល់ស្ថិរភាព និងកិច្ចសហប្រតិបត្តិការប្រកបដោយនិរន្តរភាពនៅក្នុងតំបន់របស់យើង»។

ដោយបញ្ជាក់ពីការពន្យារពេលនៃកិច្ចប្រជុំនេះនៅក្នុងបទសម្ភាសន៍ជាមួយទីភ្នាក់ងារព័ត៌មានផ្លូវការរបស់អ៊ីរ៉ង់ (IRNA) លោក ម៉ូហាម៉ាដ អាលី បាក (Mohammad Ali Bak) អគ្គនាយកទទួលបន្ទុកកិច្ចការតំបន់ឈូងសមុទ្រពែរ្សនៅក្រសួងការបរទេសអ៊ីរ៉ង់ បាននិយាយថា កិច្ចប្រជុំនេះត្រូវបានពន្យារពេលទៅពេលក្រោយ តាមសំណើរបស់ប្រទេសមួយចំនួនក្នុងតំបន់ និងផ្អែកលើការសម្រេចចិត្តរួមគ្នារវាងអ៊ីរ៉ង់ និងអូម៉ង់។

មន្ត្រីរូបនេះបានសង្កត់ធ្ងន់ថា ប្រទេសអ៊ីរ៉ង់កំពុងពិភាក្សាគ្នាយ៉ាងជិតស្និទ្ធជាមួយប្រទេសអូម៉ង់ ដើម្បីធានាឱ្យមានការរៀបចំ និងការសម្របសម្រួលចាំបាច់នានា ពាក់ព័ន្ធនឹងពេលវេលាសមស្របសម្រាប់ការរៀបចំកិច្ចប្រជុំនេះ។

លោក អេស្មាអ៊ីល បាហ្គាអ៊ី (Esmaeil Baghaei) អ្នកនាំពាក្យក្រសួងការបរទេសអ៊ីរ៉ង់ បានប្រកាសកាលពីថ្ងៃសុក្រថា រដ្ឋមន្ត្រីការបរទេសនៃបណ្តាប្រទេសជាប់តំបន់ឈូងសមុទ្រ មានគម្រោងជួបប្រជុំគ្នានៅប្រទេសអូម៉ង់នៅថ្ងៃចន្ទ ដើម្បីផ្លាស់ប្តូរទស្សនៈលើបញ្ហាតំបន់ រួមទាំងកិច្ចពិភាក្សារវាងអ៊ីរ៉ង់ និងអូម៉ង់ស្តីពីការកំណត់ផ្លូវសុវត្ថិភាពនៅក្នុងច្រកសមុទ្រហ័រមូស៕

ដោយ៖ មូល មិនា (ប្រភព៖ ស៊ីនហួ)