AKP ភ្នំពេញ ថ្ងៃទី១៥ ខែកញ្ញា ឆ្នាំ២០២៦ -- កាលពីថ្ងៃអាទិត្យប្រធានាធិបតីម៉ុងហ្គោលី លោក យូកណាអា គូរេលស៊ូក (UkhnaaKhurelsukh) បានមានប្រសាសន៍ថា រោងចក្រវារីអគ្គិសនី Erdeneburenដែលស្ថិតនៅក្នុងខេត្តចូវ ភាគខាងលិចប្រទេស គឺជាលទ្ធផលដ៏សំខាន់មួយនៃកិច្ចសហប្រតិបត្តិការជាក់ស្តែងរវាងប្រទេសម៉ុងហ្គោលី និងប្រទេសចិន។

ក្នុងអំឡុងពេលចុះពិនិត្យការដ្ឋានសាងសង់ និងទទួលបានរបាយការណ៍ស្តីពីវឌ្ឍនភាពនៃគម្រោងនេះ លោក គូរេលស៊ូក បានលើកឡើងថា ប្រទេសម៉ុងហ្គោលីនឹងចាត់ទុកគម្រោងនេះជាឱកាសមួយដើម្បីពង្រឹងកិច្ចសហប្រតិបត្តិការជាក់ស្តែងជាមួយប្រទេសចិនបន្ថែមទៀតនៅក្នុងវិស័យថាមពល និងហេដ្ឋារចនាសម្ព័ន្ធ។

ប្រធានាធិបតីម៉ុងហ្គោលីរូបនេះ បានកោតសរសើរចំពោះការអនុវត្តកិច្ចសន្យា និងការគ្រប់គ្រងការសាងសង់របស់ភាគីចិន ព្រមទាំងបានថ្លែងអំណរគុណដល់រដ្ឋាភិបាលចិនសម្រាប់ការគាំទ្រយ៉ាងខ្លាំងក្លាចំពោះគម្រោងនេះ។

លោក កៅ លី (Cao Li) អនុប្រធានបេសកកម្ម (acting chargé d'affaires) នៃស្ថានទូតចិនប្រចាំនៅប្រទេសម៉ុងហ្គោលី បានមានប្រសាសន៍ថា ប្រទេសចិនត្រៀមខ្លួនរួចរាល់ក្នុងការសហការយ៉ាងជិតស្និទ្ធជាមួយម៉ុងហ្គោលី ដើម្បីអនុវត្តន៍ការឯកភាពគ្នាដ៏សំខាន់រវាងប្រមុខរដ្ឋទាំងពីរ ពង្រឹងទំនុកចិត្តយុទ្ធសាស្ត្រទៅវិញទៅមក ពង្រីកកិច្ចសហប្រតិបត្តិការដែលផ្តល់ផលប្រយោជន៍ដល់គ្នាទៅវិញទៅមក និងកសាងរោងចក្រវារីអគ្គិសនីនេះឱ្យក្លាយជាគម្រោងគំរូដែលមានគុណភាពខ្ពស់ដែលស្របគ្នាយ៉ាងល្អឥតខ្ចោះរវាង «គំនិតផ្តួចផ្តើមអភិវឌ្ឍន៍សកល» និងផែនការអភិវឌ្ឍន៍ «ចក្ខុវិស័យឆ្នាំ ២០៥០» របស់ប្រទេសម៉ុងហ្គោលី។

រោងចក្រនេះត្រូវបានសាងសង់ដោយក្រុមហ៊ុន Power Construction Corporation of China ហើយបច្ចុប្បន្នវាគឺជាគម្រោងវារីអគ្គិសនីដ៏សំខាន់បំផុតរបស់ជាតិសម្រាប់ជីវភាពរស់នៅរបស់ប្រជាជនម៉ុងហ្គោលី។

ជាមួយនឹងសមត្ថភាពផលិតថាមពលសរុប ៩០មេហ្គាវ៉ាត់ គម្រោងនេះត្រូវបានរំពឹងថានឹងធានាបាននូវការផ្គត់ផ្គង់អគ្គិសនីប្រកបដោយស្ថិរភាពដល់ខេត្តចំនួន ៥ នៅភាគខាងលិចប្រទេសម៉ុងហ្គោលី និងបង្កើនសមត្ថភាពផ្គត់ផ្គង់ថាមពលដោយខ្លួនឯងនៅក្នុងតំបន់នេះយ៉ាងខ្លាំងក្លា នៅពេលដែលវាចាប់ផ្តើមដំណើរការពេញលេញ៕

ដោយ៖ មូល មិនា (ប្រភព៖ ភីបផលដេលី)