AKP អង់ការ៉ា, ប្រទេសតួកគី ថ្ងៃទី១៥ ខែកក្កដា ឆ្នាំ២០២៦ -- ការចូលរួមរបស់អ្នកសារព័ត៌មានកម្ពុជា ក្នុងវគ្គបណ្តុះបណ្តាលពិសេស ស្តីពី «សារព័ត៌មានក្នុងសមរភូមិ» (War Journalism) នៅរដ្ឋធានីអង់ការ៉ា ប្រទេសតួកគី គឺជាផ្លែផ្កា និងជាកាតាលីករដ៏សំខាន់មួយក្នុងការជំរុញកិច្ចសហប្រតិបត្តិការលើវិស័យព័ត៌មាន និងប្រព័ន្ធផ្សព្វផ្សាយ រវាងកម្ពុជា និងតួកគី។

កិច្ចសហប្រតិបត្តិការនេះ ស្តែងឱ្យឃើញតាមរយៈការអនុវត្តជាក់ស្តែងនូវអនុស្សរណៈនៃការយោគយល់គ្នា (MoU) ស្តីពី «កិច្ចសហប្រតិបត្តិការលើវិស័យព័ត៌មាន និងការទំនាក់ទំនង» ដែលត្រូវបានចុះហត្ថលេខារវាងរដ្ឋភិបាលនៃប្រទេសទាំងពីរ។

កម្មវិធីបណ្តុះបណ្តាលនេះ រៀបចំឡើងដោយទីភ្នាក់ងារសារព័ត៌មានរដ្ឋតួកគី អាណាដូលូ (AA) សហការជាមួយទីភ្នាក់ងារសហប្រតិបត្តិការ និងអភិវឌ្ឍន៍តួកគី (TIKA) និងបណ្ឌិត្យសភានគរបាលជាតិតួកគី ដែលបានបើកទ្វារទទួលអ្នកសារព័ត៌មានកម្ពុជា ឱ្យទទួលបាននូវការបណ្តុះបណ្តាលកម្រិតស្តង់ដារអន្តរជាតិ​។

ទាក់ទងនឹងចំណុចសំខាន់ៗនៃកិច្ចសហប្រតិបត្តិការរវាងកម្ពុជា និងតួកគី ដែលរួមមាន​ ការផ្លាស់ប្តូរ​ជំនាញ និងបទពិសោធន៍៖ តួកគី ដែលជាប្រទេសមានបទពិសោធន៍ជឿនលឿន និងបច្ចេកវិទ្យាទំនើបលើវិស័យ​ព័ត៌មាន បានចែករំលែកនូវចំណេះដឹងស៊ីជម្រៅដល់អ្នកសារព័ត៌មានកម្ពុជា អំពីបច្ចេកទេសរាយការណ៍ព័ត៌មានក្នុងស្ថានភាពអាសន្ន ការប្រយុទ្ធប្រឆាំងព័ត៌មានក្លែងក្លាយ និងការប្រើប្រាស់ប្រព័ន្ធឌីជីថល។ ការរឹតចំណងមិត្តភាពរវាងស្ថាប័នព័ត៌មានផ្លូវការ៖ កិច្ចសហប្រតិបត្តិការនេះក៏បានពង្រឹងភាពជាដៃគូរវាងទីភ្នាក់ងារសារព័ត៌មានកម្ពុជា (AKP) និងទីភ្នាក់ងារសារព័ត៌មានតួកគីអាណាដូលូ (AA) ដោយបើកផ្លូវឱ្យមានការផ្លាស់ប្តូរព័ត៌មាន រូបភាព និងខ្លឹមសារប្រព័ន្ធផ្សព្វផ្សាយរវាងប្រទេសទាំងពីរដោយផ្ទាល់។ ការលើកកម្ពស់ទូតសាធារណៈ៖ ការបណ្តុះបណ្តាល និងជំនួបផ្ទាល់រវាងអ្នកសារព័ត៌មាននៃប្រទេសទាំងពីរ មិនត្រឹមតែពង្រឹងសមត្ថភាពវិជ្ជាជីវៈប៉ុណ្ណោះទេ ប៉ុន្តែថែមទាំងជួយជម្រុញការយល់ដឹងពីវប្បធម៌ ការប្រៀបធៀបសេដ្ឋកិច្ច និងការកសាងទំនាក់ទំនងរវាងប្រជាជន និងប្រជាជននៃកម្ពុជា-តួកគី ឱ្យកាន់តែស្អិតរមួត។

បើតាមអ្នកជំនាញប្រព័ន្ធផ្សព្វផ្សាយបានគូសបញ្ជាក់ថា ការគាំទ្រយ៉ាងសកម្មពីសំណាក់រដ្ឋាភិបាលតួកគី តាមរយៈទីភ្នាក់ងារ TIKA ក្នុងការផ្តល់អាហារូបករណ៍ និងវគ្គហ្វឹកហ្វឺនដល់កម្ពុជា គឺជាសក្ខីភាពយ៉ាងច្បាស់អំពីឆន្ទៈនយោបាយក្នុងការលើកកម្ពស់សមត្ថភាពអ្នកសារព័ត៌មានកម្ពុជា ឱ្យដើរទាន់កម្រិតតំបន់ និងសកលលោក។

កិច្ចសហប្រតិបត្តិការនេះ មិនត្រឹមតែជាកាយវិការនៃមិត្តភាពផ្នែកការទូតប៉ុណ្ណោះទេ ប៉ុន្តែជាជំហានយុទ្ធសាស្ត្រក្នុងការកសាងប្រព័ន្ធផ្សព្វផ្សាយកម្ពុជា ឱ្យកាន់តែមានភាពអាជីព ឯករាជ្យភាព និងមានសុវត្ថិភាពខ្ពស់ក្នុងការបំពេញបេសកកម្មបម្រើសាធារណជន។

សូមបញ្ជាក់ផងដែរថា អ្នកសារព័ត៌មានកម្ពុជា ២រូប ដែលត្រូវបានជ្រើសរើសឱ្យចូលរួមវគ្គបណ្តុះបណ្តាលដ៏មានសារសំខាន់នេះ រួមមាន៖ លោក យា ចិន្តាខន្តី មកពីទីភ្នាក់ងារសារព័ត៌មានកម្ពុជា(AKP) និងលោក ហ៊ីម ករុណា មកពីទូរទស្សន៍ជាតិកម្ពុជា (TVK)។ វគ្គបណ្តុះបណ្តាលពិសេស ស្តីពី «សារព័ត៌មានសង្គ្រាម» (War Journalism) នេះ នឹងប្រព្រឹត្តទៅចាប់ពីថ្ងៃទី១៤ ដល់ថ្ងៃទី២៥ ខែកញ្ញា ឆ្នាំ២០២៦ នៅទីក្រុងអង់ការ៉ា ប្រទេសតួកគី៕

ដោយ៖ យា ចិន្ដាខន្ដី