AKP កំពង់ធំ ថ្ងៃទី៩ ខែតុលា ឆ្នាំ២០២៦--ក្នុងឱកាសនៃបុណ្យភ្ជុំបិណ្ឌប្រពៃណីជាតិខ្មែរនាពេលខាងមុខនេះ ថ្នាក់ដឹកនាំ មន្ទីរ អង្គភាពចំនួន៤មាន៖ លោក សេង អាន ប្រធានមន្ទីរទេសចរណ៍ លោក ប៉ាតពណ្ណរាយ ប្រធានស្ដីទីមន្ទីរព័ត៌មាន លោក ហា ប៊ុនឡង ប្រធានស្ដីទីមន្ទីរកិច្ចការនារី និងលោក នួន បូរ៉ាវ័ន្ត អនុប្រធានមន្ទីរធនធានទឹក និងឧតុនិយមខេត្តកំពង់ធំ បានចុះសួរសុខទុក្ខនិងនាំយកអំណោយជាស្បៀងអាហារគ្រឿងឧបភោគបរិភោគ ព្រមទាំងថវិកាឧបត្ថម្ភជូនដល់គ្រួសារអតីតយុទ្ធជនចំនួន១៤គ្រួសារនៅមណ្ឌលអភិវឌ្ឍន៍អតីតយុទ្ធជន "មរតកតេជោធិបតី ថ្លុកព្រីង" ស្ថិតក្នុងឃុំក្រយា ស្រុកសន្ទុកខេត្តកំពង់ធំកាលពីរសៀលថ្ងៃទី៨ ខែតុលា ឆ្នាំ២០២៦ និងដោយមានការអញ្ជើញចូលរួមពីការដឹកនាំមន្ត្រីរាជការមន្ទីរអង្គភាពអង្គភាពពាក់ព័ន្ធមួយចំនួនទៀត ដើម្បីចែករំលែកក្តីស្រឡាញ់និងភាពកក់ក្តៅក្នុងឱកាសបុណ្យប្រពៃណីជាតិខ្មែរ។

ក្នុងឱកាសនោះក្រុមការងារបានសំណេះសំណាល សួរសុខទុក្ខ និងផ្តល់អំណោយជូនគ្រួសារអតីតយុទ្ធជនទាំង១៤គ្រួសារដោយក្នុង១គ្រួសារទទួលបានអង្ករ មី ត្រីខ ទឹកត្រី ទឹកស៊ីអ៊ីវ ឃីត១បញ្ចប់ និងថវិកាមួយចំនួនដើម្បីបង្ហាញពីការយកចិត្តទុកដាក់និងការចងចាំចំពោះគុណបំណាច់របស់អតីតយុទ្ធជនដែលបានលះបង់កម្លាំងកាយចិត្ត និងបំពេញភារកិច្ចក្នុងបុព្វហេតុការពារជាតិ មាតុភូមិនាពេលកន្លងមក និងដើម្បីជាការចូលរួមលើកកម្ពស់ស្មារតីចែករំលែកនិងសាមគ្គីភាពក្នុងសហគមន៍ជាពិសេសក្នុងឱកាសបុណ្យប្រពៃណីជាតិដ៏សំខាន់របស់ប្រជាជនកម្ពុជា ព្រមទាំងបានផ្តាំផ្ញើដល់គ្រួសារអតីតយុទ្ធជនឱ្យបន្តយកចិត្តទុកដាក់ថែរក្សាសុខភាព រស់នៅប្រកបដោយអនាម័យ ថែរក្សាបរិស្ថានជុំវិញលំនៅឋានឱ្យបានស្អាតយកចិត្តទុកដាក់ក្នុងការបង្កបង្កើនផល ដាំដំណាំបន្លែ ផ្លែឈើ និងចិញ្ចឹមសត្វតាមលទ្ធភាពដើម្បីជួយកាត់បន្ថយការចំណាយនិងបង្កើនចំណូលសម្រាប់គ្រួសារ។

តំណាងគ្រួសារអតីតយុទ្ធជនបានថ្លែងអំណរគុណចំពោះមន្ទីរ-អង្គភាពទាំង៤ ដែលបានយកចិត្តទុកដាក់ចុះសួរសុខទុក្ខនិងនាំយកអំណោយមកឧបត្ថម្ភដល់ពួកគាត់។ ក្រុមគ្រួសារអតីតយុទ្ធជនបានចាត់ទុកសកម្មភាពនេះថាជាការចែករំលែកក្តីស្រឡាញ់ និងការលើកទឹកចិត្តដ៏មានអត្ថន័យក្នុងឱកាសបុណ្យភ្ជុំបិណ្ឌ។ ដោយឡែកលោកមេភូមិ នាយទាហាននិងកម្លាំងប្រជាការពារក៏ទទួលបានថវិកាមួយចំនួនពីក្រុមការងារផងដែរ៕

ដោយ ស៊ុម វណ្ណា