AKP បន្ទាយមានជ័យ ថ្ងៃទី២ ខែតុលា ឆ្នាំ២០២៦ -- ការចុះជួបសំណេះសំណាល សួរសុខទុក្ខ និងនាំយកស្បៀងអាហារចែកជូនប្រជាពលរដ្ឋដែលកំពុងជួបការលំបាកដោយសារគ្រោះទឹកជំនន់ បានបង្ហាញឱ្យឃើញជាក់ស្តែងពីការយកចិត្តទុកដាក់ និងការគិតគូរខ្ពស់របស់ថ្នាក់ដឹកនាំគ្រប់ជាន់ថ្នាក់ ចំពោះសុខទុក្ខ សុវត្ថិភាព និងជីវភាពរស់នៅរបស់ប្រជាពលរដ្ឋ ជាពិសេសនៅក្នុងអំឡុងពេលដែលប្រជាពលរដ្ឋត្រូវបង្ខំចិត្តចាកចេញពីលំនៅឋាន ដើម្បីមកកាន់ទីទួលសុវត្ថិភាព។     

ជាក់ស្តែង នៅព្រឹកថ្ងៃទី០២ ខែតុលា ឆ្នាំ២០២៦ ឯកឧត្តម កែ គឹមយ៉ាន ឧត្តមក្រុមប្រឹក្សាផ្ទាល់ព្រះមហាក្សត្រ និងជាអ្នកតំណាងរាស្ត្រមណ្ឌលខេត្តបន្ទាយមានជ័យ ព្រមទាំងលោកជំទាវ ម៉ៅ ម៉ាល័យ កែ គឹមយ៉ាន បានអញ្ជើញជាអធិបតីដ៏ខ្ពង់ខ្ពស់ក្នុងពិធីចែកអំណោយស្បៀងឧបភោគបរិភោគ ជូនប្រជាពលរដ្ឋរងផលប៉ះពាល់ដោយសារស្ថានភាពទឹកជំនន់ចំនួន ៥៨៧គ្រួសារ ដែលបានជម្លៀសមកកាន់ទីទួលសុវត្ថិភាព នៅទីតាំងផ្សារបូរីជ័យ២ ចំការតាដោក ឃុំឫស្សីក្រោក ស្រុកមង្គលបូរី ខេត្តបន្ទាយមានជ័យ។     

ក្នុងឱកាសនោះ ឯកឧត្តម កែ គឹមយ៉ាន និងលោកជំទាវ បានសំណេះសំណាល សួរសុខទុក្ខ និងនាំយកស្បៀងឧបភោគបរិភោគចែកជូនដល់ប្រជាពលរដ្ឋទាំង ៥៨៧គ្រួសារ ដែលកំពុងស្នាក់នៅទីទួលសុវត្ថិភាព ដោយបានលើកទឹកចិត្តឱ្យប្រជាពលរដ្ឋបន្តមានការប្រុងប្រយ័ត្ន និងយកចិត្តទុកដាក់លើសុវត្ថិភាពរបស់ខ្លួន និងក្រុមគ្រួសារ ក្នុងអំឡុងពេលស្ថានភាពទឹកជំនន់នៅតែបន្តបង្កផលប៉ះពាល់។

 ការនាំយកស្បៀងមកចែកជូននៅពេលនេះ មិនត្រឹមតែជាការរួមចំណែកដោះស្រាយតម្រូវការជីវភាពប្រចាំថ្ងៃរបស់ប្រជាពលរដ្ឋដែលកំពុងស្នាក់នៅទីទួលសុវត្ថិភាពប៉ុណ្ណោះទេ ប៉ុន្តែថែមទាំងជាការបង្ហាញពីការគិតគូរដល់ប្រជាពលរដ្ឋនៅគ្រប់កាលៈទេសៈ ជាពិសេសនៅពេលជួបប្រទះគ្រោះធម្មជាតិ ដែលទាមទារឱ្យមានការចូលរួមពីគ្រប់ភាគីក្នុងការជួយសង្គ្រោះ និងសម្រាលការលំបាកជូនប្រជាពលរដ្ឋ។

ក្នុងស្មារតីនេះ អាជ្ញាធរមូលដ្ឋាន កងកម្លាំងប្រដាប់អាវុធ និងមន្ត្រីពាក់ព័ន្ធ បានបន្តសហការគ្នាក្នុងការជម្លៀសប្រជាពលរដ្ឋពីតំបន់ដែលមានហានិភ័យទៅកាន់ទីទួលសុវត្ថិភាព ព្រមទាំងរៀបចំទីតាំងស្នាក់នៅ និងផ្គត់ផ្គង់តម្រូវការចាំបាច់នានា ដើម្បីធានាសុវត្ថិភាព និងសុខុមាលភាពរបស់ប្រជាពលរដ្ឋរងគ្រោះ។

ពិធីនេះមានការអញ្ជើញចូលរួមពីលោកជំទាវ កែ សួនសុភី ស សុខា ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ ឯកឧត្តម ជា ឆេង ប្រធានក្រុមការងាររាជរដ្ឋាភិបាលចុះមូលដ្ឋានស្រុកមង្គលបូរី ព្រមទាំងលោក លោកស្រី អភិបាលរងខេត្ត ឯកឧត្តម លោកជំទាវ លោក លោកស្រី ប្រធានក្រុមការងាររាជរដ្ឋាភិបាលចុះមូលដ្ឋានឃុំទាំង១៣ ក្នុងស្រុកមង្គលបូរី និងថ្នាក់ដឹកនាំរដ្ឋបាលស្រុកជាច្រើនរូប។

 ជាមួយគ្នានេះ ក៏មានការអញ្ជើញចូលរួមពីប្រធានក្រុមប្រឹក្សាស្រុក អភិបាលស្រុក សមាជិកក្រុមប្រឹក្សាស្រុក អភិបាលរងស្រុក ប្រធានការិយាល័យ និងអង្គភាពនានាក្នុងរចនាសម្ព័ន្ធរដ្ឋបាលស្រុក កងកម្លាំងប្រដាប់អាវុធទាំងបីប្រភេទ លោក លោកស្រីមេឃុំ ស្មៀនឃុំ និងមន្ត្រីពាក់ព័ន្ធជាច្រើនរូប។

យោងតាមរបាយការណ៍ផលប៉ះពាល់ និងការខូចខាតដោយសារគ្រោះទឹកជំនន់របស់គណៈកម្មាធិការគ្រប់គ្រងគ្រោះមហន្តរាយខេត្តបន្ទាយមានជ័យ គិតត្រឹមម៉ោង ១៦:០០ នាទី ថ្ងៃទី០១ ខែតុលា ឆ្នាំ២០២៦ ទូទាំងខេត្ត មានប្រជាពលរដ្ឋត្រូវបានជម្លៀសទៅកាន់ទីទួលសុវត្ថិភាពសរុប ៣,២៤២គ្រួសារ ខណៈផ្លូវចំនួន ៥០២កន្លែង ស្មើនឹងប្រវែងប្រមាណ ២៩៤,២៥០ម៉ែត្រ បានទទួលរងផលប៉ះពាល់ដោយសារទឹកជំនន់។

ក្នុងចំណោមតំបន់រងផលប៉ះពាល់ ក្រុងប៉ោយប៉ែតមានប្រជាពលរដ្ឋជម្លៀសទៅទីទួលសុវត្ថិភាពចំនួន ១,៥៦៤គ្រួសារ ក្រុងសិរីសោភ័ណ ៧៧១គ្រួសារ ស្រុកមង្គលបូរី ៨៥៦គ្រួសារ ស្រុកអូរជ្រៅ ៣៣គ្រួសារ និងស្រុកភ្នំស្រុក ១៨គ្រួសារ។

ក្រៅពីផលប៉ះពាល់ដល់លំនៅឋាន និងហេដ្ឋារចនាសម្ព័ន្ធ ទឹកជំនន់ក៏បានបង្កផលប៉ះពាល់ដល់វិស័យកសិកម្ម ដែលជាប្រភពចំណូលដ៏សំខាន់របស់ប្រជាពលរដ្ឋនៅតាមជនបទ។ តាមរបាយការណ៍ខាងលើ ដំណាំស្រូវរងផលប៉ះពាល់សរុបប្រមាណ ២៧,០០០ហិកតា ដំឡូងមី ១៥៦ហិកតា និងដំណាំរួមផ្សំ ១០ហិកតា ខណៈដំណាំស្រូវដែលរងការខូចខាតមានចំនួន ៤៣៤ហិកតា។

ក្នុងស្ថានភាពនេះ ការចុះជួបសួរសុខទុក្ខ និងការផ្តល់ជំនួយស្បៀងដោយផ្ទាល់ដល់ប្រជាពលរដ្ឋរងគ្រោះ បានក្លាយជាផ្នែកមួយនៃកិច្ចខិតខំប្រឹងប្រែងរួមរបស់អាជ្ញាធរ និងភាគីពាក់ព័ន្ធ ក្នុងការឆ្លើយតបបន្ទាន់ចំពោះគ្រោះមហន្តរាយ និងសម្រាលបន្ទុកជីវភាពរបស់ប្រជាពលរដ្ឋនៅពេលដែលពួកគាត់កំពុងជួបការលំបាក។

ជាមួយគ្នានេះ ការដែលប្រជាពលរដ្ឋត្រូវបានរៀបចំជម្លៀសទៅកាន់ទីទួលសុវត្ថិភាព និងទទួលបានការផ្គត់ផ្គង់ស្បៀងជាបន្តបន្ទាប់ ក៏ឆ្លុះបញ្ចាំងពីការដាក់សុវត្ថិភាព និងសុខុមាលភាពរបស់ប្រជាពលរដ្ឋជាអាទិភាព ក្នុងការឆ្លើយតបនឹងស្ថានភាពគ្រោះទឹកជំនន់ដែលកំពុងប៉ះពាល់ដល់មូលដ្ឋានមួយចំនួនក្នុងខេត្តបន្ទាយមានជ័យ។

ការចុះជួយប្រជាពលរដ្ឋរបស់ឯកឧត្តម កែ គឹមយ៉ាន និងលោកជំទាវ នាពេលនេះ ក៏បានរួមចំណែកបន្ថែមទៀតដល់កិច្ចខិតខំប្រឹងប្រែងរបស់រដ្ឋបាលខេត្ត រដ្ឋបាលស្រុក និងកងកម្លាំងគ្រប់ប្រភេទ ក្នុងការធានាថា ប្រជាពលរដ្ឋដែលរងផលប៉ះពាល់ដោយទឹកជំនន់មិនត្រូវបានទុកឱ្យប្រឈមនឹងការលំបាកដោយឯកឯងឡើយ ខណៈការជួយសង្គ្រោះ និងការផ្គត់ផ្គង់តម្រូវការចាំបាច់នៅតាមទីទួលសុវត្ថិភាព នៅតែត្រូវបានយកចិត្តទុកដាក់ជាបន្តបន្ទាប់៕

ដោយ ឈុន សារ៉ាត