AKP ភ្នំពេញ ថ្ងៃទី២៨ ខែកញ្ញា ឆ្នាំ២០២៦--លោក ជិន ស៊ីថា នាយខណ្ឌរដ្ឋបាលជលផលកំពង់ធំ កាលពីថ្ងៃទី២៧ ខែកញ្ញា ឆ្នាំ២០២៦ បានដឹកនាំមន្ត្រីខណ្ឌ មន្ត្រីសង្កាត់រដ្ឋបាលជលផលកំពង់ស្វាយលើ មន្ត្រីជាប់កិច្ចសន្យា និងគណៈកម្មការសហគមន៍នេសាទសហការជាមួយកម្លាំងទីបញ្ជាការស្រាលស្រុកកំពង់ស្វាយចុះត្រួតពិនិត្យ និងបង្ក្រាបបទល្មើសជលផល ចាប់ពីចំណុចទួលថ្មាមរហូតដល់ចំណុចខាងត្បូងបឹងរៀលស្ថិតក្នុងដែនសហគមន៍នេសាទសាមគ្គីអភិវឌ្ឍន៍បឹងស្ពុង ឃុំសាន់គ ស្រុកកំពង់ស្វាយ ខេត្តកំពង់ធំ។

ជាលទ្ធផល ក្រុមការងារបានអនុវត្តចំនួន ២ករណី ដោយបានរុះរើ និងបំផ្លាញចោលឧបករណ៍នេសាទខុសច្បាប់នៅនឹងកន្លែងរួមមាន ១.របាំងសាច់អួនក្រឡាញឹកចំនួន ២របាំងប្រវែង ៣០០ម៉ែត្រ ឡុកចំនួន ៤គ្រឿង លប/លូចំនួន ៨មាត់ និងបង្គោលចំនួន ២៥០ដើម។ ២.របាំងស្បៃមុងចំនួន ២៥របាំង ប្រវែងសរុប ៥៥០ម៉ែត្រ ឡុកចំនួន ២៥គ្រឿង លូស្បៃមុងចំនួន ២៥មាត់ និងបង្គោលចំនួន ៣៥០ដើម។

នៅថ្ងៃជាមួយគ្នានេះដែរ លោក គន ចាន់សីហា នាយសង្កាត់រដ្ឋបាលជលផលស្ទោង បានដឹកនាំមន្ត្រីជាប់កិច្ចសន្យា សហការជាមួយលោកអនុសេនីយ៍ឯក លុយ សុភាព នាយទាហានថ្នាក់ដឹកនាំតំបន់ប្រតិបត្តិការសឹករងកំពង់ធំ និងជាប្រធានទីបញ្ជាការស្រាលប្រចាំឃុំពាមបាង ស្រុកស្ទោង ចុះប្រតិបត្តិការត្រួតពិនិត្យ ទប់ស្កាត់ និងបង្ក្រាបបទល្មើសនេសាទនៅចំណុចកូនកុក ដល់ក្របីរត់ ស្ថិតក្នុងឃុំសំព្រោច ស្រុកស្ទោង ខេត្តកំពង់ធំ។

ជាលទ្ធផល ក្រុមការងារបានអនុវត្តចំនួន ២ករណី និងបានរុះរើ និងកាប់បំផ្លាញចោលឧបករណ៍នេសាទខុសច្បាប់នៅនឹងកន្លែង រួមមាន ១.របាំងស្បៃមុងចំនួន ៣២របាំង ប្រវែង ១.៦០០ម៉ែត្រ ឡុកស្បៃមុងចំនួន ៣២គ្រឿង និងលូ/លបចំនួន ៦៤មាត់។ ២.របាំងសាច់អួនក្រឡាញឹកចំនួន ៣របាំង ប្រវែង ៧៥០ម៉ែត្រ ឡុកសាច់អួនចំនួន ៦គ្រឿង លូឬលបសាច់អួនចំនួន ១២មាត់ បង្គោលឈើចំនួន ៨០០ដើម និងបានចាក់លែងត្រីចម្រុះចំនួន ៤៥គីឡូក្រាម ចូលទៅក្នុងប្រភពទឹកធម្មជាតិវិញ។

លោក ជិន ស៊ីថា នាយខណ្ឌរដ្ឋបាលជលផលកំពង់ធំ បានបញ្ជាក់ថា សកម្មភាពចុះត្រួតពិនិត្យ និងបង្ក្រាបបទល្មើសជលផលទាំងនេះ ក្នុងគោលបំណងទប់ស្កាត់ការប្រើប្រាស់ឧបករណ៍នេសាទខុសច្បាប់ និងការពារធនធានជលផលនៅក្នុងតំបន់សហគមន៍នេសាទ និងប្រភពទឹកធម្មជាតិក្នុងខេត្តកំពង់ធំ៕

ដោយ៖ ស៊ុម វណ្ណា