AKPកំពង់ធំថ្ងៃទី២៨ខែសីហាឆ្នាំ២០២៦--រដ្ឋបាលខេត្តកំពង់ធំសហការជាមួយក្រសួងទេសចរណ៍រៀបចំវគ្គបណ្តុះ បណ្តាលស្តីពី"សេវាកម្មប្រណិត ជំនាញសេវាកម្មម្ហូបអាហារ-ភេសជ្ជៈ និងពិធីការជាតិអន្តរជាតិ"កាលពីថ្ងៃទី ២៧ ខែ សីហា ឆ្នាំ២០២៦នៅវិទ្យាស្ថានពហុបច្ចេកទេសខេត្តកំពង់ធំ។

លោក ហាន កុសល អភិបាលរងខេត្តកំពង់ធំបានលើកឡើងថាគោលបំណងនៃវគ្គសិក្ខាសាលានេះលើកកម្ពស់គុណ ភាពសេវាកម្ម និងការកសាងសមត្ថភាពធនធានមនុស្ស ជាក់ស្តែងថ្ងៃនេះ រដ្ឋបា លខេត្តកំពង់ធំបានសហការជាមួយក្រសួងទេសចរណ៍ រៀបចំវគ្គបណ្តុះ បណ្តាលដ៏មានសារៈសំខាន់នេះឡើង ដើម្បីផ្តល់ឱកាសជូនដល់ម្ចាស់អាជីវកម្មទេសចរណ៍បានសិក្សាស្វែងយល់អំពីស្តង់ដារ“សេវាកម្មប្រណិត”ដែលមិនមែនមានន័យត្រឹមតែការរៀបចំម្ហូបអាហារឬការទទួលភ្ញៀវឱ្យបានសមរម្យប៉ុណ្ណោះទេប៉ុន្តែជាវប្បធម៌នៃការផ្តល់សេវា ដែលទាមទារឱ្យអ្នកផ្តល់សេវា​មានចំណេះដឹង ជំនាញ វិន័យ ទំនួលខុសត្រូវ និងការយកចិត្តទុកដាក់ខ្ពស់។ 

លោកអភិបាលរងខេត្តបានបញ្ជាក់ថាក្នុងរយៈពេលបណ្ដុះបណ្ដាលនេះ សិក្ខាកាមនឹងបានសិក្សានិងអនុវត្តអំពី នីតិវិធីប្រតិបត្តិការស្តង់ដារ រួមមាន ការបើកភោជនីយដ្ឋានការស្វាគមន៍ និងរៀបចំកន្លែងអង្គុយជូនភ្ញៀវ ការណែនាំភ្ញៀវទៅកាន់តុ ការបង្ហាញមុខម្ហូប ការទទួលការកុម្ម៉ង់ភេសជ្ជៈនិងម្ហូបអាហារ ការរៀបចំតុ ការបម្រើម្ហូប ការបោស សម្អាតចាន ស្លាបព្រានិងកែវ ការបម្រើបង្អែម កាហ្វេ រហូតដល់ការបង្ហាញវិក្កយបត្រ។

ចំណេះដឹងនិងជំនាញទាំងនេះនឹងជួយឱ្យសិក្ខាកាមអាចអនុវត្តការងារបានមានស្តង់ដារមានប្រសិទ្ធភាពនិងមានភាពជឿជាក់ ជាពិសេសក្នុងការបង្កើតបទពិសោធន៍ល្អសម្រាប់ភ្ញៀវនិងលើកកម្ពស់គុណភាពសេវាកម្មរបស់ស្ថាប័ន ឬអាជីវកម្មរបស់ខ្លួនផងដែរ។

វគ្គបណ្ដុះបណ្ដាលក៏បានផ្តោតលើ ពិធីការជាតិ-អន្តរជាតិ ដែលជាចំណេះដឹងដ៏ចាំបាច់សម្រាប់ការទំនាក់ទំនងនិងការរៀបចំពិធីការ នៅពេលទទួលភ្ញៀវជាតិនិងអន្តរជាតិ ព្រមទាំងការចូលរួមក្នុងកម្មវិធីផ្លូវការ និងព្រឹត្តិការណ៍ផ្សេងៗ។ក្នុងន័យនេះដើម្បីគាំទ្រនិងជំរុញការអនុវត្តនូវយុទ្ធសាស្ត្រ និងយុទ្ធនាការខាងលើ ការអភិវឌ្ឍន៍មូលធនមនុស្សក្នុងវិស័យទេសចរណ៍ ជាការងារអទិភាពដ៏សំខាន់ ដែលតម្រូវឱ្យមានការគិតគូខ្ពស់ទាំងគុណវុឌ្ឍិ សមត្ថភាព ជំនាញវិជ្ជាជីវៈនិងផលិតភាព តាមរយៈការជំរុញអភិវឌ្ឍន៍សមត្ថភាព និងការអប់រំបណ្តុះបណ្តាលថ្មីនិងបន្ថែម (Reskilling and Upskilling) ដល់បុគ្គលិកបម្រើការក្នុងវិស័យទេសចរណ៍សំដៅធានាបាននូវការផ្តល់សេវាកម្មទេសចរណ៍ និងបដិសណ្ឋារកិច្ចប្រកបដោយគុណភាពខ្ពស់ ភាពកកក្តៅនិងភាពទាក់ទាញដល់ភ្ញៀវទេសចរជាតិនិងអន្តរជាតិ។

លោកជំទាវ វណ្ណ សេរីរ័ត្ន អនុរដ្ឋលេខាធិការក្រសួងទេសចរណ៍មានប្រសាសន៍ថាក្រសួងទេសចរណ៍ បើកទូលាយដល់សមាគមឧស្សាហកម្មទេសចរណ៍ គ្រឹះស្ថានអប់រំ បណ្តុះ បណ្តាលបច្ចេកទេសនិងវិជ្ជាជីវៈ ព្រមទាំងវិស័យឯកជន ដដើម្បីធ្វើការឱ្យបានជិតស្និទ្ធជាមួយគ្នាសំដៅជំរុញការបណ្តុះបណ្តាលបដិសណ្ឋារកិច្ចឱ្យបានកាន់តែផុលផុសបន្ថែមទៀតក្នុងគោលបំណងពង្រឹងសមត្ថភាពវិជ្ជាជិវៈ បើកច្រកសិក្សាពេញមួយជីវិតដល់យុវជននិងពង្រឹងគុណភាពសេវាកម្មទេសចរណ៍ឱ្យបានកាន់តែល្អប្រសើរស្របតាមទស្សនទាន“បុគ្គលិកម្នាក់ ជំនាញមួយ” និង “សេវាមួយ ស្តង់ដាមួយ” ដែលក្រសួងទេសចរណ៍បានដាក់ចុះ។

ដើម្បីឱ្យវគ្គបណ្ដុះបណ្ដាលនេះទទួលបានជោគជ័យ លោកជំទាវសូមលើកទឹកចិត្តដល់សិក្ខាកាមទាំងអស់÷១.សូមចូលរួមសិក្សាឱ្យបានពេញលេញនិងយកចិត្តទុកដាក់ខ្ពស់លើមេរៀនទាំងទ្រឹស្តី និង ការអនុវត្ត។២.សូមចូលរួមសួរ-ឆ្លើយ ពិភាក្សា និងចែករំលែកបទពិសោធន៍ជាក់ស្តែងដើម្បីបង្កើនការយល់ដឹង និងសមត្ថភាពរបស់ខ្លួន។៣.សូមយកចំណេះដឹង និងជំនាញដែលទទួលបានពីវគ្គនេះ ទៅអនុវត្តជាក់ស្តែងនៅតាមស្ថាប័ន អង្គភាព និងមូលដ្ឋានការងាររបស់ខ្លួន ពព្រមទាំងចែករំលែកចំណេះដឹងនេះឱ្យបានទូលំទូលាយ។៤.សូមប្រកាន់ខ្ជាប់នូវសីលធម៌វិជ្ជាជីវៈ វិន័យ សុជីវធម៌ ការគោរពគ្នាទៅវិញទៅមក និងស្មារតីបម្រើប្រកបដោយភាពរួសរាយរាក់ទាក់។

លោកជំទាវសង្ឃឹមយ៉ាងមុតមាំថាសិក្ខាកាមទាំងអស់ នឹងត្រង់ត្រាប់ស្តាប់បទបង្ហាញ និងចូលរួមឱ្យបានសកម្មជាមួយគ្រូឧទ្ទេសទាំង៣រូប ដើម្បីទទួលបាននូវចំណេះដឹង ជំនាញ និងបទពិសោធន៍ថ្មីៗក្នុងការប្រតិបត្តិជំនាញបដិសណ្ឋារកិច្ច និងពិធីការជាតិ-អន្តរជាតិ នៅក្នុងស្ថាប័នរបស់ខ្លួនឱ្យបានកាន់តែល្អប្រសើរ ជាពិសេសចូលរួមវគ្គបណ្តុះបណ្តាលឱ្យបានពេញលេញព្រមទាំងជួយបង្ហាត់បង្រៀនបន្តដល់បុគ្គលិក និងសហសេវិករបស់ខ្លួន ក្រោយបញ្ចប់វគ្គបណ្តុះបណ្តាល សំដៅធានាបានថា សេវាកម្មទេសចរណ៍នៅក្នុងខេត្តកំពង់ធំមានជំនាញវិជ្ជាជីវៈច្បាស់លាស់ មានស្តង់ដាត្រឹមត្រូវ និងការទទួលស្គាល់ពីប្រតិភូនិងភ្ញៀវទេសចរជាតិ-អន្តរជាតិ៕

ដោយ៖ ស៊ុម វណ្ណា